Estere

3 Hi ku famba ka nkama, Hosi Asuwerusi a tlakusa Hamani+ n’wana wa Amedata wa Muagagi,+ a mu yendla wamukulu ka varhangeli lavan’wani hinkwavu lava a va li na yena.+ 2 Vatirhi hinkwavu va hosi lava a va li ka nyanghwa wa hosi, a va korhama va tlhela va khizama phambheni ka Hamani hikusa hosi a yi rhumise swaku ku yendliwa swoleswo ka yena. Kambe Mordekayi a a yala ku korhama kumbe ku khizama. 3 Kutani vatirhi va hosi lava a va li ka nyanghwa va vutisa Mordekayi va ku: “Hi mhaka muni u nga wu yingisi nawu wa hosi?” 4 Siku ni siku a va tshamela ku mu vutisa swoleswo, kambe a a nga na mhaka na vona. Se va byela Hamani leswaku va twa swaku a ta ku yini hi leswi a swi yendliwa hi Mordekayi;+ hikusa a a va byele leswaku yena i Muyuda.+

5 Nkama Hamani a nga vona leswaku Mordekayi wa yala ku korhama ni ku khizama phambheni ka yena, a kwata hintamu.+ 6 Kambe a vone swaku a swi nga li swa nchumu ku dlaya Mordekayi ntsena, hikusa a va mu byelile hi ta vanhu va ka Mordekayi. Kutani Hamani a sungula ku lava ndlela ya ku helisa Vayuda hinkwavu lava a va li ka mfumu wa Asuwerusi, vanhu hinkwavu va ka Mordekayi.

7 Hi wheti ya ku sungula, ku nga wheti ya Nisani,* hi lembe la wu 12+ la ku fuma ka Hosi Asuwerusi, ku hoxiwe Puru,+ (ku nga tinhlolo) phambheni ka Hamani swaku ku tiviwa siku ni wheti, kutani Puru yi wela ka wheti ya wu 12, ku nga Adara.*+ 8 Kutani Hamani a byela Hosi Asuwerusi a ku: “Ku ni vanhu van’wani lava nga hangalakela xikarhi ka vanhu+ lava nga ka maprovhinsiya hinkwawu ya mfumu wa wena,+ lava minawu ya vona yi nga hambana ni ya vanhu lavan’wani hinkwavu; naswona a va yi yingisi minawu ya hosi, a swi fanelanga swaku hosi yi va tshika. 9 Loko hosi yi swi vona swi li swinene, a ku tsaliwe nawu wa leswaku va helisiwa. Ni ta hakela vatirheli va mfumu 10.000 wa titalenta* ta prata swaku va ti peta ka xuma xa hosi.”*

10 Kutani hosi yi susa aneli ya ku karimbara hi yona,+ yi nyika Hamani+ n’wana wa Amedata wa Muagagi,+ lweyi a a li nala wa Vayuda. 11 Hosi yi byela Hamani yi ku: “Prata ni vanhu swi le mavokweni ya wena, yendla leswi u swi lavaka.” 12 Kutani hi diya 13 ka wheti ya ku sungula, ku vitaniwe vasekretariyu* va hosi.+ Se va tsala+ hinkwaswu leswi Hamani a nga va rhuma swona va tsalela varhangeli va hosi, vagovhernadori va maprovhinsiya hinkwawu ni varhangeli va vanhu hinkwavu. Provhinsiya lin’wani ni lin’wani li tsaleliwe karta hi lirimi ni matsalelo ya lona. Makarta lawa a ma tsaliwe hi vito la Hosi Asuwerusi ma tlhela ma lemiwa hi aneli ya yona ya ku karimbara.+

13 Ku rhumiwe vanhu swaku va yisa makarta ka maprovhinsiya hinkwawu ya hosi, na ma tsaliwe nawu wa leswaku ku dlayiwa ku tlhela ku helisiwa Vayuda hinkwavu, madjaha, vamadala, vana ni vavasati, va helisiwa hi siku lin’we, hi diya 13 ka wheti ya wu 12, ku nga wheti ya Adara,+ ku tlhela ku tekiwa ni minchumu ya vona.+ 14 Provhinsiya lin’wani ni lin’wani a li fanele li nyikiwa papela la nawu lowu swaku vanhu hinkwavu va swi tiva va tlhela va lunghekela siku leli. 15 Vanhu lava nga rhumiwa va yo vhela va huma hi ku kahlula+ hi ku landza leswi va nga rhumiwa hi hosi. Nawu lowu a wu ta hi ka yindlo ya wuhosi aXuxani.*+ Se hosi na Hamani va tshama hansi va tinwela, kuve ka doropa la Xuxani a ku ni mpfilumpfilu.