Mahungu Ya Ku Tsakisa Ya Ku Tsaliwa Hi Marka

14 A ku sale masiku mambirhi+ swaku ku va ni Paxkwa+ ni Fexta la Mapawu ya Ku Kala Fermentu.*+ Naswona vaprista vavakulu ni vatsali a va lava ndlela ya ku rhiya ntlhamu wa ku ya khoma Yesu leswaku va ta mu dlaya;+ 2 hikusa a va ku: “Hi nga mu khomeni fexteni; vanhu va nga tshuka va pfuxa mpfilumpfilu.”

3 Na Yesu a ha li Betaniya na a li ku dleni kaya ka Simoni lweyi a nga tshama a va ni mavabyi ya nhlokonho,* ku ta wansati lweyi a a ni xibolhelani* xa alabaxtru lexi a xi ni mafurha ya ku nun’hwela, lama nga yendliwa hi nardu yayinene,* ya ku durha. Se a xi pfula kutani a sungula ku ma chela ka nhloko ya Yesu.+ 4 Loko van’wani va vona leswi, a swi va tsakisanga, se va ku: “Hi mhaka muni a tlanga hi mafurha lawa ya ku nun’hwela? 5 Hikusa mafurha lawa a ma ta xavisiwa hi male ya ku tlula 300 wa tidenari* se male ya kona yi nyikiwa swisiwana!” Se va mu kwatela ngopfu* wansati lweyi. 6 Kambe Yesu a ku: “Mu tshikeni wansati lweyi. Kasi mi mu karhatela yini? A ni yendlele swaswinene.+ 7 Hikusa swisiwana mi ta tshama na mi li na swona nkama hinkwawu,+ naswona mi nga swi yendlela swaswinene hi nkama lowu mi wu lavaka, kambe mina a mi nga ta va na mina nkama hinkwawu.+ 8 Wansati lweyi a yendle leswi a swi kotaka; a tote muzimbha wa mina hi mafurha ya ku nun’hwela leswaku a wu lunghiselela na ni nge se lahliwa.+ 9 Ni mi byela ntiyiso: Amisaveni hinkwayu, hinkwaku lomu mahungu ya ku tsakisa ma nga ta chumayeliwa kona,+ leswi wansati lweyi a nga swi yendla swi ta vuliwa leswaku a khumbukiwa hi swona.”+

10 Kutani Yudasi Skariyota mun’wani wa lava 12, a ya ka vaprista vavakulu leswaku a ya mu xavisa ka vona.+ 11 Nkama va nga twa leswo, va tsaka va tlhela va mu tshembisa ku mu nyika male ya prata.+ Kutani a sungula ku lavetela nkama wa ku xavisa Yesu.

12 Hi siku la ku sungula la Fexta la Mapawu ya Ku Kala Fermentu,+ leli hi ntolovelo a va yendla gandzelo la Paxkwa+ hi lona, vadjondzisiwa va ku: “U lava hi ya lunghiselela kwini leswaku u ya dlela kona Paxkwa?”+ 13 Se a rhuma vadjondzisiwa va yena vambirhi a ku: “Fambani doropeni, kutani mi ta tlhangana ni wanuna lweyi a nga rhwala khuwani la mati. Mu landzeni,+ 14 naswona lomu a nga ta nghena kona, byelani n’winyi wa munti mi ku: ‘Mudjondzisi a li: “Li kwini sala la vayendzi leli ni nga ta dlela ka lona Paxkwa ni vadjondzisiwa va mina?”’ 15 A ta mi komba sala lalikulu leli nga henhla, li nga ni swilo hinkwaswu leswi lavekaka. Lunghiselelani Paxkwa kolanu.” 16 Se vadjondzisiwa va famba, va ya fika doropeni, kutani swilo swi yendlekisa leswi a nga va byelisa xiswona, se va lunghiselela Paxkwa.

17 Nkama li nga pela, a te ni lava 12.+ 18 Na va ha tshame mezeni funtshi na va dla, Yesu a ku: “Ni mi byela ntiyiso: Mun’we ka n’wina lweyi a dlaka na mina a ta ni xavisa.”+ 19 Kutani va sungula ku karhateka hintamu, se va sungula ku mu vutisa hi mun’we hi mun’we va ku: “Indjhe a hi mina?” 20 A va hlamula a ku: “I mun’we ka n’wina va 12, lweyi a petaka voko na mina ka tijela.+ 21 Hikusa N’wana wa munhu wa famba, hi ku ya hi leswi Matsalwa ma nga swi hlaya hi yena, kambe khombo ka munhu lweyi a xavisaka N’wana wa munhu!+ A swi ta yampsa hintamu loko munhu wa kona a a nga psaliwanga.”*+

22 Na va ha li ku dleni, a teke pawu a khensa, a li khema a gama a va nyika lona, a ku: “Tekani; pawu leli li fanekisela muzimbha wa mina.”+ 23 A tlhela a teka kopo, se loko a khensile, a va nyika yona, kutani hinkwavu va nwa hi yona.+ 24 A va byela a ku: “Vhinyu leli li fanekisela ‘ngati ya mina+ ya ntwananu,’+ leyi nga ta halatiwa swaku ku pfuneka vanhu va ku tala.+ 25 Ni mi byela ntiyiso: A ni nge he tlheli ni nwa vhinyu, anze ku fika siku leli ni nga ta nwa la nyuwani ka Mfumu wa Xikwembu.” 26 Hi wugamu, va yimbelele tinsimu ta ku dzunisa* Xikwembu va gama va huma va ya ka Ntshava ya Mawolivhera.+

27 Se Yesu a ku: “N’wina hinkwenu mi ta ni baleka,* hikusa ku tsaliwile: ‘Ni ta ba murisi,+ kutani tinyempfu ti ta hangalaka.’+ 28 Kambe nkama ni nga ta pfuxiwa, ni ta ya Galileya mi ta ya ni kuma kona.”+ 29 Kambe Pedru a ku: “Hambiloko hinkwavu vo ku baleka, mina a ni nge ku baleki.”*+ 30 Yesu a ku: “Ni ku byela ntiyiso: Ka wusiku la namuntlha, na nkuku wu nge se yimba kambirhi u ta ni yala kanharhu.”+ 31 Kambe a tlhela a gima hansi a ku: “Hambi swo lava swaku ni fa na wena, a ni nge tshuki ni ku yalile.” Ni lavan’wani hinkwavu va sungula ku vula swoleswo.+

32 Kutani va fika ka ndhawu leyi vitaniwaka Getsemani, a gama a ku: “Tshamani lani, na ha ya khongela.”+ 33 A teke Pedru, Yakobe na Yohani a famba na vona,+ kutani a sungula ku xukuvala a tlhela a karhateka swinene. 34 A ku: “Ni tlhaveke mbilu swinene,+ lakakuva ni lava ni ku fa. Salani kola, mi nga yetleleni, tamani mi rindza.”+ 35 A ya kulenyana a fika a khizama a sungula ku khongela a vula swaku loko swi koteka, nkama lowuyani wu fambela kule na yena. 36 A ku: “Abba,* Papayi,+ swilo hinkwaswu swa koteka ka wena; susa kopo leyi ka mina. Kambe ku nga yendleki ku rhandza ka mina, a ku yendleke ku rhandza ka wena.”+ 37 Kutani a tlhela, a ya va kuma na va yetlelile a byela Pedru a ku: “Simoni, wo yetlela? A wu gwentanga ku tikhoma u nga yetleli ku ringana wora lin’we?+ 38 Mi nga yetleli, tamani mi khongela swaku mi nga weli ndzingweni.+ Mbilu ya swi lava kambe muzimbha lowu nga ni xidjoho a wu tiyanga.”+ 39 Kutani a tlhela a ya khongela, a fika a vula marito ya ku fana.+ 40 Nkama a nga vuya a tlhela a va kuma na va yetlelile, hikusa a va peziwa hi wurhongo, hi mhaka leyo a va nga swi tivi swaku va ta hlamula yini. 41 A tlhela a ta ka wunharhu a ku: “Mo yetlela mi tlhela mi humula ka nkama lowu wa ku tika swinene? Tshikani ku yetlela! Nkama se wu fikile!+ Phela N’wana wa munhu wa nyikeliwa* ka mavoko ya vadjohi. 42 Pfukani, a hi fambeni. Lweyi a nga ni xavisa a le kusuhi.”+

43 Hi xihantla na Yesu a ha khuluma, ku fika Yudasi, mun’we wa lava 12, ni xitshungu na xi ni swipada ni tinhonga; a xi rhumiwe hi vaprista vavakulu, vatsali ni madoda.+ 44 Yudasi a a va byele leswi a a ta va kombisa xiswona Yesu, a ku: “Lweyi ni nga ta mu bejara,* hi yena; mu khomeni mi famba na yena na a voneleliwa swaku a nga baleki.” 45 Se a ya ka Yesu a mu tshinelela a ku: “Rabi!” kutani a mu bejara. 46 Se va mu khoma va ya mu pfalela. 47 Kambe mun’wani wa lava a va nyime kolanu a humesa xipada xa yena, a hlasela xitirhi xa muprista wamukulu a xi tsema ndleve.+ 48 Yesu a ku: “No va xigevenga ke, mi zaka mi ni tela ni swipada ni tinhonga leswaku mi ta ni khoma?+ 49 Siku ni siku a ni tshama na n’wina tempeleni ni djondzisa,+ kambe a mi ni khomanga. Kambe leswi swi fanele swi yendleka leswaku ku ta hetiseka Matsalwa.”+

50 Kutani hinkwavu va baleka va mu siya.+ 51 Kambe djaha lin’wani leli a li bohe nguvu ntsena li mu landzelela, se va zama ku li khoma, 52 kambe li pshetemuka li siya nguvu ya lona li tsutsuma na li nga yambalanga nchumu.*

53 Kutani va teka Yesu va mu yisa ka muprista wamukulu,+ se vaprista vavakulu hinkwavu ni madoda ni vatsali va hlengeletana kolanu.+ 54 Kambe Pedru a mu landzelela na a li kulenyana anze va fika ka kintari* wa munti wa muprista wamukulu; a fika a tshama ni vatirhi lava vonelelaka munti a worha ndzilu na vona.+ 55 Vaprista vavakulu ni Tribunali Lalikulu la Vayuda* a va lavetela vanhu lava a va ta vula mavunhwa hi Yesu swaku va mu dlaya, kambe a va kumanga nchumu.+ 56 Phela va ku tala a va mu lumbeta hi ku vula wufakazi la mavunhwa,+ kambe wufakazi la vona a li nga twanani. 57 A ku ni van’wani lava a va mu lumbeta hi ku vula wufakazi la mavunhwa va ku: 58 “Hi mu twe a ku: ‘Ni ta diliza tempele leyi ya ku yakiwa hi mavoko, kutani hi masiku manharhu ni ta yaka yin’wani leyi kalaka yi nga yakiwanga hi mavoko.’”+ 59 Kambe wufakazi la vona a li nga twanani.

60 Kutani muprista wamukulu a sekeleka a nyima xikarhi ka vona, a vutisa Yesu a ku: “U li yini hi leswi va swi vulaka? A wu swi twi leswi va ku lumbetaka hi swona?”+ 61 Kambe Yesu a miyela a nga mu hlamuli nchumu.+ Muprista wamukulu a tlhela a mu vutisa a ku: “Hi wena Kreste N’wana wa Xikwembu xa Ku Kwetsima?” 62 Se Yesu a hlamula a ku: “Ina; naswona mi ta vona N’wana wa munhu+ na a tshame ka voko la xinene+ la Xikwembu xa matimba naswona na a ta hi marhefu ya tilo.”+ 63 Kutani muprista wamukulu a handzula mpahla ya yena a ku: “Se ha ha ti lavela yini timboni tin’wani?+ 64 Mi mu twile loko a rhuketela Xikwembu. Mi li yini hi swona?” Hinkwavu va pfumelelana swaku a faneliwa hi lifu.+ 65 Kutani van’wani va sungula ku mu pshitela marhi+ naswona va mu pfala nghohe* va mu ba hi swibakela va ku: “Profeta ka!” Varindzi va le tribunali va mu ba timpama va gama va mu teka.+

66 Na Pedru a ha tshame ka kintari wa munti, ku fika mutirhi mun’wani wa xisati wa muprista wamukulu.+ 67 Loko a vona Pedru a li ku worheni ka ndzilu, a mu txuvukisisa a ku: “Na wena a wu li na Yesu wa le Nazareta.” 68 Kambe a yala a ku: “A ni mu tivi, ni ku swi twisisa a ni swi twisisi leswi u swi vulaka,” se a huma a ya nyanghweni. 69 Loko a li nyanghweni, a tlhela a voniwa hi mutirhi lwiya wa xisati kutani a byela lava a va nyime kusuhi na yena a ku: “Lweyi i mun’wani wa vona.” 70 Pedru a tlhela a yala. Loko ku hundze nkamanyana, lava a va nyime kolanu va byela Pedru va ku: “Vhela u mun’wani wa vona, hikusa u Mugalileya.” 71 Kambe a sungula ku funga a tlhela a chikicha a ku: “A ni mu tivi munhu lweyi mi vulavulaka hi yena!” 72 Hi nkama wolowo, nkuku wu yimba ka wumbirhi,+ kutani Pedru a khumbuka marito lawa Yesu a nga mu byela wona lama nge: “Na nkuku wu nge se yimba kambirhi, u ta ni yala kanharhu.”+ Kutani a hela ntamu, a sungula ku rila.