Mahungu Ya Ku Tsakisa Ya Ku Tsaliwa Hi Luka

23 Kutani hinkwavu va suka va nyima, va teka Yesu va famba na yena ka Pilatu.+ 2 Se va sungula ku mu lumbeta+ va ku: “Hi kume wanuna lweyi na a hlohlotela vanhu swaku va terekela mfumu, a va yalisa ku hakela rhesa* ka Khezari,+ a tlhela a vula swaku hi yena Kreste naswona i hosi.”+ 3 Kutani Pilatu a mu vutisa a ku: “U Hosi ya Vayuda ke?” A hlamula a ku: “Wena hi wexe u vula swona.”+ 4 Se Pilatu a byela vaprista vavakulu ni xitshungu a ku: “A ni kumi nandzu ka munhu lweyi.”+ 5 Kambe va sindzisa va ku: “Leswi a swi djondzisaka vanhu aYudiya, ku sukela Galileya ku ta fika lani, swi pfuxa hasahasa.” 6 Nkama Pilatu a nga twa leswo, a va vutise a ku: “Munhu lweyi i Mugalileya ke?” 7 Se nkama a nga tsumbula swaku Yesu a ta hi ka ndhawu leyi fumiwaka hi Heroda,+ a mu rhumela ka Heroda, lweyi na yena a a li Yerusalema ka masiku wolawo.

8 Heroda a tsake hintamu nkama a nga vona Yesu, hikusa se a ku li khale na a navela ku mu vona hi mhaka ya swilo swa ku tala leswi a nga swi twa hi yena,+ naswona a a navela ku mu vona na a yendla masingita. 9 Se a sungula ku mu yendla swivutiso swa swinyingi, kambe Yesu a nga mu hlamulanga nchumu.+ 10 Hambileswo, vaprista vavakulu ni vatsali va mu lumbeta na va kwate hintamu, hambi ku tshama a va nga swi lavi. 11 Kutani Heroda ni masonchwa ya yena va mu phuntisa,+ va mu poyila+ hi ku mu yambexa nguvu ya ku saseka, va gama va mu tlhelisa ka Pilatu. 12 Ku sukela siku lelo, Heroda na Pilatu, lava a va nga twani, va sungule ku va vanghanu.

13 Kutani Pilatu a vitana vaprista vavakulu, madoda ni vanhu 14 a va byela a ku: “Mi tise munhu lweyi ka mina mi ku a hlohlotela vanhu swaku va terekela mfumu. Mi ni vonile loko ni mu vutisa phambheni ka n’wina naswona a ni kumanga nchumu lexi seketelaka leswi mi mu lumbetaka hi swona.+ 15 Hambi Heroda a mu tlhelise ka hina hikusa a nga kumanga nchumu, naswona a nga yendlanga nchumu lexi mu yendlaka a faneliwa hi ku fa. 16 Se ni ta mu ba+ ni gama ni mu chunsa.” 17* —— 18 Kambe xitshungu hinkwaxu xi huwelela xi ku: “Mu dlayi wanuna lweyo,* u hi chunsela Barabasi!”+ 19 (Barabasi a a petiwe djele hi mhaka ya ku terekela mfumu ni ku dlaya vanhu.) 20 Pilatu a tlhela a vulavula na vona, hikusa a a lava ku chunsa Yesu.+ 21 Kutani va sungula ku huwelela va ku: “A a yisiwi mhandzini! A a yisiwi mhandzini!”+ 22 A tlhela a vulavula na vona ka wunharhu a ku: “Kasi hi mhaka muni? A wonhe yini? A ni kumanga nchumu lexi yendlaka a faneliwa hi ku fa; se ni ta mu ba ni gama ni mu chunsa.” 23 Se va sungula ku sindzisa va huwelela va vula swaku a a dlayiwi; va huwelele hintamu va za va yingisiwa.+ 24 Kutani Pilatu a yendla xiboho xa leswaku ku yendliwa leswi va swi kombelaka. 25 A chunse wanuna lweyi a va mu lava, ku nga lweyi a nga petiwa djele hi mhaka ya ku terekela mfumu ni ku dlaya vanhu, kambe a va nyika Yesu swaku va ya mu dlaya.

26 Na va li ku fambeni na Yesu, va nyimisa Simoni wa le Kirene, lweyi a a ta hi le handle ka doropa, se va mu rhwexa mhandzi ya nxaniso* va ku a a landzeli Yesu.+ 27 Yesu a a landziwa hi vanhu va ku tala ku patsa ni vavasati va ku tala lava a va ba nkosi, va mu rila. 28 Se a byela vavasati volavo a ku: “Vavasati va le Yerusalema, mi nga ni rileli. Kambe tirileleni n’wina ni vana va n’wina;+ 29 hikusa ma ta masiku lawa vanhu va nga ta ku: ‘Va tsaka vavasati lava kalaka va nga na vana, lava kalaka va nga psali ni lava kalaka va nga yan’wisanga!’+ 30 Kutani va ta sungula ku byela tintshava va ku: ‘Hi weleni!’ Va tlhela va byela maganga va ku: ‘Hi mbhonyeni!’+ 31 Loko va yendla swilo leswi na nsinya wa ha tsakama, ku ta humelela yini loko se wu womile?”

32 A ku ni vavanuna vambirhi lava a va li swigevenga, lava a va ya ku dlayiweni na Yesu.+ 33 Nkama va nga fika ka ndhawu leyi vitaniwaka Ripala,*+ va mu gongondzele ka mhandzi ni swigevenga, xin’we ka xinene se lexin’wani ka ximatsi xa yena.+ 34 Kambe Yesu a ku: “Papayi, va rivaleli, hikusa a va swi tivi leswi va swi yendlaka.” Se va hoxa swiribyani* swaku va yavelana mpahla ya yena.+ 35 Kutani vanhu va nyima va txuvuka. Kambe varhangeli a va mu phuntisa va ku: “A ponise van’wani; loko a li Kreste lweyi a nga langiwa hi Xikwembu a a tiponisi na yena.”+ 36 Na wona masonchwa a ma mu poyila ma tlhela ma mu nyika vhinyu la ku tsatsavela+ 37 ma ku: “Loko u li Hosi ya Vayuda, tiponisi.” 38 Ahenhlanyana ka nhloko ya yena a ku tsaliwe marito lama nge: “Leyi i Hosi ya Vayuda.”+

39 Kutani xigevenga xin’wani lexi nga hayekiwa kolanu xi sungula ku mu rhuketela+ xi ku: “Loko u li Kreste, tiponisi u tlhela u ponisa na hina.” 40 Se xigevenga lexin’wani xi kawuka lexin’wanyani xi ku: “A wu xi chavi Xikwembu leswi na wena u khatisiwaka ku fana na yena ke? 41 Hina swa hi fanela, hi khatisiwa hi mhaka ya leswi hi nga swi yendla; kambe wanuna lweyi a nga dlanga xa munhu.” 42 Kutani xi ku: “Yesu, ni khumbuki loko u nghena ka Mfumu wa wena.”+ 43 Yesu a ku: “Na ku tshembisa namuntlha, u ta va na mina aParadesini.”+

44 Se a ku li kolomuyani ka ma 12,* kutani munyama wu funengeta tiko hinkwalu anze ku ba ma 15,*+ 45 dlambu li nga ha voningi; kutani kortina leli nga tempeleni+ li handzuka hi le xikarhi.+ 46 Se Yesu a huwelela hi rito la le henhla a ku: “Papayi, ni veka wutomi la mina mavokweni ya wena.”+ Nkama a nga gama ku vula leswo, a fa.+ 47 Nkama murhangeli wa masonchwa* a nga vona leswi nga humelela, a sungula ku dzunisa Xikwembu a ku: “Vhela wanuna lweyi a a lulamile.”+ 48 Hambi vanhu hinkwavu lava a va hlengeletanile kolanu, va swi vonile leswi nga humelela, kutani va muka kaya na va tiba xifuva hi ku vaviseka. 49 Hinkwavu lava a va mu tolovelile Yesu a va nyime hi le kule. Ni vavasati lava nga mu landzela ku sukela Galileya a va li kona naswona va swi vonile leswi nga yendleka.+

50 A ku ni wanuna lweyi a a vitaniwa Yosefa, lweyi a a li wa Tribunali la Wukhongeli la Xiyuda* naswona a a li wanuna wa ku lulama.+ 51 (Wanuna lweyi, a nga nyimanga na lona planu la ku dlaya Yesu.) A a li wa Arimateya, ku nga doropa la Yudiya, naswona a a nyimele ku ta ka Mfumu wa Xikwembu. 52 Wanuna lweyi a ye ka Pilatu a ya kombela ntsumbu wa Yesu. 53 Se a fika a wu hawula,+ a wu bohelela hi lensoli la ku phela swinene, a wu veka ka sirha leli nga txeliwa ka ribye,+ leli a ku nga se tshama ku lahliwa munhu ka lona. 54 Siku lelo a li li la ku Lunghiselela+ Savata+ hikusa se a li li kusuhi ni ku sungula. 55 Kambe vavasati lava nga ta na Yesu ku sukela Galileya, va ya sirheni, kutani va vona leswi ntsumbu wa yena a wu lahlisiwe xiswona,+ 56 va gama va tlhela va ya lunghiselela mafurha ya ku nun’hwela. Kambe va humulile hi Savata+ hi ku landza leswi nga tsaliwa ka Nawu.