Mahungu Ya Ku Tsakisa Ya Ku Tsaliwa Hi Luka
8 Se Yesu a gama a famba hi madoropa ni swidoropani, a chumayela mahungu ya ku tsakisa ya Mfumu wa Xikwembu.+ A a ni lava 12 2 ni vavasati van’wani lava nga humesiwa madimoni va tlhela va hanyisiwa mavabyi ya vona: Mariya lweyi a a vitaniwa Madalena, lweyi a nga humesiwa 7 wa madimoni, 3 na Jowana+ nsati wa Khuza, wanuna lweyi a a li murhangeli wa munti wa Heroda, na Suzana ni vavasati van’wani va ku tala lava a va tirhisa swilo swa vona+ leswaku va pfuna Yesu ni vapostolo va yena.
4 Nkama xitshungu xaxikulu xi nga hlengeletana ku patsa ni lava a va mu landzelela na va ta hi madoropeni, Yesu a sungula ku va djondzisa hi ku tirhisa xifaniso a ku:+ 5 “Mubyali a humile a ya byala timbewu ta yena. Na a li ku byaleni, timbewu tin’wani ti wela tlhelweni ka ndlela ti kandziheteliwa kutani ti dliwa hi swinyanyani.+ 6 Tin’wani ti wela henhla ka ribye lalikulu, loko ti milile, ti woma hi mhaka ya ku pfumala mati.+ 7 Timbewu tin’wani ti wela xikarhi ka mimintwa, kutani mimintwa leyi nga kula na tona yi yendla swaku ti nga kuli kahle.+ 8 Kambe tin’wani ti wela ka misava yayinene, loko ti milile, ti psala mihandzu, ti psala ka 100 ku tlula leswi a swi byaliwile.”+ Nkama a nga gama ku vula leswo, a tlhela a ku: “Lweyi a nga ni tindleve ta ku yingisa a a yingisi.”+
9 Kutani vadjondzisiwa va yena va mu vutisa leswi xifaniso lexi xi vulaka swona.+ 10 Se a ku: “N’wina mi nyikiwe ku twisisa swihundla swa ku kwetsima swa Mfumu wa Xikwembu kambe lavan’wani hinkwavu va djondzisiwa hi ku tirhisa swifaniso+ leswaku hambi va txuvuka, va nga voni nchumu, hambi va twa, va nga wu kumi ntsutsu wa mhaka.+ 11 Ntlhamuselo wa xifaniso lexi hi lowu: Mbewu i rito la Xikwembu.+ 12 Timbewu leti nga wa tlhelweni ka ndlela i vanhu lava nga twa rito la Xikwembu, kambe Davulosi a ta kutani a teka rito leli nga ka timbilu ta vona swaku va nga vi ni lipfumelo swaku va ponisiwa.+ 13 Leti nga wela ka ribye lalikulu i vanhu lava nkama va nga twa rito la Xikwembu, va nga li yamukela hi ku tsaka, kambe a va na timintsu. Va pfumela swa nkamanyana, kambe loko va ringiwa va tshika.+ 14 Se leyi nga wa xikarhi ka mimintwa, hi lava nga twa rito kambe va kavanyetiwa hi mhaka ya ku karhateka hi wutomi, ku kokiwa hi tshomba+ ni ku hlongolisa ku tsaka,+ kutani va nga psali mihandzu.+ 15 Kutani leyi nga wa ka misava yayinene, hi lava nga ni timbilu tatinene+ lava loko se va twe rito, va li vekisaka va gama va psala mihandzu hi ku tiyisela.+
16 “A nga kona lweyi a tlhavikaka xa ku voninga hi xona a gama a xi mbhonya hi nchumu kumbe a xi veka hansi ka mubedu, kambe a xi veka henhla ka meza leswaku xi ta voningela lava nghenaka.+ 17 Hikusa a ku na nchumu lexi nga tumbhetiwa lexi nga ta kala xi nga tsumbuliwi naswona a ku na nchumu lexi nga tumbhetiwa kahle, lexi nga ta kala xi nga tiviwi kumbe xi nga humesiwi handle.+ 18 Hi mhaka leyo, pfulani tindleve mi yingisa, hikusa lweyi a nga ni xanchumu, a ta nyikiwa swa swinyingi,+ kambe lweyi a kalaka a nga na nchumu, a ta tekeliwa ni leswi a pimisaka swaku a na swona.”+
19 Kutani mamani wa yena ni vamakwavu+ va mu tela, kambe a va nga swi koti ku fika lomu a a li kona hi mhaka ya ku tala ka vanhu.+ 20 Se vanhu va ku: “Mamani wa wena ni vamakwenu va nyime hala handle va lava ku ku vona.” 21 A va hlamula a ku: “Mamani wa mina ni vamakwerhu hi lava, lava twaka rito la Xikwembu va tlhela va yendla leswi li swi vulaka.”+
22 Siku lin’wani Yesu ni vadjondzisiwa va yena va khwele boti, kutani a ku: “A hi tluleleni ka tlhelo lelin’wani la lwandle.” Se va famba.+ 23 Kambe loko va li ku fambeni, a yetlela. Kutani ku va ni xidzedze xaxikulu alwandle, naswona boti la vona li sungula ku tala hi mati li lava ni ku mbombomela.+ 24 Kutani va ya mu pfuxa va ku: “Mudjondzisi, Mudjondzisi, ha fa!” A gama a pfuka a kawuka moya ni magandlati, kutani swi miyela ku va ni ku rhula.+ 25 Kutani a ku: “Li kwini lipfumelo la n’wina?” Kambe va sungula ku chava va tlhela va hlamala, va byelana hi xivona va ku: “Kasi munhu lweyi i mani? Hikusa a kota ni ku vulavula ni moya ni mati, naswona swa mu yingisa.”+
26 Se va fika va xika ka ndhawu leyi a yi li kusuhi ni doropa la Vajerasi,+ leyi a yi txuvukane ni Galileya. 27 Nkama Yesu a nga xika ka boti, a teliwa hi wanuna wa doropa lolelo lweyi a a ni madimoni. A ku hundze nkama wa ku leha na a nga yambali nchumu naswona a a nga tshami kaya, a a tshama simitela.*+ 28 Nkama a nga vona Yesu, a sungula ku huwelela a tlhela a khizama phambheni ka yena a ku: “U lava yini ka mina wena Yesu, N’wana wa Xikwembu Xa Ku Tlakuka Hintamu? Ni kombela u nga ni xanisi.”+ 29 (Hikusa Yesu a a hlongola dimoni* leli leswaku li huma ka munhu lweyi. A li mu hlasela minkama ya yinyingi+ naswona a a tshama na a bohiwe hi machini ni tinsimbi a tlhela a voneleliwa, kambe a a swi tsema kutani dimoni li mu yisa nhoveni.) 30 Yesu a mu vutisa a ku: “Hi wena mani?” Yena a ku: “Ni Bandla”, hikusa a a ngheniwe hi madimoni ya manyingi. 31 Kutani ma mu kombela swaku a nga ma rhumi ku ya ka xikhele xa ku yenta.+ 32 A ku ni ntlhambi wa makhumba+ lowu a wu dla ntshaveni, se madimoni ma mu kombela swaku a ma pfumelela ku ya nghena ka makhumba wolawo, kutani a ma pfumelela.+ 33 Se madimoni ma huma ka wanuna lweyi ma ya nghena ka makhumba, kutani ntlhambi hinkwawu wu tsutsuma wu ya wela lwandle wu gama wu mbombomela. 34 Kambe nkama valusi va nga vona leswi nga yendleka, va balekile va ya vula mhaka leyi ka lava tshamaka ka doropa ni ka tindhawu leti nga kusuhi ni doropa lolelo.
35 Se vanhu va ya vona leswi nga yendleka. Nkama va nga fika ka Yesu, va kume wanuna lweyi madimoni ma nga huma ka yena, a yambalile na ti ba bem, na a tshame kusuhi ni minenge ya Yesu; kutani va sungula ku chava. 36 Lava nga swi vona va va byele leswi munhu lweyi a a ni madimoni a nga hanyisisiwa xiswona. 37 Kutani vanhu va ku tala lava taka hi ka tiko la Vajerasi va kombela swaku Yesu a suka ka tiko la vona, hikusa a va chava swinene. Se a khwela boti leswaku a tifambela. 38 Kutani wanuna lweyi a a ni madimoni a kombela ku famba na yena, kambe Yesu a mu tlhelisa a ku:+ 39 “Muka kaya, u ya byela vanhu leswi Xikwembu xi nga ku yendlela swona.” Se a famba, a ya byela vanhu va doropa hinkwalu leswi Yesu a nga mu yendlela swona.
40 Nkama Yesu a nga vuya, xitshungu xi mu yamukele hi ku tsaka hikusa a xi mu nyimelile.+ 41 Se ku ta wanuna lweyi a vitaniwaka Yayiro, lweyi a a li murhangeli wa sinagoga.* Kutani a fika a khizama ka minenge ya Yesu a mu kombela swaku a ya kaya ka yena,+ 42 hikusa ntombhi ya yena ya yin’we ntsena, ya kolomuyani ka 12 wa malembe a yi li kusuhi ni ku fa.
Na Yesu a li ku fambeni xitshungu a xi mu manyetela. 43 A ku ni wansati lweyi a a ni 12 wa malembe na a hluphiwa hi mavabyi ya ku humetela ngati,+ naswona a ku nga na munhu lweyi a nga swi kota ku mu hanyisa.+ 44 A te hi le ndzhaku a fika a khumba ponta ya mpahla ya yena,+ se ngati yi nyima ku humetela. 45 Se Yesu a ku: “I mani a nga ni khumba?” Leswi hinkwavu a va yala, Pedru a ku: “Mudjondzisi, wa swi vona swaku xitshungu xa ku manyetela.”+ 46 Kambe Yesu a ku: “Ku ni lweyi a nga ni khumba, hikusa ni twe matimba+ ma huma ka mina.” 47 Nkama wansati a nga vona swaku va mu tsumbulile, a ta na a rhurhumela a fika a khizama phambheni ka yena, kutani a tlhamusela phambheni ka vanhu hinkwavu leswi nga mu yendla a khumba Yesu ni leswi a nga hanyisisiwa xiswona hi ku hantlisa. 48 Kambe Yesu a ku: “N’wananga, lipfumelo la wena li ku hanyisile. Famba hi ku rhula.”+
49 Na a ha khuluma, ku fika munhu lweyi a a ta hi kaya ka murhangeli wa sinagoga a ku: “N’wana wa wena se a file; u nga ha mu hluphi Mudjondzisi.”+ 50 Nkama Yesu a nga twa leswo, a ku: “U nga chavi, pfumela ntsena, n’wana wa wena a ta hanya.”+ 51 Loko a fika, a nghena ndlwini na Pedru, Yohani, Yakobe ni vapsali va ntombhi leyi ntsena. 52 Vanhu a va li ku rileni va tlhela va tiba swifuva hi mhaka ya ku xukuvala. Kutani Yesu a ku: “Tshikani ku rila+ hikusa n’wana lweyi a nga fanga kambe a yo yetlela.”+ 53 Se va sungula ku mu hleka swinene hikusa a va swi tiva swaku a file. 54 Kambe a mu khoma hi voko a ku: “N’wananga, pfuka!”+ 55 Kutani n’wana a tlhela a hanya,+ se Yesu a va byela swaku va mu nyika swakudla. 56 Vapsali va yena a va nga tikoti hi ku tsaka, kutani a va byela swaku va nga byeli munhu leswi nga yendleka.+