Mintirho Ya Vapostolo
5 Kambe a ku ni wanuna mun’wani lweyi a va ku i Ananiya; yena ni nsati wa yena Safira va xavise nsimu yin’wani ya vona. 2 Kambe Ananiya a pambule male yin’wani a yi fihla naswona nsati wa yena a a swi tiva; kutani a teka leyi nga sala a ya nyika vapostolo.+ 3 Kambe Pedru a ku: “Ananiya, hi mhaka muni u tshike Sathana a ku xengetela+ swaku u hembela moya wa ku kwetsima+ ni ku fihla male yin’wani ya nsimu ke? 4 Na u nge se yi xavisa, a yi nga li ya wena? Ni nkama u nga yi xavisa, male ya kona a yi nga li ya wena ke? Se hi mhaka muni u pimise ku yendla leswi? Phela a wu hembelanga vanhu kambe u hembele Xikwembu.” 5 Nkama Ananiya a twa nga leswo, a wa a fa. Kutani vanhu lava nga twa mhaka leyi va chava swinene. 6 Se ku ta madjaha ma ta mu bohelela hi tipanu ma mu rhwala ma ya mu lahla.
7 Na se ku hundze kolomuyani ka mawora manharhu, nsati wa yena a nghenile na a nga swi tivi leswi nga humelela. 8 Pedru a vutisa Safira a ku: “Hi nga hi byela, wena ni nuna wa wena mi xavise nsimu hi male leyi?” Yena a ku: “Ina, hi yi xavise hi male yoleyo.” 9 Se Pedru a ku: “Hi mhaka muni n’wina vambirhi mi twanane ku ringa moya wa ku kwetsima wa Yehovha?* Phela vanhu lava nga ya lahla nuna wa wena va le xipfalwini, na wena va ta ku rhwala.” 10 Hi nkama wolowo, na yena Safira a yo vhela a wa a fa phambheni ka Pedru. Nkama madjaha ma nga nghena ma mu kuma na a file, ma mu rhwale ma ya mu lahla tlhelweni ka nuna wa yena. 11 Kutani bandla hinkwalu ni hinkwavu lava nga twa mhaka leyi va chava swinene.
12 Vapostolo va yendle masingita ya manyingi ni minchumu ya ku hlamalisa xikarhi ka vanhu+ naswona a va tolovela ku tlhangana ka Koredori* leli vitaniwaka Koredori la Solomoni.+ 13 Kambe vanhu van’wani a va chava ku tipatsa na vona, hambileswi a va khuluma kahle ngopfu hi vona. 14 Lava nga pfumela ka Hosi va ye va yengeteleka, ku nga vavanuna ni vavasati va vanyingi.+ 15 Vanhu a va humesa vanhu va ku vabya handle, va va veka switaratwini, va va yetlelisa ka masangu kumbe swibedwani swaku nkama Pedru a nga ta hundza va ta khumbiwa hi xindzhuti xa yena.+ 16 Naswona vanhu va madoropa lawa a ma li kusuhi ni Yerusalema, a va ta na va li vanyingi, va rhwale vanhu lava vabyaka ni lava karhatiwaka hi madimoni naswona hinkwavu ka vona a va hanyisiwa.
17 Kambe muprista wamukulu ni hinkwavu lava a va li na yena, ku nga ntlawa wa Vasaduki,* va ngheniwa hi wukwele. 18 Se va khoma vapostolo va va peta ka djele la le doropeni.+ 19 Kambe niwusiku, ntsumi ya Yehovha* yi pfula swipfalu swa djele+ yi va humesa yi gama yi ku: 20 “Fambani mi ya nyima tempeleni, mi fika mi byela vanhu mahungu ya ku tsakisa ya wutomi.” 21 Nkama va nga byeliwa leswo, va ye tempeleni; na li ya ku xeni, va fike va sungula ku djondzisa.
Nkama muprista wamukulu ni lava a va li na yena va nga fika, va vitane lava a va li va ntlawa wa Tribunali Lalikulu la Vayuda* ni madoda hinkwawu ya Vayisrayele, kutani va rhuma vavoneleli swaku va landza vapostolo adjele. 22 Kambe nkama vavoneleli va nga fika djele, a va va kumanga. Se va tlhelela tribunali va fika 23 va ku: “Hi kume djele na li khiyiwile kahle naswona vavoneleli va djele a va nyime ka swipfalu, kambe nkama hi nga pfula, a hi kumanga munhu ndzeni.” 24 Nkama murhangeli wa tempele ni vaprista vavakulu va nga twa mhaka leyi, va dungeke tinhloko hikusa a va nga swi tivi swaku ku ta yendleka yini. 25 Kambe ku ta munhu mun’wani a fika a ku: “Vavanuna lava mi nga va peta djele va le tempeleni, va le ku djondziseni ka vanhu.” 26 Kutani murhangeli ni vatirhi va yena va famba va ya va teka va vuya na vona; a va va lwisanga hikusa a va chava swaku vanhu va nga va ba hi maribye.+
27 Nkama va nga vuya na vona, va fike va va nyimisa phambheni ka Tribunali.* Kutani muprista wamukulu a va konanisa 28 a ku: “Kasi a hi mi byelanga swaku mi nga ha tshuki mi djondzisa hi vito leli+ ke? Se hi mhaka muni mi tate Yerusalema hi djondzo ya n’wina? Hi mhaka muni mi lava ku hi nyika nandzu wa ngati ya munhu lweyi ke?”+ 29 Pedru ni vapostolo lavan’wani va hlamula va ku: “Hi fanele hi yingisa Xikwembu lexi nga Hosi ku tlula vanhu.+ 30 Xikwembu xa vavhovho va hina xi pfuxe Yesu, lweyi n’wina mi nga mu dlaya mi mu hayeka ka mhandzi.*+ 31 Xikwembu xi mu tlakusile a va Murhangeli Wamukulu+ ni Muponisi,+ xi tlhela xi mu veka ka voko la xona la xinene+ swaku Vayisrayele va ta tisola ni ku rivaleliwa swidjoho swa vona.+ 32 Hina ni moya wa ku kwetsima+ lowu Xikwembu xi nga wu nyika lava xi yingisaka hileswi xi nga hosi ya vona, hi timboni ta timhaka leti.”+
33 Nkama va nga twa leswo, va kwate hintamu* va za va lava ku va dlaya. 34 Kambe Mufarisi mun’wani lweyi vito la yena ku nga Gamaliyele,+ lweyi a a li mudjondzisi wa Nawu naswona a a hloniphiwa hi vanhu hinkwavu, a sekeleka a nyima aTribunali* a vula swaku vavanuna lava va humesiwa handle swa nkamanyana 35 a gama a ku: “Vavanuna va Israyele, tivoneleni ka leswi mi lavaka ku swi yendla hi vavanuna lava. 36 Hi xikombiso, a hi khale ngopfu ku nga humelela Tudasi, lweyi a a tivula munhu wa lisima naswona kolomuyani ka 400 wa vanhu va tipatse na yena. Kambe a dlayiwile naswona hinkwavu lava a va mu landzela va hangalakile, ku nga sali ni munhu ni mun’we. 37 Se ku tlhele ku humelela Yudasi wa le Galileya hi nkama wa ku tsalisiwa ka vanhu naswona a xengetele vanhu swaku va mu landzela. Kambe na yena a dlayiwile naswona hinkwavu lava a va mu landzela va hangalakile. 38 Se hi mhaka ya leswi nga humelela, na mi byela: Mi nga tipeteni ka timhaka ta vanhu lava, va tshikeni hikusa loko planu* la vona kumbe ntirho lowu va wu yendlaka swi huma ka munhu, a swi nga ta tlhaveliwa hi dlambu; 39 kambe loko swi ta hi ka Xikwembu, a mi nga ta swi kota ku va tshikisa.+ Tivoneleni hikusa mi nga tshuka mi tikuma na mi lwa ni Xikwembu.”+ 40 Se va mu yingisa, kutani va vitana vapostolo, va va ba,+ va va byela swaku va tshika ku vulavula hi vito la Yesu va gama va va tshika va famba.
41 Kutani va huma Tribunali* na va tsakile+ hileswi va nga vuliwa lava faneliwaka hi ku hluphiwa* hi mhaka ya vito la Yesu. 42 Naswona siku ni siku a va nga tshiki ku djondzisa ni ku chumayela atempeleni ni hi yindlo ni yindlo+ hi ta mahungu ya ku tsakisa ya leswaku Yesu hi yena Kreste.+