Yohani Wa Ku Sungula
5 Lweyi a kholwaka swaku Yesu i Kreste, munhu yelweyo i n’wana wa Xikwembu+ naswona lweyi a rhandzaka Xikwembu a rhandza vana va xona. 2 Ha swi tiva swaku ha va rhandza vana va xona+ loko hi rhandza Xikwembu hi tlhela hi hanya hi minawu ya xona. 3 Ku rhandza Xikwembu swi vula ku yingisa minawu ya xona naswona minawu ya xona+ a yi karhati,+ 4 hikusa hinkwavu lava nga vana va Xikwembu va yi hlula misava.+ Lipfumelo la hina hi lona li nga yendla swaku hi kota ku hlula misava.+
5 I mani lweyi a nga swi kotaka ku hlula misava?+ A hi lweyi a kholwaka swaku Yesu i N’wana wa Xikwembu ke?+ 6 Yesu Kreste a te hi mati ni ngati; a nga tanga hi mati ntsena,+ kambe hi mati ni hi ngati.+ Moya wa ku kwetsima hi wona wu nyikelaka wumboni la leswaku leswo i ntiyiso,+ hikusa moya wa ku kwetsima i ntiyiso. 7 Hikusa ku ni timboni tinharhu: 8 Moya wa ku kwetsima,+ mati+ ni ngati+ naswona hi wunharhu ka swona swa pfumelelana.
9 Loko hi yamukela wumboni leli taka hi ka vanhu, a hi swi tiveni swaku wumboni leli taka hi ka Xikwembu i la lisima ku tlula la vanhu. Hikusa Xikwembu hi xoxe hi xona xi nyikelaka wumboni hi ta N’wana wa xona. 10 Lweyi a nga ni lipfumelo ka N’wana wa Xikwembu wa swi kholwa leswi Xikwembu xi nga mu djondzisa swona. Lweyi a kalaka a nga na lipfumelo ka Xikwembu a xi yendla muhembi+ hikusa a nga kholwi ka wumboni leli xi nga li vula hi N’wana wa xona. 11 Naswona wumboni la kona i la leswaku Xikwembu xi hi nyike wutomi la ku kala li nga heli+ hi ku tirhisa N’wana wa xona.+ 12 Lweyi a yamukelaka N’wana wa Xikwembu a ta kuma wutomi, kambe lweyi a kalaka a nga mu yamukeli a nge li kumi wutomi leli.+
13 Ni mi tsalela swilo leswi leswaku mi ta swi tiva swaku mi ni wutomi la ku kala li nga heli+ n’wina mi nga ni lipfumelo ka vito la N’wana wa Xikwembu.+ 14 Ha tshemba+ swaku Xikwembu xa hi twa+ loko hi kombela xin’wani ni xin’wani lexi fambisanaka ni ku rhandza ka xona. 15 Loko hi swi tiva leswaku xa hi twa loko hi xi kombela xin’wani ni xin’wani, ha swi tiva swaku hi ta swi kuma leswi hi swi kombelaka hikusa hi swi kombele ka xona.+
16 Loko munhu o vona makwavu a yendla xidjoho lexi kalaka xi nga yisi ku feni, a ta mu kombelela naswona Xikwembu xi ta mu nyika wutomi;+ vhela xa va nyika wutomi lava xidjoho xa vona xi kalaka xi nga yisi ku feni. Kambe ku ni xidjoho lexi yisaka ku feni.+ Kutani ni byela munhu yelweyo swaku a nga mu khongeleli lweyi a nga yendla xidjoho xolexo. 17 Hinkwaswu leswi kalaka swi nga lulamanga i xidjoho,+ kambe ku ni xidjoho lexi kalaka xi nga yisi ku feni.
18 Ha swi tiva swaku lweyi a nga psaliwa hi Xikwembu a nga hanyi hi xidjoho, kambe lweyi a nga psaliwa hi Xikwembu* wa mu vhikela, naswona Davulosi* a nge mu yendli nchumu.+ 19 Ha swi tiva swaku hi huma ka Xikwembu, kambe misava hinkwayu yi le hansi ka matimba ya Davulosi.*+ 20 Kambe ha swi tiva swaku N’wana wa Xikwembu a tile,+ a yendla leswaku hi twisisa hi tlhela hi tiva lweyi a nga wa ntiyiso. Naswona hi famba ni Xikwembu xa ntiyiso+ hi mhaka ya N’wana wa xona Yesu Kreste. Lexi i Xikwembu xa ntiyiso ni wutomi la ku kala li nga heli.+ 21 Vananga, fambelani kule* ni ku gandzela swifaniso.+