Varoma
6 Se hi ta ku yini? Hi ta tama hi djoha swaku timpsalu ta Xikwembu na tona ti yengeseleka? 2 Ihim! Leswi hi kalaka hi nga ha mandiwi hi xidjoho,+ a ha ha fanelanga hi tama hi hanya hi xona.+ 3 Kumbe a mi swi tivi swaku hinkwerhu ka hina hi nga tsakamisiwa ka Kreste Yesu+ hi tsakamisiwe ka lifu la yena ke?+ 4 Leswi hi nga tsakamisiwa ka lifu la yena,+ hi lahliwe xikan’we na yena leswaku leswi Kreste a nga pfuxiwa ka lava nga fa hi matimba* ya Papayi, na hina hi fanele hi hanya wutomi la nyuwani.+ 5 Loko hi tlhanganisiwile na yena hi lifu la ku fana ni la yena,+ hikakunene hi ta tlhela hi tlhanganisiwa na yena hi ku pfuxiwa ka ku fana ni ka yena.+ 6 Hikusa ha swi tiva swaku wumunhu la hina la khale li gongondzeliwile na yena mhandzini+ swaku muzimbha wa hina lowu nga ni xidjoho wu nga ha hi mandi.+ Se a ha ha fanelanga hi tama hi va swikarawa swa xidjoho.+ 7 Hikusa lweyi a nga fa a rivaleliwile* xidjoho xa yena.
8 Naswona loko hi file na Kreste ha kholwa swaku hi ta tlhela hi hanya na yena. 9 Hikusa ha swi tiva swaku leswi Kreste se a nga pfuxiwa ku feni,+ a nge he tlheli a fa;+ lifu a la ha na matimba ka yena. 10 Hikusa a fe kan’we ntsena a fela xidjoho* naswona a nge he tlheli a fa,+ kambe wa hanya swaku a yendla ku rhandza ka Xikwembu. 11 Se na n’wina khumbukani swaku se mi file ka xidjoho kambe swoswi mi hanyela Xikwembu hi Kreste Yesu.+
12 Hi mhaka leyo, mi nga pfumeleli xidjoho xi tama xi manda muzimbha wa n’wina,+ xi mi yendla mi yingisa leswi xi swi lavaka. 13 Mi nga tami mi nyikela muzimbha* wa n’wina ka xidjoho hi ku yendla swa ku biha,* kambe tinyikeleni ka Xikwembu ku fana ni vanhu lava nga pfuxiwa ku feni. Nyikelani muzimbha* wa n’wina ka Xikwembu swaku mi yendla swa ku lulama.*+ 14 Leswi mi kalaka mi nga li hansi ka nawu+ kambe mi nga hansi ka timpsalu tatikulu,+ a ma ha fanelanga mi mandiwa hi xidjoho.
15 Se leswi swi lava ku vula swaku hi fanele hi tama hi djoha hileswi hi nga hansi ka timpsalu tatikulu ta Xikwembu ku nga li hansi ka nawu ke?+ Ihim! 16 Mo kala mi nga swi tivi swaku loko mi tinyikela swaku mi tirhela munhu ni ku mu yingisa, mi swikarawa swa lweyi mi mu yingisaka ke?+ Phela loko mi li swikarawa swa xidjoho+ mi ta fa+ kambe loko mi li swikarawa swa Xikwembu mi tlhela mi xi yingisa mi ta va va ku lulama. 17 Kambe a xi khensiwe Xikwembu hikusa hambileswi a mi li swikarawa swa xidjoho, mi yingise djondzo leyi mi nga nyikiwa yona hi mbilu hinkwayu. 18 Ina, leswi mi nga chunsiwa ka xidjoho,+ mi ve swikarawa swa ku lulama.+ 19 Ni tirhisa marito lawa vanhu va ma twisisaka hi mhaka ya ku kala ku hetiseka* ka n’wina. Ku fana ni leswi khale a mi yendla muzimbha wa n’wina wu va xikarawa xa swilo swa chaka ni swa ku biha, swoswi vanani swikarawa swa swilo swa ku lulama leswaku mintirho ya n’wina yi ta yamukeleka ka Xikwembu.+ 20 Hikusa nkama a ma ha li swikarawa swa xidjoho, a mi chunsekile ku yendla swa ku kala swi nga lulamanga.
21 Se a mi tshovela yini ka mintirho ya n’wina ya khale? A mi tshovela swilo leswi swoswi mi nga ni tingana ta swona. Hikusa magamu ya swona i ku fa.+ 22 Kambe leswi swoswi mi nga chunsiwa ka xidjoho mi va swikarawa swa Xikwembu, ntshovelo wa kona wa kwetsima+ naswona magamu ya kona i wutomi la ku kala li nga heli.+ 23 Hikusa muholo* wa xidjoho i lifu,+ kambe nyiko leyi taka hi ka Xikwembu i wutomi la ku kala li nga heli+ hi ku tirhisa Yesu Kreste Hosi ya hina.+