Mahungu Ya Ku Tsakisa Ya Ku Tsaliwa Hi Matewu

28 Nkama siku la Savata li nga hundza, na li ya ku xeni, hi siku la ku sungula* la vhiki, Mariya Madalena na Mariya lweyi mun’wani va ta leswaku va ta vona sirha.+

2 Ku ve ni ku tsekatseka kakukulu ka misava hikusa ntsumi ya Yehovha* a yi xikile hi le tilweni, yi wumbuluta ribye yi gama yi tshama henhla ka lona.+ 3 A yi phatima ku fana ni ku hatima ka tilo naswona mpahla ya yona a yi base yi ku baa!+ 4 Se hi ku yi chava, vagwardu va rhurhumela naswona va voneka ingaku va yo fa.

5 Se ntsumi yi byela vavasati yi ku: “Mi nga chaveni hikusa na swi tiva swaku mi lavetela Yesu lweyi a nga dlayiwa ka mhandzi.+ 6 A nga kona lani, hikusa a pfuxiwile hi ku landza leswi a nga mi byela swona.+ Tanani, mi ta vona lomu ntsumbu wa yena a wu vekiwe kona. 7 Swoswi hantlisani mi ya byela vadjondzisiwa va yena swaku a pfuxiwile ku feni naswona mi ta ya mu kuma aGalileya;+ mi ta mu vona kohala. Khumbukani leswi ni nga mi byela swona.”+

8 Kutani hi ku kahlula va suka sirheni na va chava kambe na va tsakile swinene, va tsutsuma va ya byela vadjondzisiwa va yena.+ 9 Se Yesu a tlhangana na vona, a ku: “Xowani!” Se va mu tshinelela va mu khizamela va mu khoma minenge. 10 Kutani Yesu a ku: “Mi nga chaveni! Fambani mi ya byela vamakwerhu swaku va ya Galileya; kutani va ta ni vona kohala.”

11 Na va ha li ndleleni, masonchwa man’wani+ ma ye doropeni ma ya byela vaprista vavakulu swilo hinkwaswu leswi nga humelela. 12 Nkama se va nga tlhangana ni madoda naswona na va bulile hi mhaka leyi, va nyika masonchwa male* ya yinyingi hintamu, 13 va gama va ku: “Vulani mi ku: ‘Vadjondzisiwa va yena va tile niwusiku va ta mu yiva na hi yetlelile.’+ 14 Se nkama mhaka leyi yi nga ta fika ka tindleve ta Pilatu, mi nga karhatekeni, hi ta mu tlhamusela.” 15 Kutani ma teka male ma yendla leswi ma nga byeliwa swona; mhaka leyi yi tiviwe hi Vayuda va ku tala ku ta fikela namuntlha.

16 Kutani a 11 wa vadjondzisiwa va Yesu va ye Galileya+ lomu Yesu a a ta tlhangana na vona.+ 17 Nkama va nga mu vona va khizama, kambe van’wani va kanakana swaku hi yena. 18 Yesu a va tshinelela a ku: “Ni nyikiwe matimba ya ku fuma atilweni ni lani misaveni.+ 19 Hi mhaka leyo, fambani mi ya djondzisa vanhu va matiko hinkwawu leswaku va va vadjondzisiwa va mina,+ mi va tsakamisa+ hi vito la Papayi ni la N’wana ni la moya wa ku kwetsima, 20 mi va djondzisa ku yingisa hinkwaswu leswi ni nga mi byela swona.+ Phela ni na n’wina masiku hinkwawu anze ku fika magamu.”+