Esaya
41 “Miyelani mi ni yingisa, n’wina swihlala;*
Matiko a ma tlhele ma kuma matimba.
A ma tshinele kutani ma vulavula.+
A hi tlhanganeni swaku hi ta yavanyisiwa.
2 I mani lweyi a nga langa munhu lweyi a taka hi wuxeni,+
A mu tisa ka minenge ya Yena* lomu ku nga ni ku lulama,
Swaku a ta mu nyika matiko,
Ni ku mu yendla a hlula tihosi ke?+
I mani lweyi a nga ta hangalasa tihosi ku fana ni wuthulu hi xipada xa yena,
Ku fana ni mabyanyi ya ku woma lawa ma biwaka hi moya phambheni ka ligubu la yena ke?
3 A hlongolisa matiko funtshi a nga phazamisiwi hi nchumu
A famba hi tindlela leti a kalaka a nge se tshama a famba hi tona.
4 I mani lweyi a nga yendla leswi,
A vitana vanhu ku sukela a ku sunguleni?
5 Vanhu lava tshamaka ka swihlala va swi vonile se va sungula ku chava.
Vanhu lava tshamaka ka magamu ya misava va sungule ku rhurhumela.
Vanhu va tshinelile, va ta.
6 Mun’wani ni mun’wani a pfuna munghanu wa yena
A tlhela a byela makwavu a ku: “Tiya nhlana.”
7 Se lweyi a yendlaka swifaniso a tiyisa lweyi a tirhaka hi nsimbi;+
Lweyi a baka nsimbi hi hamela
A tiyisa lweyi a gongondzelaka henhla ka nsimbi.
Loko a vona lomu tinsimbi ti nga tlhanganisiwa kona a li: “Ti tlhanganisiwe kahle.”
Se xifaniso xi tiyisiwa hi swipikirhi swaku xi nga wi.
8 “Kambe wena Israyele, u mutirheli wa mina,+
Ni ku langile wena Yakobe,+
Ntukulu* wa munghanu wa mina Abrahamu,+
9 Wena lweyi ni nga ku teka amagamu ka misava,+
Wena lweyi ni nga ku vitana kule hintamu.
10 U nga chavi, hikusa ni na wena.+
U nga karhateki, hikusa ni Xikwembu xa wena.+
Ni ta ku tiyisa, ina, ni ta ku pfuna.+
Ni ta ku khoma swi tiya hi voko la mina la xinene la ku lulama.’
11 Yingisa! Hinkwavu lava va ku kwatelaka va ta danisiwa va tlhela va xixiwa.+
Lava lwaka na wena va ta helisiwa.+
12 U ta lavetela lava lwaka na wena kambe a wu nga ta va kuma;
Vanhu lava lwaka na wena va ta fana ni nchumu lexi kalaka xi nge se tshama xi va kona, phela a va nga ta va nchumu.+
13 Hikusa mina, Yehovha Xikwembu xa wena, ni khoma voko la wena la xinene,
Lweyi a ku byelaka a ku: ‘U nga chavi. Ni ta ku pfuna.’+
14 U nga chavi wena Yakobe lweyi a nga xipungwani,+
Ni ta mi pfuna n’wina vanhu va Israyele”, ku vula Yehovha, Muponisi* wa wena,+ Mukwetsimi wa Israyele.
15 “Phela ni ku yendle mapulangu ya ku hula hi wona,*+
Mapulangu ya nyuwani lawa ma nga ni matinyu lama tsemaka matlhelo mambirhi.
Wena u ta khwela ka tintshava u ti pfotlosa
U ta yendla swaku maganga ma fana ni muhungu.
16 Wena u ta swi phephera,
Se moya wu ta swi teka;
Xidzedze xi ta swi hangalasa.
17 “Lava va kalaka va nga na nchumu ni swisiwana va lava mati, kambe a ma kona.
Lirimi la vona li womile hi torha.+
Mina Yehovha ni ta va hlamula.+
Mina Xikwembu xa Israyele, a ni nge va tshiki.+
18 Ni ta yendla swaku ku va ni minambu henhla ka maganga+
Ku ta va ni swihlovo ka nkova wa ku yanama.+
Ni ta txintxa mananga ma va ndhawu ya mati leyi nga ni tinhlanga
Tiko leli kalaka li nga na mati li ta va ni swihlovo swa mati.+
19 Amananga ni ta byala nsinya wa mukedari,
Nsinya wa akasiya, wa murta ni nsinya wa nzululwani.+
Amananga ni ta byala nsinya wa yunipa,
Ku patsa ni nsinya wa nyamarhi ni kipresi,+
20 Leswaku vanhu hinkwavu va swi vona ni ku swi tiva
Va yingisa va tlhela va twisisa
Swaku swilo leswi swi yendliwe hi Yehovha,
Swi yendliwe hi Mukwetsimi wa Israyele.”+
21 “Tlhamuselani mhaka ya n’wina”, ku vula Yehovha.
“Tanani ni wufakazi la n’wina”, ku vula Hosi ya Yakobe.
22 “Tanani ni wumboni mi hi byela swilo leswi swi nga ta yendleka.
Hi byeleni swilo swa le ku sunguleni,
Swaku hi ta pimisa kahle hi swona ni ku tiva leswi swi nga ta yendleka.
Kumbe mi hi tlhamusela leswi nga ta yendleka.+
23 Hi byeleni leswi nga ta yendleka ka nkama lowu taka,
Swaku hi ta swi tiva swaku mi swikwembu.+
Yendlani swaswinene kumbe swa ku biha,
Swaku hi ta hlamala loko hi swi vona.+
24 Phela a mi va nchumu,
Ni leswi mi swi yendlaka a ko va nchumu.+
Mun’wani ni mun’wani lweyi a mi langaka wa nyenyentsa.+
25 Ni lange munhu wa le wuxeni funtshi a ta ta,+
Lweyi a taka hi wuxeni+ lweyi a nga ta vitana vito la mina.
A ta kandzihetela tihosi, ingaku hiloko ti li vumba,+
Ku fana ni lweyi a tirhaka hi vumba lweyi a kandzihetelaka vumba la ku tsakama.
26 I mani lweyi a nga hlaya leswi ku sukela a ku sunguleni swaku hi swi tiva,
Kumbe ku sukela khale hintamu, swaku hi ta ku: ‘A vulavula ntiyiso’?+
Phela, a nga kona lweyi a nga swi hlaya!
A nga kona lweyi a nga swi twalisa!
A nga kona lweyi a nga twa nchumu ka n’wina!”+
27 Hi mina wa ku sungula ku byela Siyoni ni ku: “Vonani leswi swi nga ta yendleka!”+
Ni ta rhumela munhu aYerusalema lweyi a nga ta tisa mahungu ya ku tsakisa.+
28 Kambe ni tame ni txuvuka, a ku nga na munhu;
A ku nga na munhu xikarhi ka vona lweyi a a ta va laya.
Ni tame ni va kombela swaku va hlamula.
29 Phela hinkwavu a hi va nchumu.
Mintirho ya vona a hi yanchumu.
Swifaniso swa vona leswi nga yendliwa hi nsimbi a swi pfuni nchumu funtshi a swi na lisima.+