Mahungu Ya Ku Tsakisa Ya Ku Tsaliwa Hi Matewu
8 Nkama Yesu a nga xika ka ntshava, a landzeliwe hi vanhu va vanyingi. 2 Kutani ku ta munhu lweyi a nga ni mavabyi ya nhlokonho* a fika a mu khizamela, a ku: “Hosi, loko u swi lava, u nga ni hanyisa.”*+ 3 Se Yesu a tshandzavuta voko a mu khumba a ku: “Na swi lava! Hanyisiwa.”*+ Kutani a hanyisiwa ka mavabyi ya yena hi ku hantlisa.+ 4 Se Yesu a ku: “U nga byeli munhu mhaka leyi,+ kambe famba ka vaprista+ u fika u nyikela gandzelo leli Moxe a nga vula swaku li fanele li humesiwa,+ leswaku vaprista va ta tiyiseka swaku se u hanyisiwile.”
5 Nkama a nga nghena Kapernawume, murhangeli wa masonchwa* a tile ka yena, a fika a mu kombela+ 6 a ku: “Hosi,* mutirhi wa mina a yetlelisiwe ndlwini hileswi a nga biwa hi trombozi naswona a hlupheka swinene.” 7 Kutani Yesu a ku: “Loko ni fika kaya ka wena, ni ta mu hanyisa.” 8 Se murhangeli wa masonchwa a mu hlamula a ku: “Hosi, no va mani mina swaku u nghena kaya ka mina? Vula rito ntsena, kutani mutirhi wa mina a ta hanya. 9 Hikusa hambi mina ni nyikiwe matimba naswona ni ni masonchwa lawa ma nga hansi ka mina. Loko ni byela lin’we ni ku: ‘Famba!’ la famba, kasi loko ni byela lelin’wani ni ku: ‘Tani!’ la ta, ni loko ni byela mutirhi wa mina ni ku: ‘Yendla leswi!’ wa swi yendla.” 10 Nkama Yesu a nga twa leswo, a hlamala kutani a byela lava a va mu landzela a ku: “Ni mi byela ntiyiso, aIsrayele a ni kumanga munhu ni mun’we lweyi a nga ni lipfumelo lalikulu la ku fana ni leli.+ 11 Kambe na mi byela swaku va ku tala lava taka hi le wuxeni ni wupeladlambu va ta ta kutani va tshama* mezeni xikan’we na Abrahamu, Izaki na Yakobe ka Mfumu wa matilo;+ 12 kasi loko ku li vana va Mfumu wa matilo, va ta txukumeteliwa handle ka munyama; hi lanu va nga ta ba nkosi va tlhela va karhateka.”*+ 13 Kutani Yesu a byela murhangeli wa masonchwa a ku: “Famba. A swi yendleke hi ku ya hi lipfumelo la wena.”+ Se mutirhi a hanya hi nkama wolowo.+
14 Nkama Yesu a nga fika kaya ka Pedru, a vone mamani wa nsati wa Pedru+ na a yetlelile hikusa muzimbha wa yena a wu hiseta.+ 15 Se a khumba voko la yena,+ kutani a hanya; a gama a pfuka a sungula ku va lunghiselela swakudla. 16 Nkama li nga pela, va mu tisele vanhu va vanyingi lava nga ni madimoni, se a ma hlongola hi rito ntsena, naswona a hanyisa hinkwavu lava a va vabya; 17 leswaku ku hetiseka leswi nga vuliwa hi muprofeta Esaya, loko a ku: “A rhwale mavabyi ni swivavu swa hina.”+
18 Loko Yesu a vona xitshungu na xi mu rhendzelile, a byela vadjondzisiwa va yena swaku va famba na yena ka tlhelo lelin’wani la lwandle.+ 19 Kutani ku ta mutsali mun’wani a ku: “Mudjondzisi, ni ta ku landzela hinkwaku lomu u nga ta ya kona.”+ 20 Kambe Yesu a mu hlamula a ku: “Timbyana ta khwati* ti ni mintxele ni swinyanyani swi ni swisaka, kambe N’wana wa munhu a nga na ndhawu ya ku veka nhloko.”+ 21 Kutani mun’wani wa vadjondzisiwa va yena a ku: “Hosi, ni pfumeleli ni rhanga hi ku ya lahla papayi.”+ 22 Yesu a ku: “Tama u ni landzela, u tshika vafi va lahla vafi va vona.”+
23 Nkama a nga nghena ka boti, vadjondzisiwa va yena va mu landzile.+ 24 Kutani ku sungula ku ba xidzedze xaxikulu alwandle, lakakuva boti li mbhonyiwa hi magandlati; kambe yena a a yetlelile.+ 25 Se va ya mu pfuxa va ku: “Hosi, hi ponise, ha fa!” 26 Kambe a ku: “Hi mhaka muni mi chava, n’wina lava nga ni lipfumelo lalitsongo?”+ Se a pfuka, a kawuka moya ni lwandle, kutani ku va ni ku rhula kakukulu.+ 27 Se vadjondzisiwa va yena va hlamala va ku: “Kasi i munhu wa ku tshamisa ku yini lweyi, wa ku hambi moya ni lwandle swa mu yingisa?”
28 Loko a fika ka tlhelo lelin’wani ka doropa la Vagadala, a tlhangana ni vavanuna vambirhi lava nga ni madimoni na va huma simitela.*+ A va chavisa hintamu, lakakuva a ku nga na munhu lweyi a a tiyela ku hundza hi ndlela yoleyo. 29 Kutani va huwelela, va ku: “U lava yini ka hina, wena N’wana wa Xikwembu?+ U tele ku ta hi hlupha+ na nkama lowu nga vekiwa wu nge se fika?”+ 30 Le kulenyana na vona a ku ni ntlhambi wawukulu wa makhumba lawa a ma li ku dleni.+ 31 Se madimoni ma sungula ku mu kombela ma ku: “Loko u hi hlongola, hi rhumeli ka ntlhambi wa makhumba.”+ 32 Se a ku ka wona: “Fambani!” Se madimoni ma huma ma ya ka makhumba; kutani ntlhambi hinkwawu wu tsutsuma wu ya wela lwandle, wu fela matini. 33 Valusi va baleka va ya doropeni, va ya vula hinkwaswu leswi nga yendleka, ku patsa ni mhaka ya vavanuna lava a va ni madimoni. 34 Kutani vanhu hinkwavu va le doropeni va huma va ya tlhangana na Yesu; naswona nkama va nga mu vona, va mu kombelile swaku a suka ka tiko la vona.+