Karta La Yuda
1 Mina Yuda, mutirheli wa Yesu Kreste tlhelo makwavu wa Yakobe,+ ni tsalela n’wina lava nga vitaniwa,+ lava rhandziwaka hi Xikwembu Papayi naswona mi nga vekiwa swaku mi ta va xikan’we na Yesu Kreste:+
2 Ni khongelela swaku Xikwembu xi mi yengetela timpsalu, ku rhula ni lirhandzu.
3 Vamakwerhu lava rhandzekaka, hambileswi a ni lava ku mi tsalela leswaku ni mi byela hi ta ku ponisiwa loku hi nga na kona hinkwerhu,+ ni vona swi fanelile ku mi tsalela kuva ni mi tiyisa, swaku mi lwa hi matimba mi lwela lipfumelo la n’wina+ leli vakwetsimi va nga nyikiwa lona kan’we swi helela kolanu. 4 Lexi zaka xi yendla ni mi tsalela hi leswaku ku ni vanhu lava nga nghena hi ku ngungumela xikarhi ka n’wina, lava nga yavanyisiwa khale hi Matsalwa; lavo i vanhu lava kalaka va nga xi hloniphi Xikwembu, lava tirhisaka timpsalu tatikulu ta Xikwembu swaku va va ni mahanyelo ya tingana*+ naswona a va tshembekanga ka n’winyi* tlhelo Hosi ya hina, Yesu Kreste.+
5 Hambileswi mi swi tivaka kahle swilo leswi hinkwaswu, ni lava ku mi khumbukisa swaku hambileswi Yehovha* a nga ponisa vanhu ka tiko la Gibita,+ hi ku famba ka nkama a helise lava kalaka va nga kombisanga lipfumelo.+ 6 Kasi tintsumi leti nga tshika ndhawu ya tona ti tlhela ti suka kaya ka tona tilweni,*+ a ti bohe hi machini ya ku tiya a ti hoxa ka munyama wawukulu anze ku fika siku lalikulu la wuyavanyisi.+ 7 Swi ve tanu hi Sodoma na Gomora ni madoropa lawa a ma li kusuhi na wona, vanhu va kona a va tinyiketele swinene ka wuntunga la swa masangu* la ku chavisa swinene. A va yendla ku navela ka nyama+ ka ku kala ku nga li ka ntumbuluku, va khatisiwile hi masiku ni masiku hi ndzilu naswona i xikombiso xa ku hi basopisa.+
8 Hambileswi va tivaka swilo leswi, vavanuna volavo va tshamela ku pimisa swilo swa ku biha, va yendla swilo leswi chakisaka muzimbha, va delela lava fumaka va tlhela va vulavula ku biha hi vakwetsimi.+ 9 Kambe loko Mikayele+ ntsumi yayikulu+ na Davulosi va holovile va tlhela va kanetana hi ntsumbu wa Moxe,+ Mikayele a nga ringisanga ku mu yavanyisa ni ku mu rhuketela,+ kambe a te: “Yehovha* a a ku yavanyisi.”+ 10 Kambe vanhu lava va vulavula ku biha hi swilo leswi va kalaka va nga swi twisisi.+ Va fana ni swiharhi leswi kalaka swi nga pimisi naswona va yendla swilo hinkwaswu ku fana ni swiharhi.+ Swilo leswo hi swona swi va yendlaka va ya ku helisiweni.
11 Khombo ka vona, hikusa va landzele ndlela ya Khayini,+ va tsutsumele ku tekelela mintirho ya ku biha ya Balamu+ hi ku lava tshomba, va helisiwile hi mhaka ya ku delela+ ku fana na Kora!+ 12 Vavanuna lava va ni nghozi ku fana ni maribye lama nga tumbela hansi ka mati.+ Loko mi dla na vona ka mafexta lawa mi ma yendlelaka ku komba vamakwenu lirhandzu, i varisi lava tiphamelaka na va pimisa hi makhwirhi ya vona ntsena;+ i marhefu ya ku kala ma nga na mpfula lama yisiwaka hala ni hala hi moya;+ i minsinya leyi kalaka yi nga psali mihandzu loko ku hela wuxika, leyi nga woma swinene* yi tlhela yi tsuvuliwa; 13 i magandlati ya lwandle lama kwataka, lama humesaka handle mintirho ya wona leyi danisaka,+ naswona i tinyeleti leti kalaka ndlela; va ta pfaleliwa ka munyama wawukulu hi masiku ni masiku.+
14 Enoki+ lweyi a a li wa wu 7 loko hi konta ku sukela ka Adamu, na yena a profete hi vanhu lava a ku: “Vonani! Yehovha* wa ta ni tintsumi ta yena ta tinyingi,+ 15 ku ta yavanyisa ni ku khatisa hinkwavu+ lava kalaka va nga xi hloniphi Xikwembu hi mhaka ya mintirho ya vona hinkwayu ya ku biha, leyi va nga yi yendla hi xidelelo ni swilo hinkwaswu swa ku chavisa leswi vadjohi lava va nga swi vula hi xona.”+
16 Vanhu lava va rhandza ku ngurangura,+ a va tsaki hi leswi va nga na swona, va landzela ku navela ka vona ka ku biha,+ va tibuma ni ku khuzela van’wani* swaku va pfuneka.+
17 Vamakwerhu lava rhandzekaka, khumbukani marito lama nga tshama ma vuliwa* hi vapostolo va Hosi ya hina Yesu Kreste, 18 lava a va tolovela ku mi byela va ku: “Ka minkama ya wugamu, ku ta humelela lava nga ta solasola swilo leswi nga swinene, va yendla swilo swa ku kala swi nga tsakisi Xikwembu hi ku landza ku navela ka vona.”+ 19 Lava hi vona va vangaka ku yavana.+ Va tshame ingaku i swiharhi naswona a va na moya wa Xikwembu. 20 Kambe n’wina vamakwerhu va ku rhandzeka, tiyisani* lipfumelo la n’wina la ku kwetsima swinene, mi khongela hi moya wa ku kwetsima,+ 21 leswaku mi tama mi rhandziwa hi Xikwembu,+ na ma ha nyimela timpsalu ta Hosi ya hina Yesu Kreste leti nga ta yendla swaku hi kuma wutomi la ku kala li nga heli.+ 22 Naswona, mi nga tshiki ku va ni timpsalu+ ka lava kanakanaka;+ 23 va poniseni+ hi ku va phula ndzilweni. Kambe mi nga tshiki ku komba van’wani timpsalu, mi swi yendla na mi tivonela, mi nyenya hambi mpahla leyi nga chakisiwa hi mintirho ya vona ya ku biha.+
24 Naswona Xikwembu lexi kotaka ku mi vhikela swaku mi nga weli ka xidjoho ni lexi yendlaka swaku mi nyima ka ndhawu ya xona ya ku kwetsima* na mi basile+ naswona na mi tsakile, 25 lexi nga xona ntsena Muponisi wa hina hi ku tirhisa Yesu Kreste Hosi ya hina: Ku dzuneka, wukulu, matimba ni wuhosi leli ku sukela khale ka khaleni xi nga na lona naswona xi nga ta tama xi va na lona hi masiku ni masiku, a swi ve swa xona. Amen.