Mahungu Ya Ku Tsakisa Ya Ku Tsaliwa Hi Matewu

25 “Mfumu wa matilo wu nga fanisiwa ni 10 wa tintombhi* leti nga teka mimotso* ya tona,+ ti famba ti ya tlhangana ni muteki.*+ 2 A 5 wa tona a ti li swiphunta, kuve letin’wani ta 5 a ti tlharihile.+ 3 Leti ta swiphunta ti teke mimotso ya tona kambe ti siya mafurha, 4 kuve leti ta ku tlhariha ti teke mimotso ya tona ni mabolhela ya mafurha. 5 Se leswi muteki a a hlwela, hinkwavu va khudzihelile va gama va yetlela. 6 Xikarhi ka wusiku ku twala rito leli a li ku: ‘Hi lweyi muteki! Humani mi ya mu tlhangaveta.’ 7 Kutani tintombhi hinkwatu ti pfuka ti lulamisa mimotso ya tona.+ 8 Leti ta ku phunta ti byela leti ta ku tlhariha ti ku: ‘Hi cheleleni mafurhanyana, hikusa mimotso ya hina yi lava ku timeka.’ 9 Tintombhi ta ku tlhariha ti hlamula ti ku: ‘Loko ho mi nyika, a ma nge hi yeneli hinkwerhu. Fambani mi ya xava ya n’wina ka vaxavisi.’ 10 Nkama na ta ha yi ku xaveni, muteki a sala a fika. Tintombhi leti a ti tilunghiselile ti nghena na yena ka fexta la muchadu+ kutani xipfalu xi pfaliwa. 11 Se tintombhi letin’wani ti gama ti vuya ti fika ti ku: ‘Hosi, Hosi, hi pfuleli!’+ 12 A ti hlamula a ku: ‘Ni mi byela ntiyiso, a ni mi tivi.’

13 “Hi mhaka leyo, tshamani na mi pfule matihlo+ hikusa siku a mi li tivi, na wona nkama a mi wu tivi.+

14 “Leswi swi fana ni munhu lweyi a lavaka ku yendza, lweyi a vitanaka vatirhi va yena a va siyela minchumu ya yena.+ 15 Kutani mun’we a mu nyika 5 wa titalenta,* mun’wani a mu nyika timbirhi, kasi lwemun’wani a mu nyika talenta yin’we; a nyike mun’wani ni mun’wani hi ku ya hi makotela ya yena a gama a yendza. 16 Lweyi a nga nyikiwa 5 wa titalenta a hantla a famba a ya hamba negosiyu,* kutani a kuma 5 wa titalenta tin’wani. 17 Na yena lweyi a nga nyikiwa titalenta timbirhi, a ya hamba negosiyu a kuma titalenta tin’wani timbirhi. 18 Kambe lweyi a nga nyikiwa talenta yin’we, a ya yi txelela, a fihla male* ya n’winyi wa yena.

19 “Loko se ku hundze nkama wa ku leha, n’winyi wa vatirhi a vuya swaku a ta vona leswi va nga swi yendla hi male ya yena.+ 20 Lweyi a nga nyikiwa 5 wa titalenta, a ta na a khome tin’wani ta 5 a ku: ‘Hosi ya mina, u ni siyele 5 wa titalenta; vona, ni yendle negosiyu ni kuma 5 wa titalenta tin’wani.’+ 21 N’winyi wa yena a ku: ‘U yendle kahle mutirhi wamunene ni wa ku tshembeka! U tshembekile ka swilo swaswitsongo. Ni ta ku nyika swa swinyingi kuva u swi hlayisa.+ Tsaka ni n’winyi wa wena.’+ 22 Ku gama ku ta lweyi a nga nyikiwa titalenta timbirhi a ku: ‘Hosi ya mina, u ni siyele titalenta timbirhi; vona, ni yendle negosiyu ni kuma titalenta tin’wani timbirhi.’+ 23 N’winyi wa yena a ku: ‘U yendle kahle mutirhi wamunene ni wa ku tshembeka! U tshembekile ka swilo swaswitsongo. Ni ta ku nyika swa swinyingi swaku u swi hlayisa. Tsaka na mina.’

24 “Hi wugamu, ku ta lweyi a nga nyikiwa talenta yin’we a ku: ‘Hosi ya mina, na swi tiva swaku u munhu wa ku karhata; u tshovela lomu u kalaka u nga byalanga kona naswona u hlengeleta swakudla swa ku kala u nga swi tirhelanga.+ 25 Kutani ni chavile ni gama ni famba ni ya txelela talenta ya wena. Hi leswi, teka swa wena.’ 26 N’winyi wa yena a mu hlamula a ku: ‘Mutirhi wa ku biha ni wa wulolo, a wu swi tiva a hi swona ke, swaku ni tshovela lomu ni kalaka ni nga byalanga kona naswona ni hlengeleta swakudla swa ku kala ni nga swi tirhelanga? 27 Se ina ka, hi mhaka muni u nga vekisanga male* ya mina ka lava va lombisaka male, leswaku loko ni fika ni ta yi kuma ni majuru?*

28 “‘Hi mhaka leyo, mu tekeleni talenta leyi a nga na yona mi yi nyika lweyi a nga ni 10 wa titalenta.+ 29 Hikusa lweyi a nga ni xanchumu, a ta yengeteliwa swin’wani naswona a ta va ni swa ku tala kambe lweyi a kalaka a nga na nchumu, a ta tekeliwa ni lexi a nga na xona.+ 30 Kutani mu txukumeteleni handle ka munyama mutirhi lweyi wa wulolo. Hi lanu a nga ta ba nkosi a tlhela a karhateka.’*

31 “Nkama N’wana wa munhu+ a nga ta ta hi ndlela ya ku hlamalisa na a ni tintsumi ta yena hinkwatu,+ a ta tshama ka xitshamu xa yena xa wuhosi lexi phatimaka. 32 Naswona vanhu va matiko hinkwawu va ta hlengeletiwa ka yena, kutani a ta hambanisa vanhu ku fana ni murisi loko a hambanisa tinyempfu ka timbuti. 33 A ta veka tinyempfu+ ka voko la yena la xinene, kasi timbuti ka la ximatsi.+

34 “Kutani Hosi yi ta byela lava nga ka voko la yona la xinene yi ku: ‘Tanani, n’wina lava nga katekisiwa hi Papayi wa mina; yamukelani Mfumu lowu mi nga lunghiseleliwa wona ku sukela loko misava yi va kona. 35 Hikusa nkama ni nga twa ndlala mi ni nyike swakudla ni nkama ni nga twa torha mi ni nyike mati. A mi nga ni tivi naswona a ni nga na ndhawu ya ku yetlela ka yona kambe mi ni yamukelile kaya ka n’wina;+ 36 a ni nga yambalanga nchumu kutani mi ni yambexile.+ A ni vabya kutani mi ni hlayisile. A ni li djele kutani mi ni pfuxelile.’+ 37 Se lava ku lulama va ta yi hlamula va ku: ‘Hosi, hi ku vone siku muni na u twa ndlala se hi ku phamela, kumbe na u twa torha se hi ku nyika mati ke?+ 38 Hi ku vone siku muni hi nga ku tivi, naswona na u nga na ka ku yetlela kona se hi ku yamukela kaya ka hina ke? Kumbe hi nga ku vona na u nga yambalanga nchumu kutani hi ku yambexa ke? 39 Hi ku vone siku muni na u vabya kumbe na u li djele hi gama hi ta ku pfuxela ke?’ 40 Se Hosi yi ta va hlamula yi ku: ‘Ni mi byela ntiyiso: Xin’wani ni xin’wani lexi mi nga xi yendlela vamakwerhu lava lavatsongo, mi xi yendlele na mina.’+

41 “Kutani yi ta byela lava nga ka voko la yona la ximatsi yi ku: ‘Sukani la ka mina,+ n’wina lava nga rhukiwa, mi ya ka ndzilu wa ku kala wu nga timeki,*+ lowu nga lunghiseleliwa Davulosi ni tintsumi ta yena.+ 42 Hikusa nkama ni nga twa ndlala, a mi ni nyikanga swakudla ni nkama ni nga twa torha, a mi ni nyikanga swa ku nwa. 43 A mi nga ni tivi naswona a ni nga na ka ku yetlela kona kambe a mi ni yamukelanga kaya ka n’wina; a ni nga yambalanga nchumu kambe a mi ni yambexanga; a ni vabya ni tlhela ni va djele kambe a mi ni pfuxelanga.’ 44 Kutani na vona va ta hlamula va ku: ‘Hosi, hi ku vone siku muni na u twa ndlala, na u twa torha, hi nga ku tivi naswona na u nga na ka ku yetlela, u nga yambalanga nchumu, u vabya kumbe na u li djele se hi nga ku pfuni ke?’ 45 Kutani yi ta va hlamula yi ku: ‘Ni mi byela ntiyiso: Xin’wani ni xin’wani lexi mi kalaka mi nga xi yendlanga ka lavatsongo, na mina a mi ni yendlelanga.’+ 46 Kutani lava va ta helisiwa va nga ha li kona,*+ kambe lava ku lulama va ta kuma wutomi la ku kala li nga heli.”+