Vakorinto Va Ku Sungula

1 Hi mina Pawulo, ni nga vitaniwa ku va mupostolo+ wa Kreste Yesu hi ku rhandza ka Xikwembu; ni xikan’we na makwerhu Sostene. 2 Ni tsalela n’wina mi nga ka bandla la Xikwembu leli nga Korinto,+ n’wina lava mi nga langiwa, lava nga kwetsimisiwa swaku va va vadjondzisiwa va Kreste Yesu,+ n’wina lava mi nga vitaniwa swaku mi va vakwetsimi, ni hinkwavu lava vitanaka vito la Hosi ya hina Yesu Kreste+ ka tindhawu hinkwatu, lweyi a nga Hosi ya vona ni ya hina:

3 Timpsalu tatikulu ni ku rhula leswi taka hi ka Xikwembu Papayi wa hina ni le ka Hosi Yesu Kreste a swi ve na n’wina.

4 Ni khensa Xikwembu xa mina masiku hinkwawu hi mhaka ya n’wina. Ni xi khensa hi mhaka ya timpsalu ta xona tatikulu leti mi nga nyikiwa tona hi ku tirhisa Kreste Yesu. 5 Mi nyikiwe swilo swa swinyingi hi mhaka ya leswi mi twananaka na Kreste, ni ku tlhela mi tiva rito la Xikwembu ni ku vulavula kahle hi lona.+ 6 Hikusa mi li tshembile wufakazi leli vulavulaka hi Kreste,+ 7 leswaku mi nga pfumali nyiko ni yin’we loko ma ha nyimela ku humelela ka Hosi ya hina Yesu Kreste+ hi ku rindzela kakukulu. 8 Naswona Xikwembu xi ta mi tiyisa anze ku fika magamu swaku hi siku la Hosi ya hina Yesu Kreste+ mi nga soliwi. 9 Xikwembu lexi nga mi vitana swaku mi tirhisana ni N’wana wa xona Yesu Kreste Hosi ya hina, xa tshembeka.+

10 Kutani na mi khongotela vamakwerhu hi vito la Hosi ya hina Yesu Kreste swaku hinkwenu mi vulavula hi ku twanana ni swaku ku nga tshuki ku va ni ku yavana xikarhi ka n’wina,+ kambe mi twanana hi ku helela ka mimpimiso ya n’wina ni ka mavonelo ya n’wina.+ 11 Hikusa vamakwerhu van’wani va ndjangu wa Klowe va ni byele swaku ku ni ku holovisana xikarhi ka n’wina. 12 Ni vula leswi hikusa mun’wani ni mun’wani wa n’wina a li: “Mina ni wa Pawulo,” mun’wani a ku: “Mina ni wa Apolosi,”+ mun’wanyani a ku: “Mina ni wa Khefasi,”* kasi mun’wani a ku: “Mina ni wa Kreste.” 13 Indjhe Kreste a yavanile? Ku nga va swaku i Pawulo a nga dlayiwa amhandzini hi mhaka ya n’wina ke? Kumbe mi tsakamisiwe hi vito la Pawulo? 14 Na xi khensa Xikwembu leswi ni kalaka ni nga tsakamisanga munhu xikarhi ka n’wina loko a nga li Krixpu+ na Gayo.+ 15 Kutani a ku na lweyi a nga vulaka swaku a tsakamisiwe hi vito la mina. 16 Ina, ni tsakamise ni va ndjangu wa Stefanasi.+ Kasi lavan’wani hinkwavu, a ni khumbuki swaku ku ni lweyi ni nga mu tsakamisa. 17 Hikusa Kreste a nga ni rhumanga ku tsakamisa kambe a ni rhume ku chumayela mahungu ya ku tsakisa,+ na ni nga tirhisi marito ya vanhu va ku djondzeka ngopfu, leswaku mhandzi ya nxaniso* ya Kreste yi nga ha sizi nchumu.

18 Hikusa ku vulavula hi ku fa ka Kreste ka mhandzi ya nxaniso* i wuphunta ka lava nga ta helisiwa,+ kambe ka hina lava ponisiwaka i matimba ya Xikwembu.+ 19 Hikusa ku tsaliwile: “Ni ta helisa wutlharhi la lava ku tlhariha naswona ni ta helisa* wutivi la tintivi.”+ 20 A kwini munhu wa ku tlhariha? A mutsali* ke? A kwini lweyi a rhandzaka ku kaneta ka misava leyi? Xikwembu a xi yendlanga wutlharhi la misava li va wuphunta ke? 21 Leswi misava yi tshembaka wutlharhi la yona,+ a yi xi tivi Xikwembu,+ leswi hi swi chumayelaka i wuphunta+ ka van’wani kambe Xikwembu hi wutlharhi la xona xi vone swi li swinene ku ponisa lava pfumelaka.

22 Hikusa Vayuda va kombela masingita,+ kasi Vagriki va lavetela wutlharhi; 23 kambe hina hi chumayela hi Kreste lweyi a nga dlayiwa mhandzini, ku nga mhaka leyi wisaka* Vayuda kasi ka vamatiko i wuphunta.+ 24 Kambe ka lava nga vitaniwa, hambi va li Vayuda kumbe Vagriki, Kreste i matimba ya Xikwembu ni wutlharhi la Xikwembu.+ 25 Minchumu ya Xikwembu leyi vanhu va yi vonaka yi li wuphunta yi tlharihile ku tlula vanhu, ni minchumu ya Xikwembu leyi vanhu va yi vonaka na yi nga na ntamu yi ni ntamu ku tlula vanhu.+

26 Vamakwerhu, mi swi vonile swaku nkama mi nga vitaniwa hi Xikwembu, a va nga talanga va ku tlhariha hi ku ya hi mavonelo ya vanhu,+ a va nga talanga lava nga ni matimba, a va nga talanga va mindjangu ya ku ganya,+ 27 kambe Xikwembu xi lange minchumu ya ku phunta ya misava swaku xi ta danisa va ku tlhariha; naswona xi lange minchumu ya ku kala yi nga na ntamu misaveni swaku xi ta danisa minchumu leyi nga ni ntamu;+ 28 naswona xi lange minchumu ya misava ya ku kala yi nga pfuni nchumu, leyi voneliwaka hansi ni leyi kalaka yi nga na lisima swaku yi ta helisa minchumu leyi nga ni lisima,+ 29 leswaku ku nga vi na munhu* lweyi a tikhuzaka ka Xikwembu. 30 Kambe mi vadjondzisiwa va Kreste Yesu hi mhaka ya Xikwembu. Ka hina, Kreste i wutlharhi leli taka hi ka Xikwembu, ni ku lulama+ ni ku kwetsima+ ni ku chunsiwa hi nkutsulu,+ 31 leswaku swi ta yendleka hilaha swi nga tsalisiwa xiswona: “Lweyi a tikhuzaka, a a tikhuzi hi Yehovha.”*+