Karta La Yakobe
4 Kasi i ntxini lexi pfuxaka tinyimpi ni ku holovisana xikarhi ka n’wina? A swi yendliwi hi ku navela ka n’wina ka ku biha loku vangaka tinyimpi ndzeni ka n’wina ke?+ 2 Ma navela kambe a mi na nchumu. Mi tshamela ku dlaya ni ku navela kambe a mi kumi nchumu. Mi tshamela ku lwa ni ku vanga tinyimpi.+ A mi na nchumu hikusa a mi kombeli ka Xikwembu. 3 Hambiloko mi kombela a mi kumi nchumu, hikusa a mi kombeli hi xikongomelo xaxinene, kambe mi lava ku tsakisa ku navela ka n’wina.
4 N’wina va ku kala mi nga tshembeki, a mi swi tivi swaku loko mi va vanghanu va misava, mi valala va Xikwembu ke? Kutani lweyi a lavaka ku va munghanu wa misava a tiyendla nala wa Xikwembu.+ 5 Kumbe mi pimisa swaku tsalwa lo kala li nga na nhloko loko li ku: “Wukwele leli hi nga na lona ndzeni ka hina li yendla swaku hi tshamela ku navela swilo hinkwaswu ke?”+ 6 Kambe timpsalu leti Xikwembu xi hi nyikaka tona i tikulu. Hikusa tsalwa li li: “Xikwembu xi nyenya lava tibyelaka+ kambe xi va komba timpsalu tatikulu lava tivekaka hansi.”+
7 Se tivekeni hansi ka Xikwembu,+ kambe kanetani Davulosi+ kutani a ta baleka a suka ka n’wina.+ 8 Tshinelani ka Xikwembu kutani na xona xi ta tshinela ka n’wina.+ Basisani mavoko ya n’wina, n’wina vadjohi,+ mi basisa ni timbilu ta n’wina,+ n’wina lava kalaka va nga tshembeki. 9 Vavisekani ka timbilu ta n’wina, banani nkosi mi rila.+ Ku hleka ka n’wina a ku txintxi ku va ku rila naswona ku tsaka ka n’wina a ku txintxi ku va ku vaviseka. 10 Tivekeni hansi ka Yehovha,*+ kutani yena a ta mi tlakusa.+
11 Vamakwerhu, tshikani ku hlevana.+ Lweyi a hlevaka kumbe a yavanyisa makwavu, a sola nawu naswona a yavanyisa nawu. Kutani loko u yavanyisa nawu, a wu mulandzeli wa nawu kambe u muyavanyisi. 12 Ko va ni munhu mun’we ntsena lweyi a nga Munyiki wa Nawu ni Muyavanyisi,+ lweyi a kotaka ku ponisa ni ku helisa.+ Kambe wo va mani wena swaku u yavanyisa makwenu?+
13 Yingisani n’wina mi nge: “Namuntlha kumbe mundzuku hi ta ya ka tiko lin’wani hi ya heta lembe kona, hi ta fika hi xavisa hi kuma male”,+ 14 kuve a mi swi tivi swaku wutomi la n’wina li ta tshamisa ku yini mundzuku.+ Hikusa mi fana ni hunguva leyi nga kona swa nkamanyana yi gama yi nyamalala.+ 15 Kambe mi fanele mi ku: “Loko Yehovha* a swi lava,+ hi ta hanya, hi yendla leswi ni leswiya.” 16 Kutani swoswi ma tibyela hi ku tikulisa swinene. Ku tikulisa loku hinkwaku ku bihile. 17 Hi mhaka leyo, loko munhu a tiva ndlela ya ku yendla swa ku lulama kambe a nga swi yendli, o djoha.+