21 Hi ku famba ka nkama, Davhida a fika ka muprista Ahimeleki aNobi.+ Ahimeleki a sungula ku rhurhumela loko a tlhangana na Davhida, a gama a mu vutisa a ku: “Hi mhaka muni u ta na u li wexe?”+ 2 Davhida a hlamula muprista Ahimeleki a ku: “Ku ni leswi hosi yi nga ni rhuma swaku ni ya swi yendla, kambe yi te: ‘U nga byeli munhu leswi ni ku rhumaka swona ni leswi ni nga ku byela swona.’ Se ni twanane ni madjaha ya mina lomu hi nga ta tlhangana kona. 3 Loko u ni 5 wa mapawu, ni kombela u ni nyika wona, kambe loko u nga li na wona ni kombela u ni nyika xin’wani ni xin’wani lexi nga kona.” 4 Kambe muprista a hlamula Davhida a ku: “A ku na mapawu ya ku fana ni ya masiku, ko va ni pawu la ku kwetsima ntsena.+ Madjaha ma nga dla loko ma ni masiku ma nga se famba masangu.”+ 5 Davhida a hlamula muprista a ku: “A hi fambanga masangu ku fana ni minkama yin’wani loko hi ya nyimpini.+ Leswi madjaha ma tengaka loko ma yendla ntirho wa ku fana ni lowu, namuntlha ma fanele ma tenge hintamu ku tlula masiku!” 6 Kutani muprista a mu nyika pawu la ku kwetsima,+ hikusa a ku nga na pawu lin’wani, a ko va ni pawu la ku kwetsima, leli a li susiwile ka tabernakela ya Yehovha swaku ku vekiwa pawu la nyuwani hi siku lolelo.