Esaya
5 Ni kombela ku yimbelelela murhandziwa wa mina
Lisimu leli vulavulaka hi yena ni nsimu ya yena ya mawuvha.+
Murhandziwa wanga a a ni nsimu ya mawuvha ya ku nona atlhelweni ka ganga.
2 A yi rimile a susa ni maribye.
A gama a byala mawuvha ya ku pshuka yamanene,
A yaka ni prediyu* xikarhi ka yona,
A yendla ndhawu ya ku kamela ka yona mawuvha.+
Se a nyimela swaku nsimu yi psala mawuvha,
Kambe yi psale mawuvha ya ku kala ma nga nandziki.+
3 “Kutani swoswi, n’wina lava tshamaka Yerusalema na n’wina vanhu va Yuda,
Ni kombela mi yavanyisa xikarhi ka mina ni nsimu ya mina ya mawuvha.+
4 I ntxini xin’wani lexi a ni fanele ni xi yendlile ka nsimu ya mina ya mawuvha
Lexi ni kalaka ni nga xi yendlanga ke?+
Hi mhaka muni yi humese mawuvha ya ku kala ma nga nandziki,
Kuve mina a ni nyimele swaku yi psala mawuvha yamanene?
5 Swoswi, nyimani ni mi byela
Leswi ni nga ta swi yendla ka nsimu ya mina ya mawuvha:
Ni ta susa leswi yi nga pfaliwa hi swona matlhelweni,
Kutani swi hisiwa.+
Ni ta diliza muru wa yona,
Wu gama wu kandziheteliwa.
6 Ni ta yi yendla ndhawu ya ku kala yi nga ha pfuni nchumu;+
A yi nge he kapariwi* kumbe ku hlakuliwa.
Ku ta mila minsinya ya mimintwa ni nhova,+
Funtshi ni ta byela marhefu swaku ma nga ha nisi mpfula henhla ka yona.+
7 Hikusa nsimu ya mawuvha ya Yehovha murhangeli wa tintsumi i ndjangu wa Israyele;+
Vanhu va le Yuda i swilo leswi nga byaliwa leswi a a swi rhandza.
A a nyimele swaku ku va ni wululami,+
Kambe a va yavanyisa hi ndlela ya ku biha;
A a nyimele swaku ku va ni ku lulama,
Kambe a ku ni swirilo.”+
8 Khombo ka lava tekaka tiyindlo ta tinyingi+
Va tlhela va teka ni masimu ya manyingi+
Ku za ku nga ha sali ndhawu
Va gama va tshama voxe atikweni!
9 Yehovha murhangeli wa tintsumi a fungile ka mina
Swaku hambileswi ku nga ni tiyindlo ta tinyingi tatikulu ti tlhela ti saseka,
Ti ta sala na ti wonhekile ti tlhela ti nyenyentsa,
A ku nge he tshami munhu.+
10 Hikusa nsimu yayikulu* ya mawuvha yi ta humesa 22 wa malitru* ya vhinyu ntsena,
Ni mbewu ya kolomuyani ka 160 wa makilu* yi ta humesa kolomuyani ka 16 wa makilu* ntsena.+
11 Khombo ka lava baka mpundzu swinene leswaku va nwa byala,+
Lava tshamaka anze li pela va za va dakwa hi vhinyu!
12 Ka mafexta ya vona ku ni tiharipa ni switende,*
Swingomana, maflawuta* ni vhinyu;
Kambe a va na mhaka ni mintirho ya Yehovha,
Naswona a va yi voni mintirho ya yena.
13 Se vanhu va mina va ta ya wukaraweni
Hi mhaka ya ku pfumala wutivi;+
Vanhu va vona lava nga ni ndhuma va ta fa hi ndlala,+
Kuve lavan’wani hinkwavu va ta fa hi torha.
14 Hi mhaka ya leswo, Sirha* li yanamile
Funtshi li pfulekile hintamu;+
Se vanhu va ku hlonipheka va doropa la Yerusalema ni vanhu va lona lava nga ni mpfilumpfilu, ni lava hambaka mafexta ya maguwa
Va ta gamela kona.
15 Naswona vanhu va ta xixiwa,
Va ta danisiwa,
Lava tikhuzaka va ta danisiwa.
16 Yehovha murhangeli wa tintsumi a ta tlakusiwa hi mhaka ya wuyavanyisi la yena;
Xikwembu xa ntiyiso, Mukwetsimi,+ a ta tikwetsimisa hi wululami la yena.+
17 Swinyempfani swi ta dla na swi chunsekile ingi hi loko swi li ka ndhawu ya swona ya ku dlela ka yona;
Vanhu va tiko lin’wani va ta dla ka tindhawu leti nga tshikiwa lomu swifuyu swa ku nona a swi dlela kona.
18 Khombo ka lava kokakokaka nandzu wa vona hi magoda ya wukanganyisi
Ni xidjoho xa vona hi magoda ya nyolo;*
19 Lava va nge: “A swi yendleke hi ku hantlisa leswi a swi hlayaka;
A swi yendleke hi ku hantlisa leswaku hi ta swi vona.
20 Khombo ka lava hlayaka swaku swaswinene swi bihile ni swa ku biha i swinene,+
Lava nge munyama i ku vonakala se ku vonakala va ku i munyama,
Lava nge swa ku bava swa tsokotsa kambe swa ku tsokotsa va ku swa bava!
21 Khombo ka lava tivonaka na va tlharihile
Ni ku titshemba hintamu!+
22 Khombo ka lava rhandzaka ku nwa vhinyu,
Ni lava va swi kotaka kahle ku patsela mabyala,+
23 Lava kalaka va nga nyiki nandzu munhu wa ku biha hileswi va nga xaviwa+
Va yavanyisa munhu wamunene hi ndlela ya ku biha!+
24 Hi mhaka ya leswo, ku fana ni leswi ndzilu wu hisaka tinhlanga
Ni byanyi la ku woma li hisiwaka hi ndzilu,
Timintsu ta vona ti ta bola
Funtshi swiluva swa vona swi ta hangalaka ku fana ni wuthulu,
Hikusa va tshike nawu wa Yehovha murhangeli wa tintsumi,
Naswona a va li hloniphanga rito la Mukwetsimi wa Israyele.+
25 Hi leswo swi yendlaka Yehovha a kwatela vanhu va yena,
A ta va heta va ku jii hi voko la yena.+
Tintshava ti ta tsekatseka,
Ni mintsumbu ya vona yi ta fana ni chaka aswitaratwini.+
Wa ha va kwatelile, hi mhaka ya hinkwaswu leswo,
Funtshi wa ha tinyimisele ku va khatisa.
26 A tirhise marka swaku a vitana tiko la le kule;+
A va bele noti na va li kule hintamu;+
Txuvukani! Va ta hi ku kahlula.+
27 A nga kona lweyi a nga karhala kumbe a nga pharhiyeteka xikarhi ka vona.
A nga kona lweyi a khudzihelaka kumbe ku yetlela.
Mabandhi ya vona ma bohiwe ma tiya,
Funtshi tingoti ta masandaliya ya vona a ti tsemekanga.
28 Mimpaxwa* ya vona hinkwayu yi lotiwile,
Tigubu ta vona hinkwatu ti lunghekile.
Maxondzo ya makavhalu ya vona ma tiye ku fana ni ribye,
Maroda ya vona ma fana ni xidzedze.+
29 Va bonga ku fana ni nghonyama;
Va bonga ku fana ni swinghonyamani.+
Va ta mpfhumpfha mpfhumpfha va khoma xiharhi
Va ta famba na xona funtshi a ku na munhu ni mun’we lweyi a nga ta xi lamulela.
30 Hi siku lolelo va ta xi bongela
Ku fana ni lwandle loko li bonga.+
Lweyi a nga ta txuvuka tiko a ta vona munyama ni ku karhateka;
Hambi ku vonakala na ku txintxe ku va munyama hi mhaka ya marhefu.+