Mintirho Ya Vapostolo
18 Se Pawulo a gama a suka Atena a ya Korinto. 2 Koseniyani a kumane ni Muyuda mun’wani lweyi a vitaniwaka Akila,+ lweyi a nga psaliwa aPonto; Akila ni nsati wa yena Prisila a va ha li ku fika hi le Italiya. Va suke hi mhaka ya leswi Klaudiyu a nga hlongola Vayuda hinkwavu aRoma. Se Pawulo a va yela. 3 Leswi a a ni ntirho wa ku fana ni wa vona wa ku yendla matende, a tshame kaya ka vona a tirha na vona.+ 4 Kambe hi savata yin’wani ni yin’wani+ a a hamba a djondzisa ka sinagoga*+ a tlhela a pfuna Vayuda ni Vagriki swaku va va vapfumeli.
5 Nkama Silasi+ na Timotiya+ va nga fika na va ta hi Makedoniya, Pawulo a tame a chumayela rito la Xikwembu hi ku hiseka, a komba Vayuda swaku Yesu i Kreste.+ 6 Kambe loko se va mu kanetile ni ku mu rhuketela, a dzudza mpahla ya yena+ a ku: “Loko mi fa, mi yo swi lava.+ A na ha na nandzu wa ngati ya n’wina.+ Ku sukela swoswi, ni ta ya chumayela vanhu vamatiko.”+ 7 Nkama va nga suka kolanu, a ye kaya ka Tisiyo Yuxto, wanuna lweyi a a gandzela Xikwembu, lweyi a a tshama kusuhi ni sinagoga. 8 Kambe Krixpu,+ murhangeli wa sinagoga a ve mupfumeli aHosini ni ndjangu wa yena hinkwawu. Naswona Vakorinto va ku tala lava nga swi twa na vona va ve vapfumeli kutani va tsakamisiwa. 9 Se Hosi yi byele Pawulo ka milorho* niwusiku yi ku: “U nga chavi, tama u djondzisa, u nga miyeli 10 hikusa ni na wena+ naswona a ku na munhu lweyi a nga ta ku hlasela ni ku ku vavisa; hikusa na ha ni vanhu va vanyingi ka doropa leli.” 11 Se Pawulo a tshama lembe ni 6 wa tiwheti na a djondzisa rito la Xikwembu kolanu.
12 Nkama lowu Galiyo a a li govhernadori wa le Akaya, Vayuda va twanane ku ya hlasela Pawulo kutani va mu yisa tribunali 13 va fika va ku: “Wanuna lweyi a hlohlotela vanhu swaku va gandzela Xikwembu hi ndlela ya ku hambana ni nawu.” 14 Kambe na Pawulo a ha lava ku vulavula, Galiyo a byele Vayuda a ku: “Loko a ku yo yendliwa xidjoho kumbe ku tshuke ku tluliwa nawu, a ni ta tinyika nkama wa ku mi yingisela. 15 Kambe loko swi ku mi phikizana hi marito, mavito ni timhaka ta ku yelana ni nawu wa n’wina,+ swi lulamiseni hi n’wexe koseno. A ni swi lavi ku va muyavanyisi wa timhaka leto.” 16 A gama a va hlongola tribunali. 17 Kutani Vayuda va khoma Sostene+ murhangeli wa sinagoga, va mu ba atribunali. Kambe Galiyo a nga swi nghenelanga.
18 Loko se a hete masiku ya manyinginyana kolanu, Pawulo a salisile vamakwerhu a gama a khwela boti a ya Siriya na a heleketiwa hi Prisila na Akila. Nkama na a li Kenikreya,+ a a tsemete misisi hikusa a a yendle xitshembiso ka Xikwembu. 19 A fike a va siya aEfeza, a gama a nghena ka sinagoga a pfuna Vayuda ku twisisa Matsalwa.+ 20 Hambileswi va nga mu kombela hi ku phindhaphindha swaku a tshama nkamanyana, a nga pfumelanga, 21 kambe a va salisile a gama a ku: “Ni ta tlhela ni vuya ka n’wina loko Yehovha* a swi lava.” Se a suka Efeza a famba hi boti 22 a ya Khezariya. Kutani a famba* a ya pfuxela bandla. Se a gama a ya Antiyokiya.+
23 A tshame nkamanyana kolanu, a gama a suka a ya ka tindhawu ta ku hambanahambana ta tiko la Galatiya ni la Frijiya+ a ya tiyisa vadjondzisiwa.+
24 Kutani ku fika Muyuda mun’we aEfeza lweyi a vitaniwaka Apolosi,+ a nga psaliwa Alexandriya; wanuna lweyi a a swi kota ku vulavula kahle ka vanhu naswona a a ma tiva kahle Matsalwa. 25 Wanuna lweyi a a djondzisiwe* tindlela ta Yehovha,* naswona a a hiseka hi mhaka ya matimba ya Xikwembu, a a vulavula a tlhela a djondzisa ntiyiso hi Yesu, kambe a a tiva ta ntsakamiso wa Yohani ntsena. 26 A sungula ku vulavula ka sinagoga na a nga chavi nchumu. Nkama Prisila na Akila+ va nga mu twa, va muke na yena va ya mu pfuna hi ku mu tlhamusela tindlela ta Xikwembu swaku a ti twisisa kahle. 27 Naswona, leswi a a lava ku ya Akaya, vamakwavu va le bandleni va tsale karta va kombela swaku vadjondzisiwa va le Akaya va mu yamukela hi mandla mambirhi. Nkama a nga fika Akaya, a pfune lava nga va vapfumeli hi mhaka ya timpsalu tatikulu ta Xikwembu. 28 Na a nga chavi nchumu, a kombe Vayuda swaku leswi a va swi djondzisa swi hoxile, hi ku va komba Matsalwa lama vulaka swaku Yesu i Kreste.+