Yohani Wa Wumbirhi
1 Mina wanuna lweyi se a nga kula,* ni tsalela wansati lweyi a nga langiwa ni vana va yena lava ni va rhandzaka swinene, lava kalaka va nga rhandziwi hi mina ntsena kambe ni hinkwavu lava tivaka ntiyiso, 2 hi mhaka ya ntiyiso lowu hi nga na wona naswona hi nga ta vaka na wona hi masiku ni masiku. 3 Timpsalu ta Xikwembu, ntwelawusiwana, ku rhula loku taka hi ka Xikwembu Papayi, ni hi ka Yesu Kreste N’wana wa Papayi, ku patsa ni ntiyiso ni lirhandzu swi ta va na hina.
4 Ni tsake swinene hi ku tiva swaku van’wani va vana va wena va ha famba ntiyisweni+ hi ku landza nawu lowu Papayi a nga hi nyika wona. 5 Se swoswi na ku kombela wena wansati, leswaku hi rhandzana. (A ni ku tsaleli nawu wa nyuwani kambe hi lowu hi nga wu kuma ku sunguleni.)+ 6 Kutani lirhandzu li vula leswi: Hi fanele hi tama hi hanya hi minawu ya xona.+ Hi ku ya hi leswi mi nga swi twa ku sunguleni, nawu wa kona hi lowu nge: Tamani mi hanya hi lirhandzu. 7 Hikusa ku ni vakanganyisi va vanyingi misaveni+ lava yalaka swaku Yesu Kreste a tile na a li wa nyama.+ Lavo i vakanganyisi ni valala va Kreste.*+
8 Tivoneleni swaku mi nga lahlekeliwi hi swilo leswi hi nga swi tirhela leswaku mi ta kuma hakelo ya ku helela.+ 9 Lweyi a humaka ndleleni naswona a nga landzeli djondzo ya Kreste a nga yamukeliwi hi Xikwembu.+ Kambe lweyi a landzelaka djondzo leyi wa yamukeliwa hi Papayi ni N’wana.+ 10 Loko mi teliwa hi munhu lweyi a djondzisaka swa ku hambana ni leswi, mi nga mu yamukeli kaya ka n’wina+ naswona mi nga mu xoweti. 11 Hikusa lweyi a mu xowetaka a seketela mintirho ya yena ya ku biha.
12 Hambileswi ni nga ni swilo swa swinyingi swa ku mi tsalela swona, a ni lavi ku yendla hi ku mi tsalela hi tinta ka papela, kambe ni nyimela ku ta ka n’wina swaku hi ta vulavula na hi vonana leswaku mi ta tsaka swinene.
13 Va ku rungula vana va makwenu wa wena wa xisati, lweyi a nga langiwa.