Nhlawutelo ya Yohani
18 Ni game ni vona ntsumi yin’wani na yi xika hi le tilweni, na yi ni matimba yamakulu, kutani misava yi voningeliwa hi ku phatima ka yona. 2 Se yi huwelela hintamu yi ku: “A wile! A wile Babilona Wamukulu!+ A txintxe a va kaya la tintsumi ta ku biha ni kaya la swinyanyani hinkwaswu leswi kalaka swi nga basanga ni leswi nyenyiwaka!+ 3 Matiko hinkwawu ma phuzisiwe vhinyu la wunghwavani* la yena,+ tihosi ta misava ti yetlele na yena,+ vaxavisi* va misava va ganyile hi mhaka ya minchumu ya yinyingi ya ku durha leyi a nga na yona. Hambi ku dana a nga dani hi ku va ni minchumu leyi.”
4 Se ni twa rito lin’wani na li ta hi tilweni li ku: “Humani ka yena, n’wina vanhu va mina,+ loko mi nga lavi ku tipatsa ka swidjoho swa yena ni loko mi nga lavi ku weliwa hi man’wani ya makhombo lama nga ta mu wela.+ 5 Hikusa swidjoho swa yena swi tale hintamu swi za swi ya fika ni le tilweni+ naswona Xikwembu xi khumbuke minandzu ya yena.+ 6 Mu tlheliseleni hi swa ku biha leswi a nga yendlela van’wani,+ mi swi phindha kambirhi;+ leswi a nga mi chelela lomu ka kopo,+ na n’wina mu cheleleni kambirhi.+ 7 Leswi a tibyelaka hi mhaka ya tshomba leli a nga na lona naswona a kalaka a nga dani hi ku li hlengeletela, a fanele a hlupheka a tlhela a rila hikusa a tshamela ku tibyela a ku: ‘Ni hosi ya xisati, a ni feliwanga hi nuna naswona a ni nge tshuki ni rila.’+ 8 Hi leswo swi nga ta yendla swaku makhombo ya yena ma mu wela hi siku lin’we, ku nga lifu, ku rila ni ndlala naswona a ta hisiwa hi ndzilu a ku jiii,+ hikusa Yehovha* Xikwembu, lweyi a nga mu yavanyisa a ni matimba.+
9 “Se tihosi ta misava leti nga yendla wuntunga la swa masangu* na yena, ti tlhela ti tirhisa xikan’we na yena tshomba leli a nga li hlengeletela na a nga dani, ti ta mu rila, titiba swifuva hi ku vona ximusi xa ku hisiwa ka yena. 10 Ti ta nyima hi le kule hi mhaka ya ku chava khombo la yena ti ku: ‘Yowee! Yowee, wena doropa lalikulu,+ wena Babilona doropa la matimba, hikusa ku yavanyisiwa ka wena ku fike hi ku tsopeta ka tihlo!’
11 “Naswona vaxavisi va lani misaveni va ta mu rila va tlhela va tiba swifuva, hikusa a ka ha na munhu lweyi a nga ta xava swilo swa vona hinkwaswu: 12 Swilo swa swinyingi swa woru, swa prata, maribye ya ku durha, maperola, mpahla ya xiyimu xa le henhla, mpahla ya ku durha, ya seda ni ya ku pshuka; ni swilo hinkwaswu leswi nga yendliwa hi mapulangu yamanene, hi matinyu ya tindlopfu ni hi mapulangu ya ku durha, hi kobre, hi nsimbi, hi maribye ya ku saseka;* 13 ku patsa ni kanela,* matemperu ya Indiya, swinun’hwelisu,* mafurha ya ku nun’hwela, olibanu,* vhinyu, azeyiti, mpupu, trigu, tihomu, tinyempfu, makavhalu, tinyolo,* swikarawa ni vanhu. 14 Mihandzu yayinene leyi a wu yi navela va ta ku tekela, mafandjara ni swilo swa ku saseka leswi a wu li na swona swi ku helelile, a wu nge he tlheli u swi kuma.
15 “Lava a va xavisa swilo leswi, lava nga ganya hi mhaka ya yena, va ta nyima hi le kule hi mhaka ya ku chava khombo la yena; va ta mu rila 16 va ku: ‘Yowee, yowee, wena doropa lalikulu, u nga yambala mpahla ya xiyimu xa le henhla, ya ku durha ni ya ku pshuka naswona u nga tisasekisa hi swiphatiphati swa woru, hi maribye ya ku durha ni hi maperola,+ 17 hikusa tshomba la wena hinkwalu li helisiwile hi ku tsopeta ka tihlo!’
“Kutani vakongomisi hinkwavu va switimela swa mati, vanhu lava fambaka hi switimela swa mati, lava tirhaka ka swona ni hinkwavu lava hanyaka hi ku tirha lwandle, va nyime hi kule 18 va huwelela na va txuvuke ximusi xa ku hisiwa ka yena, va ku: ‘Hi lini doropa la ku fana ni doropa leli lalikulu ke?’ 19 Va tichele wuthulu ka tinhloko va huwelela na va rila va ku: ‘Yowee, yowee, wena doropa lalikulu, u nga ganyisa hinkwavu lava nga ni switimela alwandle hi mhaka ya tshomba la wena, hikusa u helisiwile hi ku tsopeta ka tihlo!’+
20 “Tsakani n’wina matilo,+ n’wina vakwetsimi,+ n’wina vapostolo na n’wina vaprofeta hi mhaka ya leswi nga humelela, hikusa Xikwembu xi yavanyise doropa leli hi mhaka ya swilo leswi li nga mi yendla swona!”+
21 Se ntsumi ya matimba yi tlakula ribye la ku fana ni ribye lalikulu la ku sila,* kutani yi li txukumetela lwandle yi ku: “Babilona doropa lalikulu, na yena a ta txukumetiwa hi ndlela leyi, a nge he tlheli a va kona.+ 22 Naswona a ku nga ha ta twala munhu na a yimbelela, na a chaya haripa, na a chaya muzika, flawuta* kumbe mhalamhala* ka wena Babilona. A va nge he tshuki va kumeka vanhu lava kotaka ku yendla ntirho wa mavoko naswona a ku nge he tshuki ku twala guwa la ribye la ku sila ka wena. 23 A ku nge he tshuki ku va ni lexi ku voningelaka, a ku nga ha ta tshuka ku twala rito la muteki* ni mutekiwa* ka wena; hikusa vaxavisi va wena a va li tinkwayimani lani misaveni naswona matiko hinkwawu ma kanganyisiwile hi mhaka ya wuloyi la wena.+ 24 Ka wena, ku kumiwe ngati ya vaprofeta, ya vakwetsimi+ ni ya hinkwavu lava nga dlayiwa misaveni.”+