Tikronika Ta Ku Sungula
15 Kutani a tama a tiyakela tiyindlo ka Doropa la Davhida, a lulamisa ndhawu ya Areka ya Xikwembu xa ntiyiso a tlhela a gwimba tende la yona.+ 2 Ku ve hi nkama wolowo Davhida a nga ku: “A nga kona lweyi a faneleke a tlakula Areka ya Xikwembu xa ntiyiso loko ku nga li Valevhi, hikusa hi vona lava Yehovha a nga va langa swaku va tlakula Areka ya yena Yehovha ni ku mu tirhela nkama hinkwawu.”+ 3 Se Davhida a hlengeleta Vayisrayele hinkwavu aYerusalema swaku va tisa Areka ya Yehovha ka ndhawu leyi a a yi lunghiselele yona.+
4 Davhida a hlengeleta vatukulu va Aroni+ ni Valevhi:+ 5 Ka Vakohata, a ku na Uriyeli lweyi a a li murhangeli ni 120 wa vamakwavu va yena; 6 ka Vamerari, a ku na Asaya+ lweyi a a li murhangeli ni 220 wa vamakwavu va yena; 7 ka Vajerixomu, a ku na Yuwele+ lweyi a a li murhangeli ni 130 wa vamakwavu va yena; 8 ka vatukulu va Elizafani,+ a ku na Xemaya lweyi a a li murhangeli ni 200 wa vamakwavu va yena; 9 ka vatukulu va Hebroni, a ku na Eliyeli lweyi a a li murhangeli ni 80 wa vamakwavu va yena; 10 ka vatukulu va Uziyeli,+ a ku na Aminadabi lweyi a a li murhangeli ni 112 wa vamakwavu va yena. 11 Se Davhida a vitana muprista Zadoki+ na muprista Abiyatari,+ Uriyeli, Asaya, Yuwele, Xemaya, Eliyeli na Aminadabi lava a va li Valevhi, 12 a gama a va byela a ku: “N’wina mi varhangeli va mindjangu ya Valevhi. Tibasiseni, n’wina ni vamakwenu, mi tisa Areka ya Yehovha Xikwembu xa Israyele ka ndhawu leyi ni nga yi lulamisela yona. 13 Leswi mi kalaka mi nga yi tlakulanga ku sunguleni,+ Yehovha Xikwembu xa hina a hi kwatelile,+ hikusa a hi swi yendlanga hi ku ya hi leswi a a swi lavisa xiswona.”+ 14 Se vaprista ni Valevhi va tibasisa swaku va tlakula Areka ya Yehovha, Xikwembu xa Israyele.
15 Kutani Valevhi va tlakula Areka ya Xikwembu xa ntiyiso hi makatla ya vona na va tirhisa tinhonga ta ku tlakula hi tona,+ hi ku ya hi leswi Yehovha a nga swi byela Moxe. 16 Se Davhida a byela varhangeli va Valevhi swaku va langa vamakwavu va vona lava va yimbelelaka, swaku va ta yimbelela hi ku tsaka na va chaya swa ku chaya hi swona ku nga switende, tiharipa+ ni swa ku chaya hi swona swa nsimbi swa ku fana ni maparatu.*+
17 Kutani Valevhi va langa Hemani+ n’wana wa Yuwele, ka vamakwavu va vona va lange Azafi+ n’wana wa Berekiya kasi ka va ka Merari ku nga vamakwavu va vona va lange Ethani+ n’wana wa Kuxaya. 18 Ka ntlawa wa wumbirhi+ a va ni vamakwavu va vona ku nga Zakariya, Beni, Yaziyeli, Xemiramoti, Yehiyele, Uni, Eliyabi, Benaya, Mazeya, Matitiya, Elifelewu, Mikineya na Obede-Edomu na Yeyiyele lava a va li vavoneleli va tinyanghwa. 19 Hemani,+ Azafi+ na Ethani lava a va li vayimbeleli a va fanele va chaya swa ku chaya hi swona swa ku fana ni maparatu swa ku yendliwa hi kobre;+ 20 Zakariya, Aziyeli, Xemiramoti, Yehiyele, Uni, Eliyabi, Mazeya na Benaya a va chaya switende leswi a va swi lulamiselile swaku swi chayela henhla;*+ 21 kasi Matitiya,+ Elifelewu, Mikineya, Obede-Edomu, Yeyiyele na Azaziya a va chaya tiharipa leti a ti lulamiseliwile ku chayela hansi*+ funtshi hi vona a va rhangela. 22 Kenaniya+ murhangeli wa Valevhi a a vonelela ntirho wa ku tlakuliwa ka Areka hikusa a a wu tiva kahle ntirho lowu; 23 Berekiya na Elkana a va vonelela Areka. 24 Xebaniya, Yoxafati, Nataneli, Amasayi, Zakariya, Benaya na Eliyezere a va li vaprista lava a va chaya timhalamhala* phambheni ka Areka ya Xikwembu xa ntiyiso+ funtshi Obede-Edomu na Yeyiya na vona a va vonelela nyanghwa wa Areka.
25 Davhida ni madoda ya Israyele ni lava a va rhangela mintlawa ya 1.000 wa masonchwa va fambe xikan’we akaya ka Obede-Edomu+ na va tsakile+ swaku va ya teka areka ya ntwananu wa Yehovha. 26 Loko Xikwembu xa ntiyiso se xi pfune Valevhi lava a va tlakula areka ya ntwananu wa Yehovha, va yendle gandzelo hi 7 wa swihon’wani ni 7 wa tinyempfu.+ 27 Davhida ni Valevhi hinkwavu lava a va tlakule Areka ni vayimbeleli, na Kenaniya lweyi a a rhangela lava a va yimbelela ni lava a va tlakule Areka, a va yambale mpahla ya ku pfumala mavoko* ya ku yendliwa hi panu ya ku vevuka. Davhida a a yambale efodi* ya ku yendliwa hi panu.+ 28 Vayisrayele hinkwavu a va tisa areka ya ntwananu wa Yehovha na va kulungela hi ku tsaka,+ va tlhela va chaya limhondzo, timhalamhala,+ switende, tiharipa+ ni swa ku chaya hi swona swa nsimbi swa ku fana ni maparatu.
29 A nkama areka ya ntwananu wa Yehovha yi nga fika ka Doropa la Davhida,+ Mikala n’wana wa Sawulo,+ a hlometela hi ka janela a gama a vona Hosi Davhida na a txina hi ku tsaka a kulungela; se a sungula ku mu delela ka mbilu ya yena.+