Vagalatiya
5 Hi chunsekile hileswi Kreste a nga hi chunsa. Hi mhaka leyo, tiyani mi ku ndee,+ mi nga tlheleli ka ndzhwalu wa wukarawa.+
2 Mina Pawulo, na mi byela swaku loko mo tsema nsuvu,* swi vula swaku Kreste a nga mi pfuni hi nchumu.+ 3 Naswona ni byela vanhu hinkwavu lava tsemaka nsuvu swaku va boheka ku landzela Nawu hinkwawu.+ 4 Phela n’wina mi zamaka ku vuliwa va ku lulama hi ku landzela nawu+ mi hambanisiwile na Kreste; mi sukile ka timpsalu ta yena tatikulu. 5 Kasi hina hi nyimele ku vuliwa va ku lulama hi Xikwembu, leswi kotekaka ntsena hi mhaka ya moya wa ku kwetsima ni lipfumelo la hina. 6 Ku va munhu a tsemile nsuvu kumbe a nga tsemanga a hi swa nchumu+ ka mudjondzisiwa wa Kreste Yesu, kambe xa lisima i ku va ni lipfumelo leli fambisanaka ni lirhandzu.
7 A mi ta* kahle.+ Se i mani lweyi a nga mi sivela ku tama mi yingisa ntiyiso? 8 A djondzo ya ku tshamisa leswo a yi ti hi ka Lweyi a mi vitanaka. 9 Fermentu* lalitsongo li kukumukisa mbila hinkwayu.+ 10 Na kholwa swaku n’wina lava nga Hosini+ ma pfumelelana na mina; kambe lweyi a mi karhataka,+ a ta yavanyisiwa hi ndlela leyi mu fanelaka. 11 Kambe vamakwerhu, loko swi ku ni swoswi na ha djondzisa hi ta ku tsema nsuvu, se ni xanisiwela yini ke? Loko swi tshamise leswo, djondzo ya mhandzi ya nxaniso*+ a yi nga ta kwatisa munhu. 12 A ni navela swaku lava zamaka ku mi dunga tinhloko va tithena.*
13 Vamakwerhu, mi vitaniwile swaku mi va vanhu va ku chunseka; kambe mi nga tirhisi ku chunseka koloko swaku mi yendla leswi naveliwaka hi muzimbha* lowu djohaka,+ kambe tirhelanani hi lirhandzu.+ 14 Hikusa Nawu hinkwawu wu hetisisiwe* hi nawu lowu nge: “U fanele u rhandza vanhu van’wani ku fana ni leswi u tirhandzisaka xiswona.”+ 15 Kambe loko mi tshamela ku lumana ni ku phatlulelana,+ tivoneleni leswaku mi nga dlayani.+
16 Kambe ni mi byela leswi: Tamani mi kongomisiwa hi moya wa ku kwetsima+ kutani a mi nga ta yendla leswi naveliwaka hi muzimbha* wa n’wina lowu nga ni xidjoho.+ 17 Hikusa muzimbha ni ku navela ka wona swi lwisana ni moya wa ku kwetsima naswona moya wa ku kwetsima wu lwisana ni muzimbha; swilo leswimbirhi swa lwa lakakuva mi nga swi koti ku yendla leswi mi swi lavaka.+ 18 Naswona loko mi kongomisiwa hi moya wa ku kwetsima a mi boheki ku landzela nawu.
19 Mintirho ya nyama* ya voneka: I wuntunga la swa masangu,*+ chaka, mahanyelo ya tingana,*+ 20 ku gandzela swikwembu swa mavunhwa, wuloyi,*+ ku nyenyana, ku holovisana, wukwele, ku kwata ngopfu, ku kanetana, ku yavana, ku landzela tidjondzo ta vanhu, 21 mona, ku dakwa,+ mafexta ya ku kala ma nga lawuleki* ni swilo swa ku fana ni swoleswo.+ Ni mi ba ndleve ka swilo leswi, ku fana ni leswi ni nga tshama ni mi bisa swona khale ni ku: Lava yendlaka swilo swa ku fana ni leswo, a va nge dli tshomba la Mfumu wa Xikwembu.+
22 Kasi mihandzu ya moya wa ku kwetsima i lirhandzu, ku tsaka, ku rhula, ku lehisa mbilu, timpsalu, wunene,+ lipfumelo, 23 ku vevuka ni ku tikhoma.+ A ku na nawu lowu lwisanaka ni swilo swoleswo. 24 Naswona lava nga va Kreste Yesu va gongondzele muzimbha* wa vona mhandzini ni ku navela ka wona.+
25 Loko ku li leswaku hi hanya hi ku kongomisiwa hi moya wa ku kwetsima, a hi tameni hi hanya hi ku kongomisiwa hi wona.+ 26 Hi nga tshuki hi tibyela,+ hi phikizana ni van’wani+ ni ku kweleta van’wani.