Tito
2 Kambe wena, tama u djondzisa swilo leswi fambisanaka ni djondzo yayinene.+ 2 Vavanuna lava nga kula a va yendli swilo hi ku pimela, va hlonipheka, va pimisa kahle, va tiya ku pfumeleni, alirhandzwini va tlhela va tiyisela. 3 Hi ku fana, vavasati lava nga kula va fanele va hanya hi ndlela ya ku hlonipheka, va nga wonhi van’wani mavito, va nga vi swikarawa swa vhinyu, va djondzisa swaswinene, 4 leswaku va ta djondzisa vavasati lava nga vatsongo swaku va rhandza vanuna va vona, va rhandza ni vana va vona, 5 va pimisa kahle, va va lava nga tenga, va tirha mintirho ya le kaya, va va ni mahanyelo yamanene, va tiveka hansi ka vanuna va vona+ leswaku rito la Xikwembu li nga soliwi.
6 Hi ku fana, tama u pfuna madjaha swaku ma va ni mimpimiso yayinene,+ 7 u va xikombiso xaxinene ka hinkwaswu leswi u swi yendlaka. Djondzisa ntiyiso hi ku tinyimisela,+ 8 u tirhisa marito yamanene swaku vanhu van’wani va nga ku solasoli,+ se lava hi kanetaka va ta dana, hikusa a va nga ta va ni nchumu xa ku biha xa ku xi vula hi hina.+ 9 Vatirhi a va tiveki hansi ka vapatrao* va vona ka minchumu hinkwayu,+ va zama ku va tsakisa, va nga kanetani na vona, 10 va nga va yiveli+ kambe va tshembeka, leswaku va sasekisa djondzo ya Muponisi wa hina, ku nga Xikwembu hi tindlela hinkwatu.+
11 Hikusa timpsalu tatikulu ta Xikwembu ti kombisiwile naswona ti yendla swaku vanhu hinkwavu va ponisiwa.+ 12 Ti hi djondzisa ku fambela kule ni ku delela Xikwembu ni ku navela ka misava,+ kambe hi va ni mimpimiso yayinene, hi va va ku lulama hi tlhela hi tinyiketela ka Xikwembu ka nkama lowu hi hanyaka ka wona,+ 13 na hi nyimela ntshembo wa ku tsakisa+ ni ku humelela loku phatimaka ka Xikwembu lexikulu ni ka Muponisi wa hina Yesu Kreste, 14 lweyi a nga nyikela wutomi la yena+ leswaku a hi chunsa*+ ka swidjoho swa mixaka hinkwayu a tlhela a basisa vanhu lava nga tshomba la yena la ku hlawuleka, lava hisekelaka ku yendla mintirho yayinene.+
15 Tama u djondzisa swilo leswi, u khongotela ni ku laya hi matimba lawa u nga nyikiwa wona.+ U nga tshiki munhu a ku delela.