Mintirho Ya Vapostolo

17 Pawulo na Silasi va hundze hi le Amfipolisi ni le Apoloniya va ya fika Tesalonika,+ lomu a ku ni sinagoga* la Vayuda. 2 Se Pawulo a fike a nghena ka lona hi ku ya hi xihena xa yena;+ a hete tisavata tinharhu na a va pfuna ku twisisa Matsalwa+ 3 ni ku lerha tindzimana ta Matsalwa, a tlhela a tlhamusela swaku a swi laveka kuva Kreste a hluphiwa+ a tlhela a pfuxiwa ka lava nga fa,+ a ku: “Yesu lweyi ni mi byelaka hi yena, hi yena Kreste.” 4 Leswo swi yendle swaku van’wani ka vona va va vapfumeli kutani va nyima na Pawulo na Silasi.+ Naswona Vagriki va vanyingi lava a va gandzela Xikwembu ni vavasati va ku hlonipheka na vona va ve vapfumeli.

5 Kambe Vayuda va tala hi wukwele,+ se va hlengeleta ntlawa wa vavanuna va timbilu ta ku biha lava a va tirha ku rhendzelekela mabazara, kutani va hlengeleta xitshungu va gama va sungula ku pfuxa ximusi doropeni. Va dumele munti wa Yaso na va lava Pawulo na Silasi swaku va humesiwa handle ka xitshungu. 6 Loko va nga va kumi, va kokakoka Yaso ni vapfumeli van’wani va va yisa ka tihosi ta doropa va fika va ku: “Vanhu lava nga pfuxa mpfilumpfilu misaveni va fikile ni kola,+ 7 se Yaso a va yamukelile kaya ka yena. Vavanuna lava hinkwavu va lwisana ni minawu ya Khezari, va hlaya swaku ku ni hosi yin’wani leyi va nge i Yesu.”+ 8 Nkama lowu xitshungu ni tihosi ta doropa va nga twa leswo, va kwata swinene; 9 Yaso ni lava a a li na vona va humesiwile loko se va nyikele male ya ku hakela nandzu.

10 Hi wusiku lolelo, vamakwerhu abandleni va rhumele Pawulo na Silasi aBereya. Nkama va nga fika, va ye ka sinagoga la Vayuda. 11 Vanhu va le Bereya a va rhandza ku djondza ku tlula va le Tesalonika hikusa va yamukele rito hi mbilu hinkwayu; a va kambisisa kahle Matsalwa siku ni siku ku vona swaku leswi va nga swi twa a ku li ntiyiso. 12 Se ku tala ka vona va ve vapfumeli, ku patsa ni vavasati van’wani va ku hlonipheka va Vagriki ni vavanuna van’wani va Vagriki. 13 Kambe loko Vayuda va le Tesalonika va twa swaku Pawulo a chumayela rito la Xikwembu aBereya, va tile va ta hlohlotela xitshungu ni ku xi dunga nhloko.+ 14 Se vamakwerhu bandleni va kahlula va humesa Pawulo va mu yisa lwandle,+ kambe Silasi na Timotiya va sala Bereya. 15 Kutani lava a va heleketa Pawulo va fambe na yena anze a fika Atena, kambe va tlhelile nkama Pawulo a nga va leleta swaku va ya byela Silasi na Timotiya+ swaku va mu landza hi xihantla.

16 Na Pawulo a ha va nyimelile Atena, a sungule ku karhateka nkama a nga vona swaku doropa a li tale hi swifaniso. 17 Se a sungula ku djondzisa Vayuda ni vanhu van’wani lava a va gandzela Xikwembu ka sinagoga swaku va twisisa Matsalwa; a a yendla leswo siku ni siku ka vanhu lava a a va kuma mabazara. 18 Kambe vativi van’wani va filozofiya lava tivulaka Vayepikuru ni Switoyika va sungule ku phikizana na Pawulo, kuve van’wani a va ku: “Yi lava ku vula yini nhlanyi leyi ya ku vulavula ngopfu?” Van’wanyani a va ku: “Ingi i mudjondzisi wa swikwembu swin’wani.” A va hlaya leswo hi mhaka ya leswi a a chumayela mahungu ya ku tsakisa hi Yesu ni hi ku pfuxiwa ka vafi.+ 19 Se va mu teka va famba na yena ka tribunali la Areyopago va fika va ku: “U nga hi byela swaku hi yihi djondzo ya nyuwani leyi u vulavulaka hi yona? 20 Hikusa leswi u vulavulaka swona a hi se tshama hi swi twa; se hi byeli swaku swi lava ku vula yini.” 21 Phela Vaatena hinkwavu ni vanhu va le matikweni lava a va tshama* kolanu a va nga tirhi nchumu; xa vona a ku li ku hungata ntsena hi ku byelana timhaka kumbe ku yingisela timhaka le ta ha ku humelelaka. 22 Se Pawulo a nyima tribunali la Areyopago+ a ku:

“Vavanuna va Atena, na swi vona swaku mi swi rhandza hintamu swikwembu swa n’wina ku tlula vanhu va ku tala.+ 23 Hi xikombiso, loko ni fambafamba ni txuvuka swikwembu leswi mi swi gandzelaka, ni vone altari leyi nga tsaliwa leswi: ‘Ka Xikwembu Lexi Hi Kalaka Hi Nga Xi Tivi.’ Se ni tela ku ta mi djondzisa hi ta Xikwembu xolexo, lexi mi xi gandzelaka na mi nga xi tivi. 24 Xikwembu lexi nga yendla misava ni hinkwaswu leswi nga ka yona i Hosi ya tilo ni misava;+ kutani a xi tshami ka titempele leti nga yakiwa hi vanhu+ 25 naswona a xi nyimelanga ku pfuniwa hi munhu ingi hiloko xo pfumala xanchumu,+ hikusa hi xona xi nyikaka vanhu hinkwavu wutomi, moya lowu va wu hefemulaka+ ni swilo hinkwaswu. 26 Xi tirhise munhu mun’we+ swaku xi yendla tinxaka hinkwatu ta vanhu swaku va ta tshama misaveni.+ Xi veke minkama leyi swilo swi faneleke swi yendleka hi yona ni lomu vanhu va faneleke va tshama kona,+ 27 swaku loko va lavalava Xikwembu va ta xi kuma,+ hambileswi ku vula ntiyiso xi kalaka xi nga li kule ni mun’wani ni mun’wani wa hina. 28 Hikusa hi xona xi hi nyikaka wutomi swaku hi hanya hi tlhela hi kota ku fambafamba, hi ku ya hi leswi vathokozeli* van’wani va n’wina va nga swi vulisa xiswona nkama va nga ku: ‘Hikusa na hina hi vana va xona.’

29 “Se leswi hi nga vana va Xikwembu,+ a hi fanelanga hi pimisa swaku Xikwembu xi fana ni woru, prata, ribye kumbe nchumu lexi nga yendliwa hi wutlharhi la munhu.+ 30 Vhela vanhu a va yendla swilo leswo hi ku pfumala wutivi,+ kambe Xikwembu xi swi be hi makatla; se swoswi, xi byela vanhu amisaveni hinkwayu swaku va fanele va tilaya. 31 Hikusa xi veke siku leli xi nga ta yavanyisa+ misava hinkwayu hi ku lulama, hi ku tirhisa wanuna lweyi xi nga mu langa; xi kombile vanhu hinkwavu swaku vhela siku lelo li ta ta hi ku pfuxa wanuna yelweyo ku feni.”+

32 Nkama va nga twa swaku lava nga fa va ta pfuxiwa, van’wani va sungule ku mu hleka,+ kambe van’wani a va ku: “Hi ta ku yingisela siku lin’wani ka mhaka leyi.” 33 Se Pawulo a famba a va siya, 34 kambe van’wani va tipatse na yena va gama va va vapfumeli. Xikarhi ka vona a ku na Diyonizu, muyavanyisi wa le tribunali la Areyopago, wansati lweyi a vitaniwaka Damarisi ni vanhu van’wani.