Tinhlayo

10 Se Yehovha a byela Moxe a ku: 2 “Tiyendlele timhalamhala*+ timbirhi hi prata; u ta ti yendla hi hamela, naswona u ta ti tirhisa swaku u vitana vanhu ni ku va byela swaku va hahlula matende. 3 Loko ti chayiwa hi nkama wun’we, vanhu hinkwavu va fanele va tlhangana na wena ka nyanghwa wa tende la ntlhanganu.+ 4 Loko ku chayiwa yin’we ntsena, ku fanele ku ta varhangeli ntsena lava rhangelaka mintlawa* ya Vayisrayele, va ta tlhangana na wena.+

5 “Loko mi chaya guwa leli txintxatxintxaka, lava va nga wuxeni+ va fanele va suka. 6 Loko mi chaya ka wumbirhi guwa leli li txintxatxintxaka, ku fanele ku suka lava nga ka tlhelo la sul.*+ A mhalamhala yi fanele yi chayisiwa xileswo loko ntlawa wun’wani ni wun’wani wu suka.

7 “Loko mi vitana vanhu hinkwavu mi fanele mi chaya timhalamhala,+ kambe guwa la kona a li fanelanga li txintxatxintxa. 8 Vaprista ku nga vana va Aroni, hi vona va faneleke va chaya timhalamhala;+ ku tirhisa timhalamhala swi ta va nawu wa ku kala wu nga heli ka n’wina ni vatukulu va n’wina.

9 “Loko swi lava mi lwa ni lweyi a mi xanisaka ka tiko la n’wina, mi fanele mi chaya guwa la nyimpi hi ku tirhisa timhalamhala,+ kutani Yehovha Xikwembu xa n’wina a ta mi khumbuka a gama a mi ponisa ka valala va n’wina.

10 “Leswo mi ta swi yendla ni hi minkama ya n’wina ya ku tsaka,+ hi minkama ya mafexta+ ya n’wina ni le ku sunguleni ka tiwheti ta n’wina, mi ta chaya timhalamhala loko mi yendla magandzelo ya ku hisiwa+ ni magandzelo ya ku kombela ku rhula;+ leswi swi ta yendla swaku Xikwembu xi mi khumbuka. Hi mina Yehovha Xikwembu xa n’wina.”+

11 Hi diya 20 ka wheti ya wumbirhi,+ ka lembe la wumbirhi, rhefu li suka henhla ka tabernakela+ ya Wumboni. 12 Se Vayisrayele va suka amananga ya Sinayi, va famba hi ku landza leswi va nga byeliwa swaku va sukisa xiswona.+ Kutani rhefu li fika li tshama amananga ya Parani.+ 13 A vo sungula ku suka hi ndlela leyo, hi ku landza leswi Yehovha a nga swi byela Moxe.+

14 Ntlawa wa tinxaka tinharhu lowu rhangeliwaka hi vana va Yuda, hi wona wu nga rhanga wu suka hi ku ya hi mintlawa ya wona;* murhangeli wa wona a ku li Nasoni+ n’wana wa Aminadabi. 15 Lweyi a a rhangela ntlawa wa lixaka la Isakara a ku li Nataneli+ n’wana wa Suwari. 16 Lweyi a a rhangela ntlawa wa lixaka la vana va Zebuloni a ku li Eliyabi+ n’wana wa Eloni.

17 Loko tabernakela yi hahluliwa,+ vana va Jersoni+ ni vana va Merari+ lava rhwalaka tabernakela a va suka.

18 Se ntlawa wa tinxaka tinharhu lowu rhangeliwaka hi vana va Rubeni wu suka hi mintlawa ya wona, a wu rhangeliwa hi Elizuri+ n’wana wa Xedewuri. 19 Lweyi a a rhangela ntlawa wa lixaka la vana va Simiyoni a ku li Xelumiyeli+ n’wana wa Zurixadayi. 20 Lweyi a a rhangela ntlawa wa lixaka la vana va Gadi, a ku li Eliyazafi+ n’wana wa Deweli.

21 Ku gama ku suka Vakohata lava a va rhwala swibya swa ndhawu leyi kwetsimaka.+ Tabernakela a yi fanele se yi gwimbiwile loko va fika.

22 Ntlawa wa tinxaka tinharhu lowu rhangeliwaka hi vana va Efrayimi wu gama wu suka hi ku ya hi mintlawa ya wona, a wu rhangeliwa hi Elixama+ n’wana wa Amiyudi. 23 Lweyi a a rhangela ntlawa wa lixaka la vana va Manasi a ku li Gamaliyele+ n’wana wa Pedazuri. 24 Lweyi a a rhangela ntlawa wa lixaka la vana va Benjamini, a ku li Abidani+ n’wana wa Gidiyoni.

25 Kutani ntlawa wa tinxaka tinharhu lowu rhangeliwaka hi vana va Dani wu suka hi ku ya hi mintlawa ya wona, a wu li varindzi hikusa hi wona a wu sala ndzhaku, a wu rhangeliwa hi Ayiyezeri+ n’wana wa Amixadayi. 26 Lweyi a a rhangela ntlawa wa lixaka la vana va Aseri a ku li Pagiyeli+ n’wana wa Okirani. 27 Lweyi a a rhangela ntlawa wa lixaka la vana va Naftali a ku li Ahira+ n’wana wa Enani. 28 Vayisrayele ni mintlawa ya vona a va suka hi ndlela yoleyo.+

29 Kutani Moxe a byela Obabi n’wana wa Reweli*+ wa le Midiyani, papayi wa nsati wa Moxe a ku: “Hi ya ka ndhawu leyi Yehovha a nga hi byela a ku: ‘Ni ta mi nyika yona.’+ Famba na hina,+ hi ta ku khoma kahle hikusa Yehovha a tshembise Vayisrayele swilo swaswinene.”+ 30 Kambe yena a ku: “A ni nge fambi na n’wina. Ni ta tlhelela ka tiko la mina ni ka maxaka ya mina.” 31 Se Moxe a ku: “Ni kombela swaku u nga hi siyi, hikusa u ku tiva kahle lomu hi faneleke hi gwimba kona matende amananga, u nga hi komba ndlela. 32 Naswona loko wo famba na hina,+ hinkwaswu swaswinene leswi Yehovha a nga ta hi nyika swona, hi ta pambulelana na wena.”

33 Se va suka ka ntshava ya Yehovha+ va famba ku ringana masiku manharhu, na areka+ ya ntwananu wa Yehovha yi rhwaliwile phambheni ka vona masiku manharhu, anze va ya kuma ndhawu ya ku humula ka yona.+ 34 Rhefu la Yehovha+ a li li henhla ka vona ninhlikanhi loko va suka lomu a va gwimbe kona matende.

35 Nkama ni nkama loko Areka yi suka, Moxe a a ku: “Humelela Yehovha+ Xikwembu xa mina, u hangalasa valala va wena, lava ku nyenyaka a va baleke phambheni ka wena.” 36 Kutani loko yi fika lomu a va ya kona, a a ku: “Vuya, Yehovha, ka vanhu va wena va Israyele lava kalaka va nga konteki hi ku tala ka vona.”+