Vaheberu

6 Kutani hi nga nyimi ka tidjondzo ta ku sungula+ ta Kreste, kambe a hi lweleni ku tama hi wupfa.+ Hi nga ha tlheleni hi veka masungulo,* ku nga ku tisola ka mintirho ya ku kala yi nga pfuni nchumu, ku va ni lipfumelo ka Xikwembu, 2 ku djondzisa hi ta ku tsakamisa ni ku tlhateka mavoko,+ ku pfuka ka vafi+ ni ku yavanyisiwa ka wugamu. 3 Leswo hi ta swi yendla loko hikakunene Xikwembu xi swi pfumelela.

4 Hikusa loko ku li lava nga tshama va voningeliwa,+ lava nga nampsa nyiko ya mahala ya le tilweni naswona va nga yamukela moya wa ku kwetsima, 5 lava nga yamukela rito lalinene la Xikwembu ni minkateko* leyi fambisanaka ni misava ya nyuwani leyi taka, 6 kambe va nga tlhelela ndzhaku,+ a swi koteki ku va yendla va tlhela va tisola, hikusa va tlhele va gongondzela N’wana wa Xikwembu ka mhandzi ni ku mu danisa lomu ka vanhu.+ 7 Hikusa misava yi katekisiwa hi Xikwembu loko yi psonga mati ya mpfula leyi naka nkama ni nkama kutani yi humesa swinsinyani leswi pfunaka lava yi rimaka. 8 Kambe loko yi humesa mimintwa ni mahlwehlwe, a yi pfuni nchumu naswona yi le kusuhi ni ku rhukiwa yi gama yi hisiwa.

9 Kambe n’wina varhandziwa, ha tiyiseka swaku ma yampsa swinene ku tlula lava nga tlhelela ndzhaku naswona mi yendla minchumu leyi nga ta yendla swaku mi ponisiwa hi Xikwembu. 10 Hikusa Xikwembu xi lulamile naswona a xi nge wu khohlwi ntirho wa n’wina ni lirhandzu leli mi nga li kombisa hi mhaka ya vito la xona,+ hi ku tirhela vakwetsimi naswona ma ha tamaka mi va tirhela. 11 Kambe hi navela swaku mun’wani ni mun’wani wa n’wina a tama a hiseka ku fana ni ku sunguleni leswaku ntshembo+ wa n’wina wu tiya anze ku fika magamu,+ 12 leswaku mi nga lolohi+ kambe mi tekelela lava dlaka tshomba la switshembiso hi mhaka ya lipfumelo ni ku lehisa mbilu.

13 Hikusa nkama Xikwembu xi nga yendla xitshembiso ka Abrahamu, xi funge hi xona n’winyi hileswi a ku nga na munhu mun’wani wamukulu ka xona,+ 14 xi ku: “Hikakunene ni ta ku katekisa naswona ni ta yendla swaku vatukulu va wena va va vanyingi.”+ 15 Kutani loko Abrahamu se a lehise mbilu, a xi kumile xitshembiso lexi. 16 Hikusa vanhu va funga hi munhu wamukulu naswona ku funga ka vona ku komba swaku leswi va swi vulaka i ntiyiso naswona ku yendla swaku va nga kanetani.+ 17 Hi ku fana, loko Xikwembu xi bohe ku komba lava nga ta dla tshomba la xitshembiso+ leswaku xikongomelo* xa xona a xi nge txintxi, xi tiyise xikongomelo xolexo hi ku funga. 18 Minchumu leyimbirhi leyi Xikwembu xi nga yi yendla a yi txintxi naswona Xikwembu a xi nge tshuki xi hemba;+ naswona ya hi tiyisa hina hi nga baleka hi ya tumbela ka Xikwembu swaku hi khoma swi tiya ka ntshembo lowu nga vekiwa phambheni ka hina. 19 Hi ni ntshembo lowu,+ wu fanaka ni nsimbi* ya wutomi la hina; wu tiyile naswona wa tshembeka, wu hi nghenisa lomu ndzeni hi ndzhaku ka kortina leli hambanisaka makwartu ya tempele,+ 20 lomu Yesu a nga nghena kona hi mhaka ya hina,+ a hi pfulela ni ku hi lunghiselela ndlela naswona a ve muprista wamukulu hi nkama wa ku kala wu nga heli ku fana na Melkisedeki.+