Mahungu Ya Ku Tsakisa Ya Ku Tsaliwa Hi Luka

11 Yesu a a li ka ndhawu yin’wani na a khongela, nkama a nga gama, mun’wani wa vadjondzisiwa va yena a ku: “Hosi, hi djondzisi ku khongela, ku fana na Yohani a nga djondzisa vadjondzisiwa va yena.”

2 Se a va byela a ku: “Loko mi khongela, vulani mi ku: ‘Papayi, vito la wena a li kwetsimisiwe.+ Mfumu wa wena a wu te.+ 3 Hi nyiki pawu hi ku ya hi leswi hi swi lavaka siku ni siku.+ 4 Naswona hi rivaleli swidjoho swa hina,+ hikusa na hina ha va rivalela hinkwavu lava hi djohelaka;+ hi pfuni swaku hi nga hluliwi hi ndzingo.’”+

5 A tlhela a ku: “A hi nge u ni munghanu, kutani u mu yela niwusiku u fika u ku: ‘Munghanu, ni kombela u ni nyika* mapawu manharhu, 6 hikusa ni yendzeliwe hi munghanu wa mina naswona a ni na swa ku mu nyika.’ 7 Se munghanu wa wena a ku hlamula na a li ndlwini a ku: ‘U nga ni karhati. Xipfalu se xi khiyiwile naswona mina ni vana va mina se hi yetlelile. A ni nge swi koti ku pfuka ni ta ku nyika leswi u swi lavaka.’ 8 Na mi byela: A ta pfuka a ku nyika leswi u swi lavaka ku nga li hileswi a nga munghanu wa wena, kambe hi mhaka ya ku phikelela ka wena.+ 9 Se na n’wina na mi byela: Tamani mi kombela,+ mi ta nyikiwa; tamani mi lava, mi ta swi kuma; tamani mi gongondza, mi ta pfuleliwa.+ 10 Hikusa lweyi a kombelaka a ta nyikiwa,+ lweyi a lavaka a ta swi kuma naswona lweyi a gongondzaka a ta pfuleliwa. 11 I mani papayi lweyi xikarhi ka n’wina a nga nyikaka n’wana wa yena nyoka, loko a kombela hlampfi ke?+ 12 Kumbe loko a kombela tandza, a nga mu nyikaka xizavanani?* 13 Se loko n’wina hambileswi mi nga vadjohi, mi swi kotaka ku nyika vana va n’wina minchumu yayinene, Papayi wa le matilweni a nge va nyiki moya wa ku kwetsima hi ku tlulisa lava mu kombelaka ke?”+

14 Kutani a hlongole dimoni+ ka munhu lweyi a li mu yendle mbheveve. Nkama dimoni li nga huma, munhu yelweyo a sungule ku vulavula; se vanhu va hlamala.+ 15 Kambe van’wani va ku: “A hlongola madimoni hi Belzebule* hosi ya madimoni.”+ 16 Kasi van’wani va sungule ku mu sindzisa swaku a va yendlela singita+ leli taka hi tilweni na va lava ku mu ringa. 17 Hi ku tiva leswi a va swi pimisa,+ a va byela a ku: “Mfumu wun’wani ni wun’wani lowu nga yavana, wu ta wa, naswona ndjangu lowu nga yavana, a wu nge tiyi. 18 Hi ku fana, loko na yena Sathana a yavanile mfumu wa yena wu nga tiyisa ku yini ke? Hikusa mi li ni hlongola madimoni hi Belzebule. 19 Loko mina ni hlongola madimoni hi Belzebule, se vadjondzisiwa va n’wina va ma hlongola hi mani? Hi leswo swi nga ta yendlaka va mi yavanyisa. 20 Kambe loko swi ku ni hlongola madimoni hi matimba ya Xikwembu,*+ impela Mfumu wa Xikwembu se wu mi hundzile.+ 21 Loko wanuna wa matimba lweyi a nga ni matlharhi a vonelela yindlo ya yena, a kota ku vhikelela swilo swa yena. 22 Kambe loko munhu mun’wani lweyi a nga ni matimba ku mu tlula a fika a lwa na yena a mu hlula, a ta teka matlharhi ya yena hinkwawu lawa a a tshemba wona, a tlhela a yavela van’wani swilo leswi a nga mu tekela. 23 Lweyi a kalaka a nga nyimi na mina, a lwa na mina naswona lweyi a kalaka a nga hlengeleti na mina wa hangalasa.+

24 “Loko dimoni li suka ka munhu, li hundza hi le mananga na li lavetela ndhawu ya ku humula ka yona, kambe loko li nga yi kumi li tibyela leswi: ‘Ni ta tlhelela kaya ka mina lomu ni taka hi kona.’+ 25 Se loko li fika, li kuma ku kukuliwile ku basa ku tlhela ku sasekisiwa. 26 Se li famba li ya teka 7 wa madimoni man’wani ya ku biha hintamu ku tlula lona, loko se ma nghenile, ma tshama kolanu. Kutani xiyimu xa munhu yelweyo xi biha hintamu ku tlula xa ku sungula.”

27 Na a ha vulavula, wansati mun’wani lweyi a a li xikarhi ka xitshungu a ku: “Wa tsaka wansati lweyi a nga ku psala* a tlhela a ku yan’wisa!”+ 28 Kambe Yesu a ku: “Va tsaka lava twaka rito la Xikwembu va tlhela va yendla leswi li swi vulaka!”+

29 Loko xitshungu xi hlengeletanile, a ku: “Lava i vanhu* va ku biha lava lavaka ku vona singita, kambe a ku na singita va nga ta li vona lani, loko ku nga li singita la Yonasi.+ 30 Leswi nga yendlekela Yonasi+ swi ve singita ka Vaninivha, ni N’wana wa munhu a ta va singita ka vanhu va nkama lowu.* 31 Nkama Xikwembu xi nga ta yavanyisa vanhu hinkwavu, hosi ya xisati ya le sul*+ yi ta pfuxiwa xikan’we ni vanhu va nkama lowu* naswona yi ta va komba swaku va ni nandzu; hikusa yi suke hi ka ndhawu ya le kule swinene ya misava ku ta yingisela wutlharhi la Solomoni. Kambe lani ku ni munhu wa lisima ku tlula Solomoni.+ 32 Nkama Xikwembu xi nga ta yavanyisa vanhu hinkwavu, vanhu va le Ninivha va ta pfuxiwa xikan’we ni vanhu va nkama lowu, naswona Vaninivha va ta va komba swaku va ni nandzu; hikusa va tisolile nkama Yonasi a nga va chumayela.+ Kambe ku ni munhu wa lisima lani ku tlula Yonasi. 33 Loko munhu a tlhavika xa ku voninga hi xona+ a nga xi tumbheti kumbe ku xi mbhonya hi ndzhava,* kambe a xi veka henhla ka meza leswaku xi ta voningela lava nghenaka. 34 Livoni la muzimbha i tihlo la wena. Loko tihlo la wena li txuvuke nchumu xin’we ntsena, muzimbha wa wena hinkwawu wu ta voninga; kambe loko li nga lulamanga,* muzimbha wa wena wu ta va munyama.+ 35 Hi mhaka leyo, tivoneli swaku ku vonakala loku nga ka wena ku nga vi munyama. 36 Kutani loko muzimbha wa wena hinkwawu wu voninga funtshi wu nga na ndhawu leyi nga munyama, wu ta voninga ku fana ni loko wu voningeliwa hi xa ku vona hi xona.”

37 Nkama a nga gama ku vula leswi, Mufarisi mun’wani a mu kombela swaku a ya dla na yena. Se a nghena ndlwini a tshama mezeni. 38 Kambe Mufarisi a hlamalile loko a vona swaku a dle na a nga hlambanga* mavoko.+ 39 Kambe Hosi yi ku: “N’wina Vafarisi, mi hlampsa kopo ni paratu hi le handle, kuve ndzeni swi tale hi makwanga* ni wubihi.+ 40 Swiphunta ndzin’wina! Lweyi a nga yendla swa le handle a yendle ni swa le ndzeni, a hi swona ke? 41 Loko u lava ku nyika nchumu swisiwana,* swi nyiki na swi huma mbilwini kutani u ta basa ka swilo hinkwaswu. 42 Kambe yowee n’wina Vafarisi, hikusa mi humesa swa wukhume swa minti,* matsavu* ni swinsinyani swin’wani leswi byaliwaka,*+ kambe a mi na mhaka ni ku lulama ni ku rhandza Xikwembu! Swilo leswi a mi boheka ku swi yendla, kambe mi nga zanga mi tshika ku yendla leswin’wani.+ 43 Yowee n’wina Vafarisi, hikusa mi rhandza switshamu swa lisima ka masinagoga* ni ku xowetiwa mabazara!+ 44 Yowee n’wina, hikusa mi fana ni masirha ya ku kala ma nga voneki kahle,+ lakakuva vanhu va famba henhla ka wona na va nga swi tivi!”

45 Ntivi yin’wani ya Nawu yi mu hlamula yi ku: “Mudjondzisi, se na hina wa hi rhuka loko u vula leswo.” 46 Kutani a ku: “Yowee na n’wina tintivi ta Nawu, hikusa mi rhwexa vanhu mindzhwalu ya ku tika, kuve n’wina a mi yi khumbi hambi hi litiho la n’wina!+

47 “Yowee n’wina, hikusa mi yaka masirha ya vaprofeta lava nga dlayiwa hi vavhovho va n’wina!+ 48 Mi vafakazi va mintirho ya vavhovho va n’wina naswona ma yi seketela, hikusa va dlaye vaprofeta+ kutani n’wina mi yaka masirha ya kona. 49 Hi mhaka leyo, Xikwembu hi wutlharhi la xona xi te: ‘Ni ta va rhumela vaprofeta ni vapostolo, naswona va ta va dlaya va tlhela va xanisa van’wani va vona, 50 leswaku ngati ya vaprofeta hinkwavu leyi nga halatiwa ku sukela misava yi va kona yi ta laviwa ka vanhu va nguva leyi,+ 51 ku sukela ka ngati ya Abele+ ku ya fika ka ngati ya Zakariya, lweyi a nga dlayiwa xikarhi ka altari ni tempele.’+ Ni mi byela ntiyiso: Vanhu va nguva leyi va ta khatisiwa hi mhaka ya ngati ya vona.

52 “Yowee n’wina tintivi ta Nawu, hikusa mi teke khiya leli pfulelaka vanhu swaku va tiva Xikwembu. N’wina a mi ngheni naswona mi pfalela lava lavaka ku nghena!”+

53 Nkama a nga huma kolanu, vatsali ni Vafarisi va sungula ku mu tikisela swinene hi ku mu vutisa swivutiso swa swinyingi, 54 va mu rhiya, leswaku va ta mu phasa hi leswi a a ta swi vula.+