Vakorinto Va Wumbirhi

12 Ni ta tibuma, hambiloko swi nga pfuni nchumu. Ni ta vulavula hi leswi Hosi yi nga ni komba swona*+ ni leswi yi nga ni byela swona.+ 2 Ni tiva munhu lweyi a nga mudjondzisiwa wa Kreste, lweyi ka 14 wa malembe lama nga hundza a nga yisiwa ka tilo la wunharhu, kambe swaku i wa muzimbha wa ku tshamisa ku yini mina a ni swi tivi, swi tiviwa hi Xikwembu. 3 Na mu tiva munhu wa kona, kambe swaku a a ni muzimbha wa ku tshamisa ku yini a ni swi tivi, swi tiviwa hi Xikwembu. 4 A yisiwe ka paradesi kutani a twa marito ya ku a ma fanelanga ma vuliwa ni ya ku a ku na munhu lweyi a pfumeleliwaka ku ma vula. 5 Ni ta tibuma hi munhu yelweyo; a ni nge tibumi hi mina n’winyi, kambe ni ta tibuma hi leswi swi ni hetaka ntamu.* 6 A ni nga ta va xiphunta hambi a no tibuma hikusa a ni ta va na ni vulavula ntiyiso. Kambe a ni swi yendli leswo, leswaku ku nga tshuki ku va ni munhu lweyi a ni khuzelaka hintamu ku tlula leswi a swi vonaka ka mina kumbe leswi a swi twaka ka mina, 7 hi mhaka ya leswi ni nga kombiwa minchumu ya ku hlamalisa.

Leswaku ni nga titlakusi hintamu, ni nyikiwe muntwa ka muzimbha,+ lowu fanaka ni ntsumi ya Sathana, leswaku yi tshamela ku ni fumbutela,* leswaku ni nga tibyeli hintamu. 8 Ni kombele Hosi kanharhu swaku yi ni susa muntwa lowu. 9 Kambe yi te: “Ta xega timpsalu ta mina tatikulu ka wena, hikusa matimba ya mina ma ya ma kula ngopfu nkama lowu u helaka ntamu.”*+ Se ni ta tibuma na ni tsakile hi leswi ni hetaka ntamu,* leswaku matimba ya Kreste ma ta va henhla ka mina ku fana ni tende. 10 Kutani na tsaka loko ni hela ntamu, loko ni rhuketeliwa, loko ni pfumala, loko ni hluphiwa ni loko swilo swi ni tikela hi mhaka ya Kreste. Hikusa loko ni nga na ntamu, hi kona ni nga ni matimba.+

11 Ni ve xiphunta. Hi n’wina mi nga ni sindzisa swaku ni va xiphunta hikusa a mi ni khensanga hi minchumu yayinene leyi ni nga yi yendla. Hambiloko ni nga li wa nchumu,+ a va ni pali hi nchumu vapostolo va n’wina lava tivulaka vapostolo vavakulu. 12 Phela ni mi kombile wufakazi la leswaku ni mupostolo hi ku tiyisela hintamu,+ hi ku yendla masingita, swilo swa ku hlamalisa ni mintirho ya matimba.+ 13 Lexi nga yendla swaku mi va vatsongo ka mabandla laman’wani, hileswi ni kalaka ni nga mi rhwexanga ndzhwalu wa ku va mi ni hlayisa.+ Se ni kombela mi ni rivalela xihoxo lexi.

14 Vonani! Se i ka wunharhu na ni lunghekele ku mi tela naswona a ni nga ta va ndzhwalu ka n’wina. Hikusa a ni lavi minchumu ya n’wina+ kambe ni lava n’wina; phela vana+ a hi vona va faneleke va hlayisela vapsali va vona tshomba, kambe i vapsali lava faneleke va hlayisela tshomba vana va vona. 15 Ni ta nyikela minchumu ya mina hinkwayu ni wutomi la mina na ni tsakile hintamu hi mhaka ya n’wina.+ Loko mina ni mi rhandza ngopfu, se mina ni fanele ni rhandziwa katsongo ke? 16 A ni zanga ni va ndzhwalu ka n’wina.+ Kambe mi li: A yendle “maplanu”* swaku a hi phasa “hi ku kanganyisa” ka yena. 17 A ni xololanga munhu hi ku tirhisa lava ni nga va rhuma ka n’wina, no hemba ke? 18 Ni khongotele Tito swaku a ta ka n’wina; ni mu rhume ni makwerhu mun’wani, kambe Tito a nga mi xololanga, a hi swona ke?+ Hi yendla swilo hi ndlela ya ku fana, a hi swona ke? Hi fambe hi ndlela yin’we, a hi swona ke?

19 Nkama hinkwawu lowu, a mi pimisa swaku hi zama ku tinyimelela ka n’wina ke? Phela hi vadjondzisiwa va Kreste naswona Xikwembu xa swi tiva swaku hi vulavula ntiyiso. Kambe varhandziwa, hinkwaswu leswi hi swi yendlaka hi swi yendlela ku mi tiyisa. 20 Hikusa na chava swaku loko ni ta ka n’wina ni nga tshuka ni ta mi kuma na mi nga tshamisanga xileswi a ni navela ku mi kumisa xiswona, kumbe na mina ni nga ha tshamisanga xileswi a mi navela ku ni vonisa xiswona. Kambe ni nga tshuka ni ta kuma ku holova, wukwele, ku kwata ngopfu, ku kanetana, ku rhuketelana, ku hlevana, ku tibyela ni nyakanyaka xikarhi ka n’wina. 21 Kumbe loko ni tlhela ni ta koseno, swi nga ha yendleka Xikwembu xa mina xi ni danisa phambheni ka n’wina, naswona ni nga ha boheka ku rila hi mhaka ya vanhu va vanyingi lava nga tshama va djoha kambe va nga tilayi ka chaka la vona, ka wuntunga la swa masangu,* ni ka mahanyelo ya vona ya tingana.*