Yohani Wa Wunharhu

1 Mina wanuna lweyi a nga kula,* ni tsalela wena Gayo makwerhu lweyi ni mu rhandzaka swinene.

2 Makwerhu wa ku rhandzeka, ni khongelela swaku swilo swi ku fambela kahle awuton’wini, u tlhela u hanya kahle ku fana ni swoswi. 3 Hikusa ni tsake ngopfu loko ku te vamakwerhu va fika va ni byela swaku wa ha khome swi tiya antiyisweni naswona wa ha tama u famba ntiyisweni.+ 4 Ni tsaka hintamu hi ku twa swaku vana va mina va ha tama va famba ntiyisweni.+

5 Makwerhu wa ku rhandzeka, wa tshembeka ka leswi u swi yendlelaka vamakwerhu hambileswi u kalaka u nga va tivi.+ 6 Va byele ni bandla hi ta lirhandzu la wena. Nkama va nga ta suka kolanu, ni kombela u va khoma hi ndlela leyi nga ta tsakisa Xikwembu.+ 7 Hikusa va sukile va ya chumayela hi mhaka ya vito la Xikwembu naswona a va nga nyimelanga ku kuma nchumu+ ka vanhu vamatiko. 8 Se hi boheka ku va yamukela kahle vanhu va ku tshamisa xileswo,+ leswaku hi ta tirhisana na vona ntiyisweni.+

9 Ni tshame ni tsala karta* ni tsalela bandla, kambe Diyotrefu lweyi a rhandzaka ku tiyendla wamukulu xikarhi ka vamakwavu,+ a nga ma hloniphi marito hinkwawu lawa hi ma vulaka.+ 10 Nkama ni nga ta ta, ni ta paluxa leswi a swi yendlaka hikusa a hangalasa mavunhwa hi hina.*+ A nga yendli leswo ntsena, a tlhela a yala ku yamukela vamakwerhu+ hi xihlonipho; naswona a zama ku sivela lava lavaka ku va yamukela a tlhela a va hlongola bandleni.

11 Makwerhu wa ku rhandzeka, u nga tekeleli swa ku biha, kambe tekelela swaswinene.+ Lweyi a yendlaka swaswinene a huma ka Xikwembu.+ Lweyi a yendlaka swa ku biha a nga se xi vona Xikwembu.+ 12 Vamakwerhu hinkwavu va vulavula kahle hi Dimetriyu naswona leswi a hanyisaka xiswona swi fambisana ni ntiyiso. Na hina ha mu fakazela naswona wa swi tiva swaku leswi hi swi vulaka i ntiyiso.

13 Ni ni swa swinyingi swa ku ku tsalela swona, kambe a ni nge ku tsaleli hinkwaswu hi tinta ka papela. 14 Kambe ni tshemba swaku ni ta ku vona hi ku hantlisa naswona hi ta vulavula na hi vonana.

Ni ku navelela ku rhula.

Vamakwerhu va ku rungula. Ni runguleli vamakwerhu hi mun’we hi mun’we.