Varoma

5 Se leswi hi nga vuliwa va ku lulama hi mhaka ya lipfumelo,+ a hi veni ni ku rhula* ni Xikwembu, loku kotekaka hi mhaka ya Hosi ya hina Yesu Kreste.+ 2 Lipfumelo leli hi nga na lona ka Yesu li hi pfumelela ku tshinela ka Xikwembu ni ku tikhorisa hi timpsalu ta xona tatikulu leti hi nga na tona swoswi.+ A hi tsakeni* hikusa hi ni ntshembo wa leswaku Xikwembu xi ta hi nyika xitshamu xa ku tlakuka. 3 Ku nga li leswo ntsena, kambe a hi tsakeni* loko hi li ka mahlomulu+ hikusa ha swi tiva swaku mahlomulu ma psala ku tiyisela;+ 4 ku tiyisela ku yendla swaku hi yamukeleka ka Xikwembu,+ kutani loko hi yamukeleka ka Xikwembu hi ta va ni ntshembo,+ 5 naswona ntshembo lowu a wu yendli swaku munhu a danisiwa,+ hikusa Xikwembu xi hi nyike moya wa ku kwetsima leswaku xi hi komba swaku xa hi rhandza.+

6 Loko ha ha li vadjohi,*+ Kreste a fele vanhu lava kalaka va nga xi hloniphi Xikwembu hi nkama lowu nga vekiwa. 7 Swi nga karhata kuva munhu a fela munhu wa ku lulama; hambileswi kumbexana munhu mun’wani a nga ha xinyataka a fela munhu wa munene. 8 Kambe Xikwembu xi hi kombe swaku xa hi rhandza hileswi Kreste a nga hi fela na ha ha li vadjohi.+ 9 Leswi se hi nga vuliwa va ku lulama hi mhaka ya ngati ya Yesu,+ ha tiyiseka swaku hi ta pona ka ku kwata ka Xikwembu.+ 10 Hikusa loko hi tlhele hi twanana ni Xikwembu hi mhaka ya ku fa ka N’wana wa xona+ loko ha ha li valala, a ha ha vuli leswi hi nga tlhela hi twanana na xona, hi ta ponisiwa hi wutomi la Kreste. 11 Ku nga li leswo ntsena, kambe hi tlhela hi tsaka ka Xikwembu hi mhaka ya Hosi ya hina Yesu Kreste lweyi a nga yendla swaku hi tlhela hi twanana ni Xikwembu.+

12 Hi mhaka leyo, leswi xidjoho xi nga nghena misaveni hi munhu mun’we, na lona lifu li nghenile hi mhaka ya xidjoho,+ se lifu li tlulele vanhu hinkwavu hikusa hinkwavu va djohile+ . . . 13 Hikusa xidjoho xi ve kona lani misaveni na Nawu wu nge se va kona, kambe a ku nge vuliwi swaku vanhu va ni xidjoho na ku nga na nawu.+ 14 Hambileswo, lifu li ve hosi ku sukela ka Adamu ku ya fika ka Moxe. Li tlhele li fuma ni lava kalaka va nga djohisanga leswi Adamu a nga djohisa xiswona. Adamu a a fanekisela lweyi a a ta ta.+

15 Kambe nyiko ya mahala ya Xikwembu a yi fani ni leswi kumiwaka hi ku tlula nawu. Hikusa loko nandzu wa munhu mun’we wu dlayisile vanhu va vanyingi, timpsalu tatikulu ta Xikwembu ni nyiko ya xona ya mahala swi tisele vanhu va vanyingi,+ minkateko leyi kalaka yi nga pimanisiwi ni nchumu hi ku tirhisa timpsalu ta Yesu Kreste!+ 16 Naswona leswi kumiwaka hi mhaka ya nyiko ya mahala a swi fani ni leswi kumiwaka hi mhaka ya xidjoho xa munhu mun’we.+ Hikusa xidjoho xin’we xi yendle swaku vanhu va va ni nandzu,+ kambe loko vanhu va vanyingi se va djohile Xikwembu xi nyikele nyiko ya mahala leyi nga yendla swaku va vuliwa va ku lulama.+ 17 Lifu li fumile hi mhaka ya xidjoho xa munhu mun’we.+ Hi ku fana, timpsalu tatikulu ta Xikwembu ni nyiko ya mahala ya ku lulama+ i swikulu naswona swa yampsa. Phela lava nga ta swi kuma va ta hanya va tlhela va va tihosi+ hi mhaka ya munhu mun’we, Yesu Kreste!+

18 Leswi vanhu hinkwavu va nga kuma nandzu hi mhaka ya xidjoho xin’we,+ hi ku fana, hinkwavu+ va ta vuliwa va ku lulama va tlhela va kuma wutomi hi mhaka ya nchumu xin’we xaxinene.+ 19 Hikusa leswi va ku tala va nga yendliwa vadjohi hi mhaka ya leswi munhu mun’we a kalaka a nga yingisanga+ ni vanhu va ku tala va ta yendliwa va ku lulama hi mhaka ya ku yingisa ka munhu mun’we.+ 20 Nawu wu ve kona leswaku wu komba vanhu swaku va djohile hintamu.+ Kambe lomu xidjoho xi nga tala, na tona timpsalu tatikulu ta Xikwembu ta yengeseleka swinene. 21 Leswaku swi ku yini? Leswaku leswi xidjoho xi nga va hosi xikan’we ni lifu,+ na tona timpsalu tatikulu ti kota ku va hosi hi mhaka ya ku lulama loku yisaka ka wutomi la ku kala li nga heli hi ku tirhisa Hosi ya hina Yesu Kreste.+