Varoma

11 Se swoswi na vutisa: Ku nga va swaku Xikwembu xi yo txukumeta tiko la xona ke?+ Ihim! Hikusa hambi mina ni Muyisrayele, n’wana* wa Abrahamu wa lixaka la Benjamini. 2 Xikwembu a xi va txukumetanga vanhu va xona lava xi nga sungula xi va langa.+ A mi swi tivi leswi tsalwa li swi vulaka hi Eliya, loko a rila ka Xikwembu hi mhaka ya Vayisrayele a ku: 3 “Yehovha,* va dlaye vaprofeta va wena, va dilizele ni maaltari ya wena; ku yo sala mina ntsena naswona swoswi va lava ku ni dlaya.”+ 4 Kambe Xikwembu xi mu hlamulise ku yini? Xi te: “Na ha ni 7.000 wa vavanuna lava kalaka va nga khizamanga va gandzela Bali.”+ 5 Swa ha tshamise swoleswo ni namuntlha; va ha li kona lava nga sala+ ka lava nga langiwa hi mhaka ya timpsalu tatikulu. 6 Kambe loko swi ya hi timpsalu tatikulu+ a swa ha yi hi mintirho,+ hikusa loko swi ya hi leswo a timpsalu a ta ha li timpsalu.

7 Se hi ta ku yini? Leswi Vayisrayele a va swi lava hi mbilu hinkwayu a va swi kumanga, kambe swi kumiwe hi lava nga langiwa.+ Lavan’wani va tiwomise tinhloko,+ 8 hilaha tsalwa li vulisaka swona loko li ku: “Xikwembu xi va yendle va fana ni lava nga ka wurhongo lalikulu,+ xi va nyike matihlo ya ku kala ma nga voni ni tindleve ta ku kala ti nga twi ku ta fikela ni namuntlha.”+ 9 Naswona Davhida a li: “Mafexta ya vona* a ma ve ntlhamu swaku va wa kutani va khatisiwa. 10 Matihlo ya vona a ma ve ni munyama leswaku va nga voni, ni minhlana ya vona a yi tshame na yi khotsekile.”+

11 Na yengeta ni vutisa: Ku nga va swaku Vayisrayele va pharhiyetekile va wa swa wugamu? Nikutsongo! Kambe ku wa ka vona ku yendle swaku vanhu vamatiko va ponisiwa. Leswo swi va yendle va va ni wukwele.+ 12 Kutani loko ku wa ka vona ku tisa minkateko misaveni naswona ku pumbeka ka vona ku tisa minkateko ka vanhu vamatiko,+ swi vula swaku minkateko yi ta va yinyingi hintamu loko numeru ya vona yi kula!

13 Swoswi ni vulavula na n’wina vanhu vamatiko. Leswi ni nga mupostolo ka vamatiko,+ ni wu nyika lisima hintamu ntirho lowu ni wu yendlelaka Xikwembu+ 14 leswaku kumbexana ni nga yendla va lixaka la mina va va ni wukwele swaku ni ta ponisa van’wani va vona. 15 Ku txukumetiwa+ ka vona swi pfune vanhu amisaveni swaku va tlhelela ka Xikwembu. Loko swoswi xi tlhela xi va yamukela, swi ta fana ni loko va pfuxiwile ku feni. 16 Loko xiyenge xa ku sungula xa mpupu lexi tekiwaka na xi li mihandzu leyi rhangaka yi wupfa xi kwetsima, mpupu hinkwawu na wona wa kwetsima; naswona loko limintsu li kwetsima na tona tigadja ta kwetsima.

17 Kambe loko tigadja tin’wani ti phatluliwile ku gama ku ya tekiwa wena u nga nsinya wa khwati wa mawolivhera u ta tlhomiwa xikarhi ka leti nga sala u tikhorisa hi mafurha ya limintsu la nsinya wa mawolivhera, 18 u nga pimisi swaku wa yampsa ku tlula tigadja letin’wani. Loko u tshuka u pimisa swaku wa yampsa,+ khumbuka swaku a hi wena u nga rhwala limintsu kambe hi lona li nga ku rhwala. 19 Se u ta ku: “Tigadja ti phatluliwile swaku ku ta tlhomiwa mina.”+ 20 I ntiyiso! Ti phatluliwile hi mhaka ya ku kala ti nga na lipfumelo,+ kambe wena u kona hi mhaka ya lipfumelo.+ U nga tibyeli kambe tivoneli. 21 Hikusa leswi Xikwembu xi kalaka xi nga tshikanga ku phatlula tigadja ta nsinya wa mawolivhera, a xi nga ta tshika wena u nga yo yendla hi ku tlhomiwa. 22 Hi mhaka leyo pimisani hi timpsalu ta Xikwembu+ ni ku khatisa ka xona. Xikwembu xi khatisa lava nga wa kambe+ xi va ni timpsalu ka wena, ntsena loko u tama u yendla swilo leswi nga ta ku yendla u tama u faneliwa hi timpsalu ta xona; loko u nga yendli leswo, na wena u ta tsemiwa. 23 Naswona loko Vayuda va sungula ku va ni lipfumelo, va ta tlhela va tlhomiwa ka nsinya+ hikusa Xikwembu xa swi kota ku swi yendla leswo. 24 Hikusa loko wena u tsemiwile ka nsinya wa mawolivhera wa khwati, se u tlhomiwa ka lowu nga masin’wini, ku nga swilo swaku a swi toloveli ku yendliwa, se swi nga tsandza hi yini swaku a tigadja leti nga ta mawolivhera ya lomu masin’wini ti tlhela ti tlhomiwa ka wona ke?

25 Vamakwerhu, ni lava swaku mi tiva xihundla+ lexi xa ku kwetsima xa Xikwembu leswaku mi nga yendli ingi mi yo tlhariha: Timbilu ta Vayisrayele van’wani ti tlanyalile, swi ta tshamisa swoleswo anze vanhu hinkwavu vamatiko lava nga langiwa va nghena, 26 se hi ndlela leyi tiko hinkwalu la Israyele+ li ta ponisiwa. Hikusa tsalwa li li: “Muponisi a ta huma hi Siyoni,+ a yendla swaku vatukulu va Yakobe va tshika mintirho ya vona ya ku biha. 27 Kutani hi wona ntwananu lowu ni nga ta wu yendla na vona+ loko ni va rivalela swidjoho swa vona.”+ 28 Phela leswi va nga yala mahungu ya ku tsakisa, i valala va Xikwembu leswaku ku pfuneka n’wina. Kambe leswi i nga xona xi nga va langa, xa va rhandza hi mhaka ya vavhovho va vona.+ 29 Hikusa Xikwembu a xi nge tilayi hi tinyiko ta xona kumbe ku tilaya hi lava xi nga va vitana. 30 Hikusa khale a mi nga xi yingisi Xikwembu,+ kambe swoswi mi kombiwe timpsalu+ hi mhaka ya leswi Vayuda va kalaka va nga yingisanga.+ 31 Xikwembu xi mi kombe timpsalu hi mhaka ya leswi Vayuda va kalaka va nga xi yingisanga, se na vona va nga ha kombiwa timpsalu ku fana na n’wina. 32 Hikusa vanhu hinkwavu a va yingisanga+ naswona Xikwembu xi va tshike ka xiyimu xolexo swaku xi ta kombisa timpsalu ka vanhu hinkwavu.+

33 Hi nga vona ku tala* ka minkateko,* wutlharhi ni wutivi la Xikwembu! Wuyavanyisi ni tindlela ta xona a swi koteki ku ti twisisa! 34 Hikusa “i mani lweyi a tivaka mimpimiso ya Yehovha,* kumbe i mani lweyi a nga va mutsundzuxi wa yena ke?”+ 35 Kumbe “i mani lweyi a nga rhanga a mu nyika xanchumu, swaku Yena a fela ku mu tlhelisela ke?”+ 36 Hikusa swilo hinkwaswu i swa yena, swi yendliwe hi yena naswona swi ve kona hi mhaka ya yena. A a dzunisiwi hi masiku ni masiku. Amen.