Mintirho Ya Vapostolo

14 Nkama na va li aIkoniya, va nghene ka sinagoga* la Vayuda, kutani va vulavula hi ndlela leyi nga yendla swaku vanhu va vanyingi lava nga Vayuda ni Vagriki va va vapfumeli. 2 Kambe Vayuda lava kalaka va nga pfumelanga va pfuxa mpfilumpfilu naswona va hlohlotela vanhu vamatiko swaku va lwisana na Pawulo na Barnaba.+ 3 Kambe Pawulo na Barnaba va tshame nkama wa wunyingi aIkoniya funtshi Yehovha* a va nyike matimba ya ku chumayela na va nga chavi nchumu; a va tirhisile leswaku va yendla masingita ni minchumu ya ku hlamalisa, ku kombisa swaku mahungu lawa a va ma chumayela lama vulavulaka hi timpsalu ta yena tatikulu, a ma li ntiyiso.+ 4 Kambe vanhu va vanyingi va le doropeni a va yavanile, van’wani a va nyima ni Vayuda kuve van’wanyani a va nyima ni vapostolo. 5 Nkama vanhu vamatiko ni Vayuda ku patsa ni tihosi ta vona va nga lava ku va hlupha ni ku va ba hi maribye,+ 6 va biwe ndleve hi mhaka leyi, se va baleka va ya Lixtra ni le Derbi ku nga madoropa ya Likawoniya, ni ka tindhawu ta le kusuhi.+ 7 Se va tame va chumayela mahungu ya ku tsakisa ka tindhawu toleto.

8 A ku ni wanuna mun’wani aLixtra lweyi a a limale minenge. A psaliwe na a limalile naswona a nga zanga a famba ni siku ni lin’we. 9 Wanuna lweyi, a a tshamile a yingisela Pawulo na a vulavula. Se Pawulo a mu txuvukisisa, a vona swaku wanuna lweyi a a ni lipfumelo funtshi a a tshemba swaku a ta hanyisiwa,+ 10 kutani Pawulo a huwelela a ku: “Sekeleka u nyima hi minenge ya wena.” Se wanuna lweyi a tlula a sungula ku famba.+ 11 Nkama vanhu va nga vona leswi Pawulo a nga swi yendla, va huwelele hi Xilikawoniya va ku: “Swikwembu swi tiyendle vanhu swi hi xikela!”+ 12 Se va sungula ku vitana Barnaba va ku i Zewusi, kambe Pawulo va ku i Herme, hikusa hi yena lweyi a a vulavula. 13 Muprista wa xikwembu lexi vitaniwaka Zewusi, lexi tempele ya xona a yi li ka nyanghwa wa doropa, a tise tihomu ni tiharhi ta swiluva ta ku saseka ka tinyanghwa naswona yena ni xitshungu a va lava ku yendlela Pawulo na Barnaba magandzelo.

14 Kambe nkama mupostolo Barnaba na Pawulo va nga swi twa, va handzule mpahla ya vona va ya xikarhi ka xitshungu na va huwelela va ku: 15 “Vavanuna, hi mhaka muni mi yendla leswi? Phela na hina hi vanhu va ku fana na n’wina.+ Hi mi byela mahungu ya ku tsakisa swaku mi ta tshika swilo leswi, leswi kalaka swi nga pfuni nchumu mi tlhelela ka Xikwembu lexi hanyaka, lexi nga yendla tilo, misava ni lwandle ni minchumu hinkwayu leyi nga ka swona.+ 16 Ka nkama lowu nga hundza xi tshike vanhu va matiko hinkwawu va tiyendlela ku rhandza;+ 17 kambe xi mi kombe swaku i Xikwembu xa ku tshamisa ku yini hi ku mi yendlela swaswinene,+ xi mi nisela timpfula ni ku mi nyika minkama ya ku tshovela,+ xi mi phamela mi xurha ni ku tsakisa timbilu ta n’wina.”+ 18 Hambileswi va nga va byela minchumu leyi, a va swi kotanga ku yendla xitshungu xi nga va yendleli magandzelo.

19 Kambe ku fike Vayuda lava a va ta hi le Antiyokiya ni le Ikoniya lava nga fika va hlohlotela xitshungu;+ se va ba Pawulo hi maribye, kutani va mu kokakoka va mu humesa handle ka doropa hikusa a va pimisa swaku se a file.+ 20 Kambe nkama vadjondzisiwa va nga mu rhendzela, a pfukile a nghena ka doropa. Hi mundzuku ka kona, Pawulo a fambe na Barnaba va ya Derbi.+ 21 Loko se va chumayele mahungu ya ku tsakisa ka doropa lolelo ni ku pfuna vanhu va vanyingi swaku va va vadjondzisiwa, va tlhelele Lixtra, Ikoniya ni le Antiyokiya. 22 Va tiyise vadjondzisiwa,+ va va khongotela swaku va tshama na va li ni lipfumelo la ku tiya va ku: “Hi fanele hi kumana ni swikarhatu swa swinyingi leswaku hi nghena ka Mfumu wa Xikwembu.”+ 23 Va tlhele va va vekela madoda ka bandla lin’wani ni lin’wani;+ va khongelile ni ku titsona swakudla,+ va gama va va nyikela ka Yehovha* lweyi va nga pfumela ka yena.

24 Kutani va tsemakanye hi le Pisidiya va ya fika Pamfiliya,+ 25 nkama va nga chumayela rito la Xikwembu aPerji, va game va ya Ataliya. 26 Na va li kolanu, va khwele boti va ya Antiyokiya, lomu Xikwembu xi nga va komba timpsalu tatikulu hi mhaka ya ntirho lowu se va nga wu heta.+

27 Nkama va nga fika, va tlhanganise bandla va li byela swilo swa swinyingi leswi Xikwembu xi nga swi yendla hi ku tirhisa vona, ni swaku xi pfulele vamatiko ndlela* ya leswaku va va vapfumeli.+ 28 Se va tshama nkama wa wunyingi ni vadjondzisiwa.