Vakorinto Va Wumbirhi

2 Hikusa ni yendle xiboho xa ku kala ni nga mi tiseli timhaka leti nga ta mi kwatisa ka khambi ni nga ta mi yendzela. 2 Hikusa loko ni mi kwatisa, i mani lweyi a nga ta ni tiyisa loko ku nga li lweyi ni nga mu kwatisa ke? 3 Ni tsale swilo leswi, leswaku loko ni ta ni nga kwatisiwi hi lava a va fanele va ni tsakisa, hikusa na tiyiseka swaku leswi ni tsakisaka na n’wina hinkwenu swa mi tsakisa. 4 Phela a nkama ni nga mi tsalela karta* leliyani a ni vavisekile, ni mbilu ya mina a yo foo ni tlhela ni tengatenga mihloti; a ni ngo lava ku mi kwatisa+ kambe a no lava mi swi tiva swaku ni mi rhandza hintamu.

5 Loko munhu a mi kwatisile,+ a nga kwatisanga mina, a kwatise n’wina hinkwenu. Kambe a ni lavi ku vulavula hintamu hi mhaka leyi. 6 Leswi va ku tala va n’wina se va nga mu laya munhu yelweyo swa xega swoleswo; 7 se mi fanele mi mu rivalela hi mbilu hinkwayu mi tlhela mi mu tiyisa+ swaku a nga kwati hintamu a za a godola.+ 8 Hi mhaka leyo na mi khongotela swaku mi mu komba swaku ma mu rhandza.+ 9 Hi leswo swi nga ni yendla ni mi tsalela karta, leswaku ni vona swaku ma yingisa ka swilo hinkwaswu kumbe a mi yingisi. 10 Lweyi mi mu rivalelaka na mina ni ta mu rivalela. Lexi ni nga mi rivalela xona (loko ku li swaku xi kona), ni swi yendlele n’wina hi mhaka ya Kreste, 11 leswaku Sathana+ a nga hi tlhariheli,* hikusa ha ma tiva maplanu* ya yena.+

12 A nkama ni nga fika Trowasi+ swaku ni ya chumayela mahungu ya ku tsakisa hi Kreste, hambileswi ni nga pfulekeliwa hi xipfalu ka ntirho wa Hosi, 13 a ni karhateka hikusa a ni mu kumanga makwerhu Tito.+ Hi mhaka leyo ni va salisile ni gama ni ya Makedoniya.+

14 Kambe a ku khensiwe Xikwembu lexi hi rhangelaka a ku hluleni na hi na Kreste. Xikwembu xi tirhisa hina leswaku ku hangalasiwa wutivi la xona hinkwaku ku fana ni ku nun’hwela loku nandzihaka! 15 Hikusa ka Xikwembu hina hi ku nun’hwela loku nandzihaka ka Kreste xikarhi ka lava yaka ku ponisiweni ni le xikarhi ka lava yaka ku helisiweni; 16 ka lava yaka ku helisiweni hi ku nun’hwela loku humaka ku feni ku ya ku feni,+ se ka lava yaka ku ponisiweni hi ku nun’hwela loku humaka ka wutomi ku ya ka wutomi. I mani lweyi a faneliwaka hi ntirho lowu ke? 17 Hina wa hi fanela, hikusa a hi vaxavisi* va rito la Xikwembu+ ku fana ni leswi vanhu va ku tala va yendlisaka swona, kambe leswi hi swi vulaka swa tshembeka hikusa hi rhumiwe hi Xikwembu, naswona hi yendla leswo phambheni ka Xikwembu na hi na Kreste.