I mpsini leswi hi swi tivaka hi timpsalu ta Yehovha? Yehovha a tale hi timpsalu naswona “a nga swi naveli leswaku ku helisiwa munhu ni mun’we”. (2 Pe. 3:9) Se Yehovha a ti kombise ku yini timpsalu ka vanhu lava nga yendla swidjoho swaswikulu? Hosi Davhida a yendle swidjoho swaswikulu hintamu, ku nga ku famba masangu ni nsati wa ku a hi wa yena ni ku tlhela a dlaya munhu lweyi a a nga na nandzu. Kambe Davhida a tisolile naswona Yehovha a mu kombe timpsalu hi ku mu rivalela. (2 Sa. 12:1-12) Hosi Manasi a yendle minchumu ya ku biha hintamu ku ringana malembe ya manyingi ka wutomi la yena, hambileswo Yehovha a mu kombe timpsalu nkama a nga vona swaku Manasi a tisolile ka swidjoho swa yena. (2 Tik. 33:9-16) Swikombiso leswi swi hi khumbukisa leswaku Yehovha minkama hinkwayu a kombisa timpsalu loko ku ni xivangelo xa ku a yendla leswo. Phela a ta pfuxa vanhu volavo hileswi va nga pfumela leswaku va mu djohelile va tlhela va tisola ka swidjoho swa vona. Murindzi 05/24 paj. 4 par. 12

Ndzhaku ka loko Yehovha a chunse vanhu va yena ka tiko la Gibita, a nyike vaprista ntirho ka tabernakela, naswona Valevhi va nyikiwe ntirho lowu a wu yendliwa ka ndhawu yoleyo ya ku kwetsima. Ku nga va leswaku lava na va tirha ka tabernakela kumbe lava na va tshama kusuhi na lona, a va hlayisiwa hi ndlela ya ku hlawuleka hi Yehovha? Ihim. Ka Yehovha vanhu hinkwavu va fana. Phela Yehovha a nga na xikheto. Muyisrayele mun’wani ni mun’wani a a ta va munghanu wa Yehovha. Hi xikombiso, Yehovha a yendle swi koteka leswaku xitshungu hinkwaxu xi vona rhefu ni ndzilu lowu a wu kumeka henhla ka tabernakela. (Eks. 40:38) Loko rhefu li sungula ku famba li kongoma ka ndhawu yin’wani, hambi lava a va tshama kule ni tabernakela a va ta swi kota ku swi vona leswo. Leswo a swi pfuna mindjangu hinkwayu leswaku yi longela minchumu ya yona, yi hahlula matende yi tlhela yi famba ni xitshungu lexin’wani hinkwaxu. (Tin. 9:15-23) Swi hi ku fana ni namuntlha, a swi na mhaka leswaku hi tshama kwini, Yehovha wa hi rhandza hinkwerhu, wa hi hlayisa a tlhela a hi vhikela. Murindzi 06/24 paj. 4 mapar. 10-12

Wutomi la Davhida a li li nghozini hikusa n’wana wa yena Absalomu a a lava ku mu dlaya swaku a mu tekela wuhosi. (2 Sa. 15:12, 13) Swi lave Davhida a baleka a suka Yerusalema hi xihantla! Nkama lowu na va li ku balekeni, Davhida a swi vone swi yampsa swaku ku sala munhu aYerusalema leswaku a ta mu tisela marungula ya leswi a swi ta sala swi yendliwa hi Absalomu. Se a rhumele Zadoki ni vaprista van’wani swaku va tlhela va ya Yerusalema leswaku va ta mu byela hinkwaswu leswi a swi yendleka. (2 Sa. 15:27-29) Kambe vanhu lava Davhida a nga va rhuma a va fanele va tivonela hintamu. Hambileswi Davhida a a li ni mavonelo, a swi lava a kombela ku pfuniwa hi Zadoki ni vanghanu va yena va ku tshembeka. (2 Sa. 15:32-37) A swi lava Huxayi a yendla ingi a nyima na Absalomu a tlhela a mu byela swaku va nga mu hlaselisa ku yini Davhida. Ku vula ntiyiso leswo a swi ta yendla swaku Davhida a tilunghiselela ku hlaseliwa. Kambe loko Absalomu a vona se swi fanelile ku landzela leswi a nga byeliwa hi Huxayi, Huxayi a byele Zadoki na Abiyatari leswi Absalomu a nga swi boha. (2 Sa. 17:8-16) Ku sukela kolanu, va vhele va rhumela marungula ka Davhida lawa ma nga mu pfuna swaku a tivhikela. — 2 Sa. 17:21, 22. Murindzi 07/24 mapaj. 4-5 mapar. 9-10