Vakorinto Va Ku Sungula

7 Loko ku li timhaka leti mi nga ni tsalela tona, ni nga ku: Swa yampsa wanuna a nga mu khumbi* wansati; 2 kambe leswi ku nga tala wuntunga la swa masangu,* wanuna mun’wani ni mun’wani a a ve ni nsati wa yena+ ni wansati mun’wani ni mun’wani a a ve ni nuna wa yena.+ 3 Wanuna a a nyiki nsati wa yena timfanelo ta yena;* na yena wansati a a yendli swa ku fana ka nuna wa yena.+ 4 Wansati a hi yena a mandaka muzimbha wa yena kambe wu mandiwa hi nuna wa yena; na yena wanuna a hi yena a mandaka muzimbha wa yena kambe wu mandiwa hi nsati wa yena. 5 Mi nga tsonani, loko ku nga li swaku mi yo veka nkama lowu mi nga pfumelelana ku yendla leswo hawumbirhi ka n’wina, leswaku mi ta tinyika nkama wa ku khongela kutani mi tlhela mi tlhangana, leswaku Sathana a nga tshameli ku mi ringa hi mhaka ya ku kala mi nga swi koti ku tikhoma. 6 Mi nga swi yendla leswi ni nga swi vula, kambe a hi nawu. 7 A ni navela swaku vanhu hinkwavu va fana na mina. Kambe mun’wani ni mun’wani a ni nyiko ya yena+ leyi a nga nyikiwa hi Xikwembu, hi leswo swi yendlaka van’wani va chada van’wani va nga chadi.

8 Kutani ni byela lava kalaka va nge se chada ni lava nga feliwa hi vavanuna swaku swa yampsa va titshamela voxe ku fana na mina.+ 9 Kambe loko va nga swi koti ku tikhoma, a va chadi hikusa swa yampsa ku chada ku tlula ku hisiwa hi ku navela.+

10 Lava nga chada na va laya, a hi mina kambe i Hosi: Wansati a nga hambani ni nuna wa yena.+ 11 Kambe loko a hambana na yena, a a tshamisi swoleswo a nga chadi kumbe a tlhelelana ni nuna wa yena; na yena wanuna a nga fanelanga a tshika nsati wa yena.+

12 Kambe ka van’wani, a hi Hosi,+ hi mina ni va byelaka leswi: Loko makwerhu a ni nsati lweyi a kalaka a nga li mupfumeli, a nga mu tshiki loko nsati yelweyo a swi lava ku tama a tshama na yena; 13 ni loko wansati a ni nuna lweyi a kalaka a nga li mupfumeli, a nga mu tshiki loko nuna yelweyo a swi lava ku tama a tshama na yena. 14 Hikusa wanuna lweyi a kalaka a nga li mupfumeli a kwetsimisiwa hi mhaka ya nsati wa yena, ni wansati lweyi a kalaka a nga li mupfumeli a kwetsimisiwa hi mhaka ya nuna wa yena lweyi a nga mupfumeli. Loko a swi nga li leswo, vana va n’wina a va ta va va nga basanga, kambe swoswi va kwetsima. 15 Kambe loko lweyi a kalaka a nga li mupfumeli a lava ku mu tshika* a a mu tshiki; ka xiyimu xa ku tshamisa xileswi, lweyi* a nga mupfumeli a nga boheki ku mu sindzisa swaku a nga mu tshiki, kambe Xikwembu xi mi vitanele ku rhuleni.+ 16 Hikusa wena wansati u swi tivisa ku yini swaku devhi u ta ponisa nuna wa wena ke?+ Kumbe wena wanuna u swi tivisa ku yini swaku devhi u ta ponisa nsati wa wena ke?

17 Kambe mun’wani ni mun’wani a a hanyisi leswi Yehovha* a nga mu nyikisa swona ni ku fambisa leswi Xikwembu xi nga mu vitanisa xiswona.+ Nawu lowu ni wu nyika mabandla hinkwawu. 18 Ku ni munhu lweyi a nga vitaniwa na se a tsemile nsuvu?*+ A a tshamisi swoleswo. Ku ni munhu lweyi a nga vitaniwa na a nga tsemanga? A swi bohi swaku a tsema.+ 19 Ku tsema ni ku kala u nga tsemanga nsuvu a hi swa nchumu;+ leswi nga swa lisima i ku yingisa minawu ya Xikwembu.+ 20 Mun’wani ni mun’wani a a tshami ka xiyimu lexi a nga vitaniwa na a li ka xona.+ 21 A wu li xikarawa nkama u nga vitaniwa? U nga karhateki hi swona;+ kambe loko u tshuka u kuma ndlela ya ku va u chunseka, yi londzoli. 22 Hikusa mun’wani ni mun’wani lweyi a nga vitaniwa ku va wa Hosi na a li xikarawa, a chunsekile ka Hosi.+ Swi hi ku fana ni ka lweyi a nga vitaniwa na a chunsekile, i xikarawa xa Kreste. 23 Mi xaviwe hi presu;*+ tshikani ku va swikarawa swa vanhu. 24 Vamakwerhu, munhu mun’wani ni mun’wani a a tshami ka xiyimu lexi a nga vitaniwa na a li ka xona phambheni ka Xikwembu.

25 Loko swi ta ka lava kalaka va nge se chada* a ni na nawu lowu taka hi ka Hosi, kambe ni vula mavonelo ya mina.+ Kambe leswi Hosi yi nga ni komba timpsalu, mi nga swi tshemba leswi ni swi vulaka. 26 Kutani ni pimisa swaku i swinene kuva munhu a tshamisa swoleswo hikusa hi hanya ka minkama ya ku karhata. 27 Se u ni nsati? U nga mu tshiki.+ A wu na nsati? U nga mu laveteli. 28 Kambe loko u chada, a wo djoha. Naswona loko munhu lweyi a kalaka a nge se famba masangu a chada, a ngo djoha. Kambe lava chadaka va ta va ni swikarhatu awuton’wini.* Mina no zama ku mi vhikela ka swona.

29 Vamakwerhu, ni tlhela ni mi byela ni ku: Nkama lowu nga sala i wutsongo.+ Ku sukela swoswi, lava nga chada a va yendli ingaku a va chadanga, 30 lava rilaka a va yendli ingaku a va rili, lava nga tsaka a va yendli ingaku a va tsakanga, lava xavaka a va yendli ingaku a va na nchumu 31 ni lava tirhisaka misava leyi va nga yi tirhisi ngopfu; hikusa xiyimu xa misava leyi xa txintxa. 32 Phela ni lava swaku mi nga karhateki. Wanuna lweyi a kalaka a nga chadanga a karhateka hi swilo swa Hosi, hileswi a nga swi yendlaka swaku a yi tsakisa. 33 Kambe wanuna lweyi a nga chada a karhateka hi swilo swa misava,+ hileswi a nga swi yendlaka swaku a tsakisa nsati wa yena, 34 kutani a kokiwa a ya hala ni hala. Naswona wansati lweyi a kalaka a nga chadanga, kumbe ntombhi,* a karhateka hi swilo swa Hosi+ leswaku a kwetsima ka muzimbha ni ka mimpimiso ya yena. Kambe wansati lweyi a nga chada a karhateka hi swilo swa misava, hileswi a nga swi yendlaka swaku a tsakisa nuna wa yena. 35 Leswi ni swi vulela ku mi pfuna, ku nga li ku mi pfalela.* Kambe ni mi byela swaku mi ta kota ku yendla leswi faneleke ni ku tirhela Hosi nkama hinkwawu na mi nga tsopetisiwi hi nchumu.

36 Kambe loko munhu lweyi a kalaka a nga chadanga a nga swi koti ku tikhoma ka ndlela leyi a navelaka hi yona swa masangu naswona ntanga se yi fanela,* a fanele a yendla leswi: A a yendli leswi a swi rhandzaka: A a chadi, a hi xidjoho.+ 37 Kambe loko munhu a boha ka mbilu ya yena naswona a swi vona swi nga sindzisi ku chada, a tlhela a swi kota ku tikhoma ka ku navela ka yena, naswona a boha ka mbilu ya yena swaku a ta tshama na a nga chadanga, a yendla kahle.+ 38 Ni lweyi a chadaka a yendla kahle, kambe lweyi a tshamaka na a nga chadanga, a yendla kahle hintamu.+

39 Wansati a bohiwile ka nuna wa yena loko nuna wa yena a ha hanya.+ Kambe loko nuna wa yena a fa, a chunsekile, a nga chada ni lweyi a mu lavaka, kambe aHosini ntsena.+ 40 Kambe hi mavonelo ya mina, wa tsaka hintamu loko a tshamisa swoleswo. Phela na kholwa swaku na mina ni na wona moya wa ku kwetsima wa Xikwembu.