Tikronika Ta Ku Sungula

29 Kutani Hosi Davhida a byela vanhu hinkwavu a ku: “Solomoni n’wana wa mina lweyi Xikwembu xi nga mu langa,+ wa ha li mutsongo funtshi a nga na xiperiyensa;*+ ntirho i wukulu hikusa tempele leyi faneleke yi yakiwa a hi ya munhu, kambe i ya Yehovha Xikwembu.+ 2 Ni tirhe hintamu swaku ni hlengeleta minchumu leyi nga ta tirhisiwa ka ku yaka yindlo ya Xikwembu xa mina, ni hlengelete woru swaku li tirhisiwa ka leswi nga ta lava woru, ni prata swaku li tirhisiwa ka leswi nga ta lava prata, ni kobre swaku li tirhisiwa ka leswi nga ta lava kobre, tinsimbi swaku ti tirhisiwa ka leswi nga ta lava tinsimbi,+ timhandzi+ swaku ti tirhisiwa ka leswi nga ta lava timhandzi, maribye ya onikisi, maribye ya ku sasekisa hi wona, swiribyani swa tikorikori, maribye ya muxaka wun’wani ni wun’wani wa lisima ni maribye ya manyingi ya alabaxtru. 3 Kambe leswi ni rhandzaka yindlo ya Xikwembu xa mina,+ ni tlhela ni nyikela+ hi woru la mina ni prata swaku li tirhisiwa ka yindlo ya Xikwembu xa mina, swaku ni yengesela ka minchumu hinkwayu leyi ni nga yi hlengeleta swaku yi tirhisiwa ka yindlo ya ku kwetsima, 4 ku patsa ni 102.600 wa makilu ya woru* la le Ofiri+ ni 239.400 wa makilu ya prata* la ku tenga swaku li namarhetiwa ka makhumbi ya tiyindlo, 5 woru la leswi nga ta lava woru ni prata la leswi nga ta lava prata ni swa mintirho hinkwayu leyi nga ta yendliwa hi vanhu lava tivaka ku yendla ntirho wa mavoko. I mani lweyi a lavaka ku nyika Yehovha xanchumu namuntlha?”+

6 Se varhangeli va mindjangu, varhangeli va tinxaka ta Israyele, varhangeli va mintlawa ya 1.000 wa vanhu ni varhangeli va mintlawa ya 100 wa vanhu+ ni varhangeli lava a va vonelela ntirho wa hosi+ va ta hi ku swi rhandza. 7 Kutani va nyikela 171.000 wa makilu ya woru,* 10.000 wa tidarika,* 342.000 wa makilu ya prata,* 615.600 wa makilu ya kobre* ni 3.420.000* wa makilu* ya tinsimbi swaku swi tirhisiwa ka yindlo ya Xikwembu xa ntiyiso. 8 Hinkwavu lava a va ni maribye ya lisima a va ma tisa lani a ku vekiwa minchumu ya lisima ka yindlo ya Yehovha, kasi Yehiyele+ wa Mujersoni+ hi yena lweyi a a vonelela minchumu yoleyo ya lisima. 9 Vanhu a va tsakile hi mhaka ya minchumu leyi va nga yi nyikela, hikusa va nyikele ka Yehovha hi timbilu ta vona hinkwatu;+ hambi hosi Davhida a a tsakile hintamu.

10 Se Davhida a dzunisa Yehovha phambheni ka vanhu hinkwavu, a ku: “A va ku dzunise masiku hinkwawu, wena Yehovha Xikwembu xa papayi wa hina Israyele. 11 Wena Yehovha, u mukulu,+ u ni matimba,+ u sasekile, u munene u tlhela u hlonipheka,+ hikusa hinkwaswu leswi nga matilweni ni misaveni i swa wena.+ A mfumu i wa wena Yehovha Xikwembu xa mina.+ U tlakukile ka swilo hinkwaswu. 12 A tshomba ni ku dzuneka i swa wena+ funtshi u fuma swilo hinkwaswu,+ voko la wena li ni matimba,+ li kota ku yendla minchumu yayikulu+ ni ku nyika hinkwavu ntamu.+ 13 Se swoswi, ha ku khensa ni ku dzunisa vito la wena la ku saseka, wena Xikwembu xa hina.

14 “Mina a ni wa nchumu ni vanhu va mina a hi va nchumu; se hi nga swi kotisa ku yini ku ku yendlela magandzelo ya ku fana ni lawa? Phela minchumu hinkwayu yi ta hi ka wena, hina hi ku nyike leswi taka hi ka wena. 15 Hikusa ka wena hi fana ni vanhu va ku ta hi ka matiko man’wani ku fana ni vavhovho va hina hinkwavu.+ Masiku ya wutomi la hina ma fana ni ndzhuti,+ ni ntshembo a wu kona ka wona. 16 Yehovha Xikwembu xa hina, hinkwaswu leswi hi nga swi hlengeleta swaku hi yaka yindlo ya wena leyi ku nga ta dzunisiwa vito la wena la ku kwetsima ka yona, swi ta hi ka wena funtshi hinkwaswu i swa wena. 17 Wena Xikwembu xa mina, ni swi tiva kahle swaku u kambisisa mbilu+ u tlhela u rhandza munhu wa ku tshembeka.+ Ni nyikele minchumu leyi hinkwayu hi ku swi rhandza, se ni tsakile hi ku vona vanhu va wena lava va nga kona lani na vona va nyikela hi ku swi rhandza. 18 Yehovha Xikwembu xa Abrahamu, Izaki na Israyele, vavhovho va hina, pfuna vanhu lava swaku va tama va va ni mbilu leyi va nga na yona ya ku tinyiketela ni ku ku tirhela hi timbilu ta vona hinkwatu.+ 19 Yendla swaku Solomoni n’wana wa mina a ku tirhela hi mbilu ya yena hinkwayu+ swaku a kota ku yingisa hinkwaswu* leswi u nga ta mu byela swona, ni minawu ya wena,+ a yendla minchumu leyi hinkwayu, kutani a yaka tempele leyi ni nga yi hlengeletelela minchumu swaku yi ta yakiwa.”+

20 Kutani Davhida a byela vanhu hinkwavu a ku: “Swoswi dzunisani Yehovha Xikwembu xa n’wina.” Se vanhu hinkwavu va dzunisa Yehovha Xikwembu xa vavhovho va vona, va tlhela va khizama phambheni ka Yehovha ni le phambheni ka hosi va txuvuka hansi. 21 Hi mundzuku ka kona va tame va nyikela magandzelo ka Yehovha ni ku yendlela Yehovha magandzelo ya ku hisiwa.+ Va nyikele 1.000 wa swihon’wani, 1.000 wa tinyempfu, 1.000 wa swinyempfani swa xinuna ni magandzelo ya vhinyu;+ va nyikele magandzelo ya manyingi, va nyikelela Vayisrayele hinkwavu.+ 22 Va tame va dla ni ku nwa phambheni ka Yehovha hi siku lolelo na va tsakile hintamu+ va tlhela va veka Solomoni n’wana wa Davhida swaku a va hosi ka wumbirhi, va mu chela mafurha aphambheni ka Yehovha swaku a va murhangeli,+ va tlhela va veka Zadoki swaku a va muprista.+ 23 Se Solomoni a tshama ka xitshamu xa wuhosi xa Yehovha+ a va hosi a pfaleta papayi wa yena Davhida. A swi mu fambela kahle funtshi Vayisrayele hinkwavu a va mu yingisa. 24 Varhangeli hinkwavu,+ masonchwa ya matimba+ ni vana hinkwavu va Hosi Davhida,+ a va tiveka hansi ka hosi Solomoni. 25 Kutani Yehovha a yendla swaku Solomoni a tiviwa hintamu ka tiko hinkwalu la Israyele a tlhela a tiyisa mfumu wa yena ku tlula mimfumu ya tihosi hinkwatu leti nga tshama ti fuma aIsrayele.+

26 Davhida n’wana wa Yese a fume tiko hinkwalu la Israyele; 27 a fume 40 wa malembe aIsrayele. AHebroni a fume 7 wa malembe,+ kasi aYerusalema a fume 33 wa malembe.+ 28 A fe na a gugile hintamu swinene,+ na a tsakile hileswi a nga hanya malembe ya manyingi, na a ganyile a tlhela a hloniphiwa; se Solomoni n’wana wa yena a vekiwa swaku a va hosi ka ndhawu ya yena.+ 29 Timhaka hinkwatu ta wutomi la Hosi Davhida, ku sukela a ku sunguleni ku ya fika amagamu, ti tsaliwile ka leswi nga tsaliwa hi Samuwele lweyi a a kota ku vona minchumu ya ku hlamalisa hi ndlela ya singita,* ka leswi nga tsaliwa hi muprofeta Natani+ ni leswi nga tsaliwa hi Gadi+ lweyi a a kota ku vona minchumu ya ku hlamalisa hi ndlela ya singita;* 30 hinkwaswu leswi nga tsaliwa swi vulavula hi minchumu hinkwayu leyi nga yendleka nkama lowu yena a a fuma, leswi nga yendlekela yena ni Vayisrayele ni leswi nga yendlekela mimfumu hinkwayu ya le kusuhi.