Mahungu Ya Ku Tsakisa Ya Ku Tsaliwa Hi Matewu

13 Hi siku lolelo, Yesu a huma ndlwini a ya tshama kusuhi ni lwandle; 2 kutani xitshungu xaxikulu xi hlengeletana xi mu landza. Se a khwela boti a tshama ka lona, kasi xitshungu hinkwaxu a xi nyimile tlhelweni ka lwandle.+ 3 Kutani a xi djondzisa swilo swa swinyingi hi ku tirhisa swifaniso+ a ku: “Mubyali a humile a ya byala timbewu+ 4 naswona loko a li ku byaleni, timbewu tin’wani ti wela tlhelweni ka ndlela, se ti dliwa hi swinyanyani.+ 5 Tin’wani ti wela ka maribye, lomu a ku nga na misava ya yinyingi, se ti mila hi ku hantlisa hi mhaka ya leswi misava ya kona a yi nga yentanga.+ 6 Kambe loko dlambu li tlhava, ti psha ti tlhela ti woma hi mhaka ya ku pfumala timintsu. 7 Timbewu tin’wani ti wela xikarhi ka mimintwa, kutani mimintwa yi kula yi yendla swaku ti nga kuli kahle.+ 8 Se tin’wanyani ti wela ka misava yayinene kutani ti sungula ku psala mihandzu: Mbewu yin’we yi psala 100 ku tlula leswi a swi byaliwile, leyin’wani 60, leyin’wanyani 30.+ 9 Lweyi a nga ni tindleve a a yingisi.”+

10 Kutani vadjondzisiwa va mu yela va fika va ku: “Hi mhaka muni u tirhisa swifaniso loko u va djondzisa?”+ 11 A va hlamula a ku: “N’wina mi nyikiwe ku twisisa swihundla swa ku kwetsima+ swa Mfumu wa matilo, kambe vona a va nyikiwanga. 12 Hikusa lweyi a nga ni xanchumu, a ta nyikiwa swa swinyingi; kambe lweyi a kalaka a nga na nchumu, a ta tekeliwa ni swaswitsongo leswi a nga na swona.+ 13 Hi leswo swi yendlaka ni tirhisa swifaniso loko ni vulavula na vona, hikusa va txuvuka kambe a va voni nchumu naswona va twa kambe a va yingisi, hambi ntsutsu wa mhaka a va wu kumi;+ 14 naswona wuprofeta la Esaya la hetiseka ka vona, leli nge: ‘Ku twa mi ta twa kambe a mi nga ta wu kuma ntsutsu wa mhaka naswona mi ta txuvuka kambe a mi nga ta vona nchumu,+ 15 hikusa timbilu ta vanhu lava ti tlanyalile; va tipfale tindleve ni matihlo swaku va nga ha voni ni ku yingisa va nga ha yingisi hi tindleve ta vona. Hi mhaka leyo, a va swi twisisi leswi laviwaka ka vona naswona a va tisoli leswaku ni va hanyisa.’+

16 “Kambe tsakani hikusa matihlo ya n’wina ma vona, ni tindleve ta n’wina ta yingisa.+ 17 Hikusa ni mi byela ntiyiso: Vaprofeta va vanyingi ni vanhu va ku lulama a va swi navela ku vona minchumu leyi mi yi vonaka kambe a va yi vonanga,+ ni ku twa minchumu leyi mi yi twaka kambe a va yi twanga.

18 “Yingisani ntlhamuselo wa xifaniso xa wanuna lweyi a nga byala mbewu.+ 19 Lweyi a twaka rungula la Mfumu kambe a nga li twisisi, Davulosi*+ wa ta a ta tsuvula leswi nga byaliwa ka mbilu ya yena. Mbewu leyi, hi leyi nga wa tlhelweni ka ndlela.+ 20 Se leyi nga wa ka maribye, hi lweyi a twaka rito a hantla a li yamukela hi ku tsaka.+ 21 Kambe a nga na timintsu ka mbilu ya yena naswona a kula swa nkamanyana, kutani loko a hluphiwa hi mhaka ya rito, wa li tshika. 22 Se leyi nga wa axikarhi ka mimintwa, hi lweyi a twaka rito, kambe ku vilela ka wutomi la masiku lawa+ ni ku navela ku ganya,* leswi kanganyisaka va vanyingi, swi kavanyeta rito li gama li nga psali mihandzu.+ 23 Kasi leyi nga wa ka misava yayinene, hi lweyi a twaka rito a tlhela a li twisisa, se a psala mihandzu ya yinyingi; yin’wani ka 100, yin’wanyani ka 60, kasi leyin’wanyani ka 30.”+

24 A va byela xifaniso xin’wani a ku: “Mfumu wa matilo wu nga fanisiwa ni wanuna lweyi a nga byala mbewu yayinene ka masimu ya yena. 25 Na vanhu va ha yetlelile, ku ta nala wa yena a ta byala mfava* axikarhi ka trigu a gama a tifambela. 26 Loko khava li kula li tlhela li psala mihandzu, ku humelele ni mfava. 27 Kutani vatirhi va n’winyi wa munti va ta va fika va ku: ‘Hosi, kasi a wu byalanga mbewu yayinene ka masimu ya wena ke? Se swi yendlekisa ku yini swaku ku va ni mfava?’ 28 A va hlamula a ku: ‘I nala a nga yendla leswi.’+ Va ku ka yena: ‘Wa swi lava swaku hi ya wu tsuvula ke?’ 29 A ku: ‘Wu tshikeni, hikusa loko mi ya tsuvula mfava, mi nga tshuka mi tsuvula ni trigu. 30 Swi tshikeni swi kula xikan’we anze ku fika nkama wa ku tshovela; kutani hi nkama wa ku tshovela ni ta byela vatshoveli ni ku: Rhangani hi ku tsuvula mfava, mi wu boha hi tinyandza leswaku wu hisiwa; hi wugamu, hlengeletani trigu ka ndhawu ya ku hlayisela ka yona swakudla.’”+

31 A va byela xifaniso xin’wani a ku: “Mfumu wa matilo wu fana ni mbewu ya sinapi,* leyi munhu a nga yi teka a ya yi byala ka nsimu ya yena.+ 32 Phela mbewu leyi i yitsongo hintamu ka timbewu hinkwatu, kambe loko yi mila yi tlula swinsinyani hinkwaswu hi ku kula, yi gama yi va nsinya, lakakuva swinyanyani swi yaka swisaka ka tigadja ta wona.”

33 A va byela xifaniso xin’wani a ku: “Mfumu wa matilo wu nga fanisiwa ni fermentu* leli wansati a nga li teka a li pfuva ni 10 wa makilu ya mpupu anze mpupu hinkwawu wu kukumuka.”+

34 Yesu a byele xitshungu timhaka leti hinkwatu hi ku tirhisa swifaniso. Phela a a nga vulavuli na vona na a nga tirhisi swifaniso+ 35 leswaku ku ta hetiseka leswi nga vuliwa hi muprofeta lweyi a nga te: “Ni ta pfula nomo wa mina hi ku tirhisa swifaniso, ni ta mi byela minchumu leyi a yi li xihundla ku sukela khale.”*+

36 Kutani loko se a chunse xitshungu xi famba, a nghene ndlwini. Se vadjondzisiwa va mu yela va ku: “Hi tlhamusele xifaniso xa mfava lowu nga masin’wini.” 37 A va hlamula a ku: “Mubyali wa mbewu yayinene i N’wana wa munhu; 38 nsimu i misava;+ a mbewu yayinene i vana va Mfumu; kambe mfava i vana va Davulosi,*+ 39 naswona nala lweyi a nga yi hlwanya i Davulosi. Se ntshovelo i nkama wa wugamu, naswona vatshoveli i tintsumi. 40 Hi mhaka leyo, ku fana ni leswi mfava wu tsuvuliwaka wu gama wu hisiwa, ku ta yendleka swoleswo hi nkama wa wugamu.+ 41 N’wana wa munhu a ta rhumela tintsumi ta yena, se ka Mfumu wa yena ti ta humesa hinkwavu lava yendlaka van’wani va djoha ni lava tlulaka nawu, 42 naswona ti ta va txukumetela ka xikhele xa ndzilu lowu pfurhaka.+ Hi lanu va nga ta ba nkosi va tlhela va karhateka.* 43 Hi nkama wolowo, lava ku lulama va ta phatima ngopfu ku fana ni dlambu+ ka Mfumu wa Papayi wa vona. Lweyi a nga ni tindleve a a yingisi.

44 “Mfumu wa matilo wu fana ni xuma lexi nga fihliwa masin’wini, lexi munhu a nga xi kuma a gama a xi fihla; naswona hi mhaka ya leswi a nga tsaka, a famba a ya xavisa minchumu hinkwayu leyi a nga na yona se a xava nsimu yoleyo.+

45 “Naswona Mfumu wa matilo wu fana ni muxavisi lweyi a fambaka a lava maperola yamanene. 46 Se loko a kuma perola lin’we la lisima swinene, a famba hi ku hantlisa a ya xavisa minchumu hinkwayu leyi a a li na yona kutani a li xava.+

47 “Naswona, Mfumu wa matilo wu fana ni redi* la ku phasa hi lona leli nga petiwa lwandle kutani li phasa tihlampfi ta mixaka hinkwayu. 48 Loko se li talile, va li kokela li huma handle ka lwandle, se loko va tshama hansi, va hlengeletela ta tinene+ ka mindzhava, kambe leti kalaka ti nga li tinene+ va ti txukumeta. 49 Swi ta yendlekisa swoleswo ni ka nkama wa wugamu. Tintsumi ti ta huma kutani ti hambanisa va ku biha ka va ku lulama, 50 kutani ti ta txukumetela vanhu va ku biha ka xikhele xa ndzilu lowu pfurhaka. Hi lanu va nga ta ba nkosi va tlhela va karhateka.*

51 “Indjhe mi ti twisisile timhaka leti hinkwatu?” Va mu hlamula va ku: “Ina.” 52 Se a ku: “Loko ku li leswo, mudjondzisi mun’wani ni mun’wani lweyi a djondzisiwaka hi ta Mfumu wa matilo a fana ni n’winyi wa yindlo, lweyi a humesaka minchumu ya nyuwani ni ya khale lomu a nga yi hlayisa kona.”

53 Nkama Yesu a nga gama ku va byela swifaniso leswi, a sukile lani a a li kona. 54 Loko a fika ka doropa leli a nga kulela ka lona,+ a sungula ku djondzisa ka sinagoga* la vona, va za va hlamala va ku: “Munhu lweyi a li kume kwini wutlharhi ni matimba ya ku yendla masingita lawa?+ 55 A hi yena n’wana wa karpinteru* lweyi?+ Mamani wa yena a hi Mariya, ni vamakwavu a hi Yakobe na Yosefa na Simoni na Yudasi ke?+ 56 Ni vamakwavu va xisati, a hi vona hinkwavu lava hi nga na vona lani? Se a swi kume kwini swilo leswi hinkwaswu?”+ 57 Kutani va sungula ku kala va nga ha pfumeli* ka yena hi mhaka ya leswi a nga swi vula ni ku swi yendla.+ Kambe Yesu a ku: “Vanhu va mu hlonipha muprofeta. Kambe a nga hloniphiwi ka tiko leli a nga kulela ka lona.”+ 58 Hi mhaka leyo, a nga yendlanga masingita ya manyingi kolanu hikusa a va nga na lipfumelo.