Mahungu Ya Ku Tsakisa Ya Ku Tsaliwa Hi Yohani
14 “Mi nga karhatekeni.+ Pfumelani ka Xikwembu+ ni ka mina. 2 I tinyingi tindhawu ta ku tshama ka yindlo ya Papayi wa mina. A ni nga ta mi byela leswo kuve i mavunhwa; i ntiyiso hikusa ni ya mi lunghiselela ndhawu koseniyani.+ 3 Ni ta famba ni ya mi lunghisela ndhawu kambe ni ta tlhela ni vuya ni ta mi teka swaku mi ta va na mina kaya, swaku lomu ni nga kona na n’wina mi va kona.+ 4 Ma yi tiva ndlela ya ku ya lomu ni yaka kona.”
5 Se Tomasi+ a ku: “Hosi, a hi ku tivi lomu u yaka kona. Se hi ta yi tivisa ku yini ndlela?”
6 Yesu a ku: “Hi mina ndlela+ ni ntiyiso+ ni wutomi.+ A ku na munhu lweyi a nga yaka ka Papayi loko ku nga li hi mina.+ 7 Loko a mi ni tiva, a mi ta mu tiva ni Papayi wa mina; ku sukela swoswi ma mu tiva naswona mi mu vonile.”+
8 Filipi a ku: “Hosi, hi kombi Papayi, kutani swi ta va swi yenelile ka hina.”
9 Yesu a ku: “Hambileswi se ni nga heta nkama wa ku leha na ni li na n’wina, kasi a wu se ni tiva Filipi? Phela lweyi a nga ni vona a vone na Papayi.+ Se hi mhaka muni u ku: ‘Hi kombi Papayi’ ke? 10 A wu kholwi swaku na twanana na Papayi ni swaku yena wa twanana na mina?+ Leswi ni mi byelaka swona a no swi sukela;+ kambe Papayi lweyi a twananaka na mina hi yena a ni tirhisaka ku yendla mintirho ya yena. 11 Ni tshembeni loko ni ku: Na twanana na Papayi naswona Papayi wa twanana na mina; loko mi nga ni tshembi, kholwani hi mhaka ya mintirho leyi ni nga yi yendla.+ 12 Ni mi byela ntiyiso: Lweyi a pfumelaka ka mina a ta yendla mintirho leyi ni yi yendlaka; naswona a ta yendla mintirho yayikulu ya ku tlula leyi,+ hikusa na famba ni ya ka Papayi.+ 13 Xin’wani ni xin’wani lexi mi xi kombelaka hi vito la mina ni ta xi yendla swaku Papayi a ta dzunisiwa hi mhaka ya N’wana.+ 14 Lexi mi xi kombelaka hi vito la mina ni ta xi yendla.
15 “Loko mi ni rhandza mi ta yingisa minawu ya mina.+ 16 Naswona ni ta kombela Papayi a mi nyika mupfuni* mun’wani swaku a va na n’wina hi masiku ni masiku,+ 17 ku nga moya wa ku kwetsima, lowu paluxaka ntiyiso+ lowu misava yi nga ta kala yi nga wu kumi hikusa a yi wu voni kumbe ku wu tiva.+ N’wina ma wu tiva hikusa mi na wona naswona wu tshama na n’wina. 18 A ni nge mi siyi na mi li swisiwana.* Ni ta tlhela ni vuya ka n’wina.+ 19 Ku nga li khale misava a yi nge he ni voni, kambe n’wina mi ta ni vona,+ hikusa na hanya, na n’wina mi ta hanya. 20 Hi siku lolelo, mi ta swi tiva leswaku na twanana na Papayi, na n’wina ma twanana na mina naswona mina na twanana na n’wina.+ 21 Lweyi a yamukelaka minawu ya mina a tlhela a yi landzela wa ni rhandza. Hi ku fana, lweyi a ni rhandzaka a ta rhandziwa hi Papayi naswona ni ta mu rhandza ni tlhela ni tikombisa ka yena.”
22 Yudasi,+ ku nga li Skariyota a ku: “Hosi, hi mhaka muni u lava ku tikombisa ka hina kambe u nga tikombisi ka misava?”
23 Yesu a mu hlamula a ku: “Loko munhu a ni rhandza, a ta yingisa rito la mina+ naswona a ta rhandziwa hi Papayi, kutani hi ta ta ka yena hi tshama na yena.+ 24 Lweyi a kalaka a nga ni rhandzi a nga ma yingisi marito ya mina. Rito leli mi li twaka a hi la mina kambe i la Papayi lweyi a nga ni rhuma.+
25 “Ni mi byele minchumu leyi na na ha li na n’wina. 26 Kambe mupfuni, ku nga moya wa ku kwetsima, lweyi Papayi a nga ta mi rhumela hi vito la mina, a ta mi djondzisa ni ku mi khumbukisa minchumu hinkwayu leyi ni nga mi byela yona.+ 27 Ni mi siyela ku rhula; ni mi nyika ku rhula ka mina.+ A ni mi nyikisi leswi misava yi mi nyikisaka swona. Mi nga karhatekeni naswona mi nga chaveni. 28 Mi swi twile leswi ni nga mi byela swona loko ni ku: ‘Na famba naswona ni ta vuya ka n’wina.’ Loko a mi ni rhandza a mi ta tsaka hileswi ni yaka ka Papayi, hikusa Papayi i mukulu ka mina.+ 29 Ni mi byele swilo leswi na swi nge se yendleka swaku nkama swi nga ta yendleka mi ta kholwa.+ 30 A ni nge he vulavuli swa swinyingi na n’wina, hikusa lweyi a fumaka misava+ wa ta kambe a nge ni yendli nchumu.+ 31 Ni yendlisa leswi Papayi a nga ni rhumisa swona leswaku misava yi swi tiva swaku na mu rhandza.+ A hi fambeni.