Tihosi Ta Ku Sungula

19 Akabu+ a byele Jezabele+ hinkwaswu leswi Eliya a nga swi yendla ni leswi a nga va dlayisa swona vaprofeta hinkwavu hi xipada.+ 2 A nkama Jezabele a nga twa leswo a rhuma munhu a ya ka Eliya a fika a ku: “Swikwembu a swi ni khatisi hintamu loko mundzuku ko ba nkama lowu na ni nga ku yendlanga hinkwaswu leswi u nga swi yendla ka vaprofeta lavaya!” 3 Eliya a sungula ku chava, se a baleka swaku a ta ponisa wutomi la yena.+ A fike aBerxeba+ ku nga doropa la Yuda,+ a siya mupfunisi wa yena kolanu. 4 A ye mananga a gama a famba siku hinkwalu, a fika a tshama hansi ka nsinya wa nkukulu, a kombela swaku a fa. A ku: “A na ha gwenti! Yehovha Xikwembu xa mina, ni kombela u ni dlaya,+ hikusa a ni va tluli hi nchumu vavhovho va mina.”

5 A game a yetlela hansi ka nsinya wolowo a kuma wurhongo. Se ntsumi yi mu hlakahla+ yi ku: “Pfuka u dla.”+ 6 A nkama a nga txuvuka kusuhi ni nhloko ya yena, a ku li ni pawu la redondu leli a li li henhla ka maribye ya ku hisa ni khuwani lalitsongo la mati. Se a dla, a phuza a tlhela a yetlela. 7 Hi nkama wun’wani ntsumi ya Yehovha yi tlhela yi ta ka wumbirhi yi fika yi mu hlakahla, yi ku: “Pfuka u dla, hikusa lipfhumba la wena la ha li likulu hintamu.” 8 Kutani a pfuka a dla a tlhela a phuza. Swakudla leswi swi mu nyike ntamu wa ku famba 40 wa masiku, wusiku ni nhlikanhi, anze a ya fika Horebi, ka ntshava ya Xikwembu xa ntiyiso.+

9 A fike a nghena ka mhakwa*+ a yetlela kona wusiku hinkwalu; Yehovha a gama a mu vutisa, a ku: “Eliya, u yendla yini lani?” 10 Se a hlamula a ku: “Ni tinyiketele hi mbilu hinkwayu ka wena Yehovha Xikwembu, murhangeli wa tintsumi;+ kambe Vayisrayele va tshike ntwananu wa wena,+ va tlhela va dilizela maaltari ya wena, va dlaye vaprofeta va wena hi xipada,+ ku yo sala mina ntsena. Kutani swoswi va lava ku ni dlaya.”+ 11 Kambe Yehovha a ku: “Huma u ya nyima ka ntshava aphambheni ka mina.” Hi nkama wolowo Yehovha a a hundza+ naswona moya wawukulu wa matimba a wu pandza tintshava, wu dilizela maribye phambheni ka Yehovha,+ kambe Yehovha a a nga li kona ka moya wolowo. Nkama ku nga hundza moya lowu ku ve ni ku tsekatseka ka misava,+ kambe Yehovha a a nga li kona ka ku tsekatseka koloko ka misava. 12 Nkama ku nga hela ku tsekatseka ka misava, ku ve ni ndzilu,+ kambe Yehovha a a nga li kona ka ndzilu wolowo. Nkama ndzilu wu nga hela ku ve ni rito la ku rhula leli a li twalela hansi.+ 13 Hi ku hantlisa nkama Eliya a nga twa rito leli, a timbhonya nghohe* hi nguvu ya yena leyi a yi yambaliwa hi vaprofeta,+ a huma a nyima ka nyanghwa wa mhakwa. A tlhela a twa rito leli li ku: “Eliya, u yendla yini lani?” 14 Se a hlamula a ku: “Ni tinyiketele hi mbilu hinkwayu ka wena Yehovha Xikwembu, murhangeli wa tintsumi; kambe Vayisrayele va tshike ntwananu wa wena,+ va tlhela va dilizela maaltari ya wena, va dlaye vaprofeta va wena hi xipada, ku yo sala mina ntsena. Kutani swoswi va lava ku ni dlaya.”+

15 Yehovha a mu byela a ku: “Tlhela u ya mananga ya Damaxka. Loko u fika kona, veka Azayele+ leswaku a va hosi ya Siriya. 16 Naswona u fanele u veka Yewu+ ntukulu wa Nimxi swaku a va hosi ya Israyele, u tlhela u veka Elixa* n’wana wa Xafati wa le Abel-Mehola swaku a va muprofeta a pfaleta wena.+ 17 Lweyi a nga ta pona ku dlayiwa hi xipada xa Azayele,+ a ta dlayiwa hi Yewu;+ kasi lweyi a nga ta pona ku dlayiwa hi xipada xa Yewu, a ta dlayiwa hi Elixa.+ 18 Na ha ni 7.000 wa Vayisrayele,+ lava kalaka va nga khizamanga va gandzela Bali+ ni lava kalaka va nga mu bejaranga.”*+

19 Se a famba, a gama a ya kuma Elixa n’wana wa Xafati na a rima; a ku ni 24 wa tihomu phambheni ka yena, leti a ti patsiwe hi timbirhitimbirhi swaku ti rima. Yena a a rima hi tihomu timbirhi ta wugamu. Eliya a mu yela a fika a hoxa nguvu ya yena leyi a yi yambaliwa hi vaprofeta+ ahenhla ka yena. 20 Kutani a siya tihomu, a landza Eliya hi ku tsutsuma, a fika a ku: “Ni kombela u ni tshika ni ya vhalelisa* papayi na mamani. Ni ta gama ni ku landzela.” Eliya a ku: “Famba, u tlhela u vuya, a ni ku tsimbisanga.” 21 Se a tlhela, a teka tihomu timbirhi a yendla magandzelo hi tona; a sweke nyama ya tona hi mapulangu ya magedjo* ni ya makange* ya tihomu a gama a phamela vanhu va dla. Loko va hetile a game a landzela Eliya a sungula ku mu tirhela.+