Mahungu Ya Ku Tsakisa Ya Ku Tsaliwa Hi Matewu
3 Ka masiku wolawo, Yohani+ Mutsakamisi a a chumayela+ amananga ya Yudiya, 2 a ku: “Tisoleni hikusa Mfumu wa matilo wu kusuhi.”+ 3 Phela leswi hi leswi nga vuliwa hi muprofeta Esaya+ nkama a nga ku: “Ku ni lweyi a huwelelaka amananga a ku: ‘Lunghiselelani ndlela ya Yehovha!* Khulani tindlela ta yena ti basa.’”+ 4 Yohani a a yambala mpahla ya ku yendliwa hi mavoya ya kamela, a a boha bandhi la xikhumba ka masenge+ naswona a a dla mintete ni wulombe la tinyoxi.+ 5 Kutani vanhu va le Yerusalema ni va tiko hinkwalu la Yudiya ni va tiko hinkwalu la le kusuhi ni Yordani va huma va ya ka yena.+ 6 A a tsakamisa vanhu ka Nambu wa Yordani,+ na va vula swidjoho swa vona hinkwaswu.
7 Nkama a nga vona Vafarisi ni Vasaduki+ va vanyingi na va ta ku tsakamisiweni, a va byele a ku: “N’wina vana va tinyoka,*+ i mani lweyi a nga mi byela swaku mi nga swi kota ku baleka ku kwata ka siku la Xikwembu?+ 8 Yendlani mintirho leyi kombisaka swaku mi tisolile. 9 Mi nga tshuki mi tibyela mi ku: ‘Papayi wa hina i Abrahamu.’+ Hikusa na mi byela swaku Xikwembu xi nga mu yendlela vana Abrahamu hi maribye lawa. 10 A bewula se li lunghekile swaku li tsema timintsu ta nsinya. Kutani nsinya wun’wani ni wun’wani lowu kalaka wu nga psali mihandzu yayinene, wu ta tsemiwa wu hoxiwa ka ndzilu.+ 11 Mina ni mi tsakamisa hi mati hi mhaka ya leswi mi nga tisola;+ kambe lweyi a taka, wa ni tlula hi matimba naswona a swi ni faneli ku mu hlivila masandaliya ya yena.+ Yena a ta mi tsakamisa hi moya wa ku kwetsima+ ni hi ndzilu.+ 12 A khome foxolo leswaku a hambanisa trigu ka mabyanyi, a ta basisa kahle lomu trigu li huleliwaka kona, kutani a trigu a ta li chela ka ndhawu ya ku hlayisa swakudla, se a muhungu a ta wu hisa hi ndzilu+ wa ku kala wu nga timeki.”
13 Kutani Yesu a suka Galileya a ya Yordani ka Yohani, kuva a ta tsakamisiwa hi yena.+ 14 Kambe Yohani a zama ku yala a ku: “Hi wena u faneleke u ni tsakamisa, se hi mhaka muni u ta ka mina?” 15 Yesu a mu hlamula a ku: “U nga ni siveli, leswaku hi ta kota ku hetisisa hinkwaswu leswi Xikwembu xi swi lavaka.” Kutani a pfumela. 16 Nkama Yesu a nga gama ku tsakamisiwa, a hume hi ku hantlisa amatini; se matilo ma pfuleka,+ a vona moya wa ku kwetsima wa Xikwembu wu xika ku fana ni xituvani, wu xikela henhla ka yena.+ 17 Ku tlhela ku twala rito leli taka hi matilweni+ li ku: “Lweyi i N’wana wa mina+ lweyi ni mu rhandzaka, lweyi ni mu tsakelaka.”+