Samuwele Wa Ku Sungula

5 Nkama Vafilista va nga teka Areka+ ya Xikwembu xa ntiyiso, va yi suse Ebenezeri va yi yisa aAxidodi. 2 Se Vafilista va teke Areka ya Xikwembu xa ntiyiso va yi yisa ka tempele ya xikwembu xa vona Dagoni,* va yi nyimisa tlhelweni ka xifaniso xa Dagoni.+ 3 Hi mundzuku ka kona, nkama Vaaxidodi va nga pfuka nimixo, xifaniso xa Dagoni a xi wile phambheni ka Areka ya Yehovha+ na xi txuvuke hansi. Va gama va xi tlakula va xi tlhelisa lomu a xi nyime kona.+ 4 Hi mundzuku ka kona nkama va nga pfuka nimixo, xifaniso xa Dagoni a xi tlhele xi wa phambheni ka Areka ya Yehovha na xi txuvuke hansi. Nhloko ya xona ni mavoko ya xona a swi tsemekile funtshi a swi li lee ka nyanghwa wa tempele. A ku yo sala ntsena tlhelo leli a li fana ni hlampfi.* 5 Hi leswo swi nga yendla swaku anze namuntlha vaprista va Dagoni ni hinkwavu lava nghenaka ka tempele ya Dagoni va nga ha psanyi ka nyanghwa wa tempele ya Dagoni aAxidodi.

6 Se Yehovha a khatisa Vaaxidodi, a va hlupha hi ku yendla swaku vona ni lava tshamaka ka tindhawu ta le kusuhi va biwa hi mavabyi ya ku pfimba hala ndzhaku.+ 7 A nkama vavanuna va Axidodi va nga vona leswi a swi yendleka, va te: “Susani Areka ya Xikwembu xa Israyele lani ka hina hikusa xa hi khatisa, hina ni xikwembu xa hina Dagoni.” 8 Kutani va rhuma vanhu swaku va ya vitana tihosi hinkwatu ta Vafilista, va gama va ti vutisa va ku: “Hi fanele hi yendla yini hi Areka ya Xikwembu xa Israyele?” Se tona ti hlamula ti ku: “Areka ya Xikwembu xa Israyele a yi yisiwi Gati.”+ Kutani va vhela va teka Areka ya Xikwembu xa Israyele va yi yisa aGati.

9 Loko se va yi yise Gati, Yehovha a khatisa vanhu lava a va tshama ka doropa lolelo, a yendla swaku va chava hintamu. A yendle swaku vavanuna hinkwavu lava tshamaka ka doropa, ku sukela ka wamutsongo ku ya ka wamukulu, va biwa hi mavabyi ya ku pfimba hala ndzhaku.+ 10 Kutani va teka Areka ya Xikwembu xa ntiyiso va yi yisa aEkroni,+ kambe a nkama yi nga ku swee aEkroni, Vaekroni va sungula ku rila va tlhela va ba tinyandha va ku: “Va hi tisele Areka ya Xikwembu xa Israyele swaku va ta hi dlaya hina ni vanhu va hina!”+ 11 Se va vitana tihosi hinkwatu ta Vafilista, va gama va ti byela va ku: “Tshikani Areka ya Xikwembu xa Israyele yi famba; yi tlheliseni ka ndhawu ya yona swaku hina ni vanhu va hina hi nga dlayiwi.” Va hlaye leswo hikusa vanhu hinkwavu va doropa leliyani a va chava ku fa; phela Xikwembu xa ntiyiso a xi va khatisa hintamu.+ 12 Lava kalaka va nga fanga va biwe hi mavabyi ya ku pfimba hala ndzhaku. Vanhu hinkwavu lava tshamaka ka doropa va rila swinene va kombela ku pfuniwa swi za swi fika ni le tilweni.