Mahungu Ya Ku Tsakisa Ya Ku Tsaliwa Hi Yohani

12 Na ka ha chota 6 wa masiku swaku Paxkwa li fika, Yesu a fika Betaniya lomu Lazaru,+ lweyi Yesu a nga mu pfuxa ku feni, a a tshama kona. 2 Kutani va mu swekela jantari. Marta hi yena a a va phamela+ naswona Lazaru a a li mun’we wa lava a va dla na Yesu. 3 Se Mariya a teka mafurha ya ku durha swinene ya ku nun’hwela, lawa ma nga yendliwa hi nardu yayinene, lawa a ma ringana meyu litru,* kutani a tota minenge ya Yesu a gama a yi womisa hi misisi ya yena. Yindlo hinkwayu yi nun’hwela hi mafurha.+ 4 Kambe Yudasi Skariyota,+ mun’wani wa vadjondzisiwa va yena lweyi a a li kusuhi ni ku mu xavisa a ku: 5 “Hi mhaka muni mafurha lawa ya ku nun’hwela ma nga xavisiwanga hi 300 wa tidenari,* kutani ti nyikiwa swisiwana?” 6 Phela a a nga vuli leswo hileswi a a ni mhaka ni swisiwana, kambe hileswi a a li muyivi. Hi yena a a tamela kaxa la male naswona a a tshamela ku yiva male leyi a yi petiwa ka lona. 7 Se Yesu a ku: “Mu tshikeni wansati lweyi, hikusa leswi a nga swi yendla, a swi yendlela ku lunghiselela siku leli ni nga ta lahliwa hi lona.+ 8 Hikusa swisiwana mi ta tshama na mi li na swona nkama hinkwawu,+ kambe mina a mi nga ta va na mina nkama hinkwawu.”+

9 Kutani Vayuda va vanyingi va twa swaku Yesu a le Betaniya, se va ya, kambe a va nga yeli yena ntsena, a va yela ni ku ya vona Lazaru, lweyi a nga mu pfuxa ku feni.+ 10 Se vaprista vavakulu va yendla maplanu* ya ku dlaya na Lazaru, 11 hikusa Vayuda vanyingi lava a va ta hi Betaniya a va sungula ku va ni lipfumelo ka Yesu hi mhaka ya Lazaru.+

12 Hi mundzuku ka kona, vanhu lava nga ya fexteni aYerusalema va twe swaku Yesu a a li ku teni. 13 Se va teka matluka ya minsinya ya mintxindzu* va huma swaku va ya mu tlhangaveta, va sungula ku huwelela va ku: “Ha ku khongela, mu ponisi! A katekile lweyi a taka hi vito la Yehovha,+ Hosi ya Israyele!”+ 14 Kutani nkama Yesu a nga kuma ximbongolwani, a famba hi xona+ hi ku ya hi leswi swi nga tsaliwa: 15 “U nga chavi wena Siyoni.* Phela Hosi ya wena ya ta, na yi li ka ximbongolwani.”+ 16 Vadjondzisiwa va Yesu a va yi twisisanga mhaka leyi ku sunguleni, kambe nkama Yesu a nga tlakusiwa,+ va khumbuke swaku leswi nga mu humelela, hi leswi a ku tsaliwile swaku swi ta mu humelela.+

17 Vanhu lava a va li na yena loko a byela Lazaru swaku a huma sirheni+ va tame va byela van’wani leswi nga humelela.+ 18 Leswi hi swona swi nga yendla swaku vanhu va ya mu tlhangaveta, hikusa a va twe swaku a yendle singita leli. 19 Se Vafarisi va byelana va ku: “Ma swi vona swaku a ha ha sizi nchumu. Vanhu hinkwavu va mu landzela.”+

20 A ku ni Vagriki ka lava nga ya ku gandzeleni afexteni. 21 Kutani va ya ka Filipi,+ lweyi a a li wa doropa la Betisayida, leli a li li Galileya, va mu kombela va ku: “Hi lava ku vona Yesu.” 22 Filipi a ya byela Andre. Se Andre na Filipi va ya byela Yesu.

23 Kambe Yesu a va hlamula a ku: “Nkama wu fikile wa leswaku N’wana wa munhu a tlakusiwa.+ 24 Ni mi byela ntiyiso: Loko mbewu ya trigu yi nga weli misaveni yi fa, yi ta tshama yi li mbewu yin’we; kambe loko yi fa,+ hi kona yi psalaka mihandzu ya yinyingi. 25 Lweyi a rhandzaka wutomi la yena wa li helisa kambe lweyi a nga tinyimisela ku luzekeliwa hi lona*+ ka misava leyi, a ta kuma wutomi la ku kala li nga heli.+ 26 Loko munhu a lava ku ni tirhela, a a ni landzeli naswona lomu ni nga kona na yena a ta va kona.+ Loko munhu a ni tirhela, Papayi a ta mu katekisa. 27 Ni karhatekile+ kambe ni ta ku yini? Papayi, ni ponisi ka nkama lowu wa ku karhata.+ Kambe hi swoleswi ni nga tela swona. 28 Papayi, dzunisa vito la wena.” Se ku twakala rito+ leli taka hi le tilweni li ku: “Ni li dzunisile naswona ni ta tlhela ni li dzunisa.”+

29 Vanhu lava a va nyime kolanu va twe rito kutani va vula swaku tilo li dzindzile. Kasi van’wani va ku: “Ntsumi yi vulavule na yena.” 30 Se Yesu a ku: “Rito leli li twalile hi mhaka ya n’wina, ku nga li hi mhaka ya mina. 31 Swoswi misava leyi ya yavanyisiwa; kutani lweyi a fumaka misava leyi+ a ta hlongoliwa.+ 32 Kambe loko ni ta va ni tlakuliwile ni suka misaveni,+ ni ta koka vanhu va mixaka hinkwayu va ta ka mina.” 33 A vule leswo leswaku a kombisa leswi a a ta fisa xiswona ku nga li khale.+ 34 Se vanhu va ku: “Hi swi twile swaku Nawu wu vula swaku Kreste a ta tshama hi masiku ni masiku.+ Se u lava ku vula yini loko u ku N’wana wa munhu a fanele a tlakuliwa a ya henhla?+ Kasi N’wana wa munhu wa kona i mani ke?” 35 Yesu a ku: “Ku vonakala ku ta va xikarhi ka n’wina hi nkamanyana. Fambani na ku vonakala ka ha li kona leswaku munyama wu nga mi kumi; lweyi a fambaka munyameni a nga ku tivi lomu a yaka kona.+ 36 Loko ma ha li ni ku vonakala, pfumelani ka ku vonakala leswaku mi va vana va ku vonakala.”+

Yesu a vule minchumu leyi a gama a famba a ya tumbela. 37 Hambileswi a nga yendla masingita ya manyingi phambheni ka vona, a va pfumelanga ka yena. 38 Leswo swi hetisise leswi nga vuliwa hi muprofeta Esaya lweyi a nga te: “Yehovha,* i mani lweyi a nga va ni lipfumelo ka swilo leswi a nga swi twa ka hina?+ I mani lweyi a tivaka matimba ya Yehovha* ke?”+ 39 Lexi nga yendla va nga swi kholwi hileswi Esaya a nga tlhela a ku: 40 “A va pfale matihlo a tlhela a tlanyalisa timbilu ta vona swaku va nga ha voni, va nga twisisi ka timbilu ta vona akuva va tisola leswaku ni va hanyisa.”+ 41 Esaya a vule minchumu leyi hikusa a vone xitshamu xa Kreste xa ku tlakuka, kutani a vulavula hi yena.+ 42 Vanhu va ku tala hambi ku li varhangeli va ve ni lipfumelo ka yena+ kambe a va nga swi vuli phambheni ka vanhu hi mhaka ya leswi a va chava ku hlongoliwa ka sinagoga*+ hi Vafarisi; 43 hikusa a va rhandza ku yamukeliwa hi vanhu ku tlula ku yamukeliwa hi Xikwembu.+

44 Kambe Yesu a tlakusa rito a ku: “Lweyi a pfumelaka ka mina a pfumela ni ka lweyi a nga ni rhuma;+ 45 naswona lweyi a ni vonaka a vona ni Lweyi a nga ni rhuma.+ 46 Ni tile ku fana ni ku vonakala misaveni+ leswaku lweyi a pfumelaka ka mina a nga tshami ka munyama.+ 47 Se loko munhu a twa marito ya mina kambe a nga ma yingisi, a ni mu yavanyisi hikusa a ni telanga ku ta yavanyisa misava kambe ni tele ku ta yi ponisa.+ 48 A kona lweyi a nga ta yavanyisa lweyi a ni yalaka a tlhela a nga ma yamukeli marito ya mina. Rito leli ni nga li vula hi lona li nga ta mu yavanyisa hi siku la wugamu. 49 Hikusa leswi ni nga swi vula a no swi sukela kambe Papayi lweyi a nga ni rhuma a ni byelile leswi ni nga ta swi vula ni leswi ni nga ta swi djondzisa.+ 50 Na swi tiva swaku leswi a nga ni byela swona swi vula wutomi la ku kala li nga heli.+ Hi mhaka leyo, ni swi vulisa leswi Papayi a nga ni byelisa swona.”+