Mahungu Ya Ku Tsakisa Ya Ku Tsaliwa Hi Yohani
13 Na fexta la Paxkwa li nge se fika, Yesu se a a swi tiva swaku nkama wa yena+ wa ku suka lani misaveni a tlhelela ka Papayi+ se a wu fikile. Leswi a a va rhandza vanhu va yena va lani misaveni, a tame a va rhandza anze a fa.+ 2 A va li ku dleni nimadlambu naswona Davulosi se a a swi vekile ka mbilu ya Yudasi Skariyota+ n’wana wa Simoni swaku a xavisa Yesu.+ 3 Leswi Yesu a a swi tiva swaku Papayi a veke minchumu hinkwayu ka mavoko ya yena ni swaku a te hi ka Xikwembu naswona a a ta tlhelela ka xona,+ 4 a suke a nyima, a hlivila nguvu ya yena; kutani a teka thawula a tiboha masenge.+ 5 Nkama a nga gama ku yendla leswo, a chela mati ka baziya, a sungula ku va hlambisa minenge vadjondzisiwa va yena a gama a yi womisa hi thawula leli a a li bohe ka masenge; 6 kutani a ya ka Simoni Pedru. Se yena a ku: “Hosi, u lava ku ni hlambisa minenge?” 7 Yesu a mu hlamula a ku: “Swoswi a wu nge swi twisisi leswi ni swi yendlaka, kambe u ta swi twisisa hala phambheni.” 8 Pedru a ku: “A ni nge pfumeli swaku u ni hlambisa minenge.” Yesu a ku: “Loko ni nga ku hlambisi,+ a wu nge vi na mina.” 9 Simoni Pedru a ku: “Hosi u nga ni hlambisi minenge ntsena, kambe ni hlambisi ni mavoko ni nhloko.” 10 Yesu a ku: “Lweyi a nga hlamba, swo lava a hlambisiwa minenge ntsena hikusa muzimbha wa yena se wu basile. N’wina mi basile, kambe a hi hinkwenu.” 11 A vule swaku: “A hi hinkwenu mi nga basa”, hikusa a a mu tiva lweyi a a ta mu xavisa.+
12 Nkama a nga gama ku va hlambisa minenge a yambale nguvu ya yena se a tshama* mezeni, a gama a ku: “Indjhe ma swi tiva swaku hi mhaka muni ni mi hlambise minenge? 13 Mi ni vitana ‘Mudjondzisi’ ni ‘Hosi’ naswona mi tiyisile hikusa ni yena.+ 14 Se leswi mina hambileswi ni nga Hosi ni Mudjondzisi ni nga mi hlambisa minenge,+ na n’wina mi fanele mi hlambisana minenge.+ 15 Hikusa ni mi vekele xikombiso, kutani mi fanele mi yendlisa leswi ni nga mi kombisa xiswona.+ 16 Ni mi byela ntiyiso: Xikarawa a xi mu tluli n’winyi wa xona naswona lweyi a nga rhumiwa a nga mu tluli lweyi a nga mu rhuma. 17 Loko mi tiva swilo leswi mi tlhela mi swi yendla, mi ta tsaka.+ 18 A ni vuli n’wina hinkwenu; na va tiva lava ni nga va langa. Kambe ku fanele ku hetiseka tsalwa leli nge:+ ‘Lweyi a a dla pawu la mina a ni djikelile.’*+ 19 Ni mi byela mhaka leyi na swi nge se yendleka, swaku loko swi ta yendleka, mi ta kholwa swaku hi ye mina.+ 20 Ni mi byela ntiyiso: Lweyi a yamukelaka lweyi ni mu rhumaka,+ na mina wa ni yamukela naswona lweyi a ni yamukelaka, a yamukela ni Lweyi a nga ni rhuma.”+
21 Nkama a nga gama ku vula leswo, Yesu a karhateka kutani a ku: “Ni mi byela ntiyiso: Mun’we ka n’wina a ta ni xavisa.”+ 22 Se vadjondzisiwa va sungula ku txuvukana hikusa a va nga swi tivi swaku a vula mani.+ 23 Mun’we wa vadjondzisiwa lweyi Yesu a a mu rhandza+ a a tshame kusuhi na yena. 24 Se Simoni Pedru a khweneta mudjondzisiwa yelweyo a ku: “Hi byeli swaku a vula mani.” 25 Kutani mudjondzisiwa yelweyo a khigela ka xifuva xa Yesu a ku: “Hosi, u vulavula hi mani?”+ 26 Yesu a ku: “Hi lweyi ni nga ta mu nyika pawu leli ni nga ta li txovela ka tijela.”+ Se loko a li txovelile, a li nyika Yudasi n’wana wa Simoni Skariyota. 27 Nkama Yudasi a nga li teka, a ngheniwe hi Sathana.+ Kutani Yesu a byela Yudasi a ku: “Hantlisa u yendla leswi u lavaka ku swi yendla.” 28 Kambe lava a va li mezeni a va nga swi tivi swaku hi mhaka muni a mu byela leswo. 29 Van’wani a va pimisa swaku leswi Yudasi a a tshama ni kaxa la male,+ Yesu a a mu byela swaku a ya xava minchumu leyi lavekaka fexteni, kumbe swaku a a fanele a nyika swisiwana xanchumu. 30 Nkama a nga teka pawu, a huma hi xihantla; se a ku li wusiku.+
31 Na se a humile, Yesu a ku: “N’wana wa munhu a dzunisiwile+ naswona Xikwembu xa dzunisiwa hi mhaka ya yena. 32 Xikwembu xi ta mu dzunisa+ naswona xi ta mu dzunisa hi ku hantlisa. 33 Vanghanu va mina,* ni ta va na n’wina swa nkamanyana. Mi ta ni lava, kambe hilaha ni nga byela Vayuda ni ku: ‘Lomu ni yaka kona a mi nge ti,’+ na n’wina ni mi byela mhaka leyi swoswi. 34 Ni mi nyika nawu wa nyuwani wa leswaku mi rhandzana; ku fana ni leswi na mina ni nga mi rhandza,+ na n’wina rhandzanani.+ 35 Hinkwavu va ta tiva swaku mi vadjondzisiwa va mina loko mi rhandzana.”+
36 Simoni Pedru a ku: “Hosi, u ya kwini?” Yesu a mu hlamula a ku: “Lomu ni yaka kona a wu nge ni landzi swoswi, kambe u ta sala u ni landza hi nkama wun’wanyani.”+ 37 Pedru a ku: “Hosi, a ni nge swi koti ku ku landza swoswi hi mhaka muni? Phela hambi wutomi la mina ni ta li nyikela hi mhaka ya wena.”+ 38 Yesu a hlamula a ku: “Indjhe u ta ni fela hikakunene? Ni ku byela ntiyiso: Na nkuku wu nge se yimba, u ta ni yala kanharhu.”+