Vayavanyisi

2 Se ntsumi ya Yehovha+ yi suka Jiligali+ yi ya Boximi, yi fika yi byela Vayisrayele yi ku: “Ni mi humese Gibita ni mi yisa ka tiko leli ni nga tshembisa ku li nyika vavhovho va n’wina.+ Ni tlhele ni ku: ‘A ni nga ta wu tshika ntwananu lowu ni nga wu yendla na n’wina.+ 2 Se n’wina a mi fanelanga mi yendla ntwananu ni vanhu lava tshamaka ka tiko leli,+ mi fanele mi dilizela maaltari ya vona.’+ Kambe a mi swi yingisanga leswi ni nga mi byela swona.+ Hi mhaka muni mi nga ni yingisanga? 3 Hi leswo swi nga ni yendla ni tlhela ni ku: ‘A ni nga ta va hlongola xikarhi ka n’wina,+ va ta fana ni ntlhamu ka n’wina,+ naswona va ta mi xenga swaku mi gandzela swikwembu swa vona.’”+

4 A nkama ntsumi ya Yehovha yi nga byela Vayisrayele marito lawa, va sungule ku rila hintamu. 5 Se va chula ndhawu liyani swaku i Boximi* va tlhela va yendlela Yehovha magandzelo kolanu.

6 Nkama Yoxuwa a nga tshika Vayisrayele va famba, va ye ka tindhawu leti va nga nyikiwa swaku ti va tshomba la vona, va fika va ti teka ti va ta vona.+ 7 Vanhu va tame va tirhela Yehovha na Yoxuwa wa ha hanya. Va tame va mu tirhela hambi Yoxuwa se a file, na ku yo sala madoda lawa ma nga hanya ka nkama wa yena, lawa ma nga vona minchumu hinkwayu leyi Yehovha a nga yi yendlela Vayisrayele.+ 8 Se Yoxuwa n’wana wa Nuni, mutirheli wa Yehovha, a fa na a ni 110 wa malembe.+ 9 Va mu lahla ka ndhawu leyi nga tshomba la yena aTiminati-Eresi,+ ka ndhawu ya tintshava ya Efrayimi, hi tlhelo la norte* ka Ntshava ya Gaxi.+ 10 Vanhu hinkwavu lava nga hanya hi nkama wa Yoxuwa na vona va game va fa. Se ku sala ku psaliwa vanhu van’wani lava a va nga mu tivi Yehovha ni leswi a nga swi yendlela Vayisrayele.

11 Kutani Vayisrayele va sungula ku yendlela Yehovha swilo swa ku biha va tlhela va gandzela swikwembu leswi vitaniwaka Vabali.+ 12 Va tshike Yehovha Xikwembu xa vapapayi va vona, lweyi a nga va humesa Gibita,+ va ya gandzela swikwembu swa vanhu lava a va li kusuhi na vona,+ va swi khizamela, va mu kwatisa Yehovha.+ 13 Va tshike ku tirhela Yehovha va ya gandzela Bali ni swifaniso swa Axitoreti.+ 14 Se Yehovha a va kwatela hintamu Vayisrayele, a gama a va nyikela ka valala va vona lava va nga va hlasela va va tekela swilo swa vona.+ A va xavisile ka valala va vona lava a va tshama kusuhi na vona;+ naswona a va nga ha swi koti ku lwa na vona.+ 15 Yehovha a a lwa na vona hinkwaku lomu a va ya kona. Yehovha a va tisela makhombo+ hi ku ya hi leswi a a swi vulile; naswona va hlupheke hintamu,+ ku nga leswi Yehovha a a swi fungile.+ 16 Se Yehovha a va vekela vayavanyisi lava a va ta va ponisa ka valala va vona.+

17 Kambe va yale ku yingisa vayavanyisi volavo; naswona ku fana ni tinghwavani va tinyikele ka swikwembu swin’wani va tlhela va swi khizamela. A va hlwelanga ku tshika ndlela ya vavhovho va vona, lava a va yingisa minawu ya Yehovha.+ Phela a va nga fani ni vavhovho va vona. 18 Nkama lowu Yehovha a a va vekela vayavanyisi,+ Yehovha a a pfuna muyavanyisi yelweyo, naswona a a va ponisa ka valala va vona loko muyavanyisi yelweyo wa ha hanya. Yehovha a a yendla leswo hikusa a a va twela wusiwana+ hileswi a va hluphiwa hi valala va vona.+

19 Kambe loko muyavanyisi a fa, a va tlhela va yendla swilo swa ku biha hintamu ku tlula leswi a swi yendliwa hi vapapayi va vona. A va tirhela swikwembu swin’wani va tlhela va swi khizamela,+ a va swi tshikanga swilo swa ku biha leswi a va swi yendla. 20 Leswo swi yendle swaku Yehovha a za a va kwatela hintamu Vayisrayele,+ se a va byela a ku: “Leswi mi kalaka mi nga wu yingisanga ntwananu+ lowu ni nga wu yendla ni vavhovho va n’wina, ni leswi mi kalaka mi nga ni yingisanga,+ 21 na mina a ni nga ta ma hlongola matiko lawa Yoxuwa a kalaka a nga ma hlulanga nkama na a ha hanya.+ 22 Leswo ni swi yendlele ku ringa Vayisrayele, ni ta vona leswaku va ta yi yingisa minawu ya mina Yehovha+ ku fana ni vapapayi va vona, kumbe a va nga ta yi yingisa.” 23 Hi leswo swi nga yendla Yehovha a tshika matiko wolawo ma tshama na vona. A nga tekelanga ku ma hlongola; naswona a nga ma nyikelanga ka mavoko ya Yoxuwa.