Mahungu Ya Ku Tsakisa Ya Ku Tsaliwa Hi Marka

13 Nkama a nga huma tempeleni, mun’wani wa vadjondzisiwa va yena a ku: “Mudjondzisi, hi nga vona ku saseka ka maribye ni makhumbi lawa ya tempele!”+ 2 Kambe Yesu a ku: “A ni li ma ti vona tiyindlo leti tatikulu? Maribye hinkwawu lawa ma nga lani ma ta diliziwa naswona a li kona ni lin’we li nga ta sala henhla ka lin’wani.”+

3 Loko a ha tshame ka Ntshava ya Mawolivhera na a txuvukane ni tempele, Pedru, Yakobe, Yohani na Andre va mu vutisa na va li voxe va ku: 4 “Hi nga hi byela, swi ta yendleka siku muni swilo leswi naswona xi ta va xihi xikombiso xa nkama lowu swilo leswi hinkwaswu swi nga ta hela hi wona?”+ 5 Yesu a sungula ku va byela a ku: “Tivoneleni swaku mi nga tshuki mi kanganyisiwa hi munhu.+ 6 Va ku tala va ta ta hi vito la mina va ku: ‘Hi mina Kreste!’ naswona va ta kanganyisa va ku tala. 7 Ku tlula leswo, loko mi twa hi ta tinyimpi ni mahungu ya tinyimpi, mi nga chaveni; swilo leswi swi fanele swi yendleka; kambe magamu ma ta va ma nga se fika.+

8 “Hikusa matiko ma ta lwa hi xiwona, ni mimfumu yi ta lwa hi xiyona,+ ku ta va ni ku tsekatseka ka misava ka tindhawu ta ku hambanahambana naswona ku ta pfumaleka swakudla.+ Swilo leswi i ku sungula ka swikarhatu.*+

9 “Tivoneleni, vanhu va ta mi yisa matribunali+ naswona mi ta bukuteliwa ka masinagoga*+ mi tlhela mi thethisiwa phambheni ka vagovhernadori ni ka tihosi hi mhaka ya mina swaku mi nyikela wumboni ka vona.+ 10 Naswona, ku fanele ku rhanga ku chumayeliwa mahungu ya ku tsakisa amisaveni hinkwayu.+ 11 Funtshi loko va mi khoma va mi yisa ka vayavanyisi, mi nga karhatekeni hi leswi mi nga ta swi hlaya kambe hlayani leswi mi nga ta nyikiwa swona hi nkama wolowo, hikusa a hi n’wina mi vulavulaka kambe ku vulavula moya wa ku kwetsima.+ 12 Ku tlula leswo, makwavu a ta nyikela makwavu swaku a dlayiwa, papayi a nyikela n’wana, kasi vana va ta terekela vapsali, va yendla swaku va dlayiwa.+ 13 Naswona mi ta nyenyiwa hi vanhu hinkwavu hi mhaka ya vito la mina.+ Kambe lweyi a nga ta tiyisela* anze magamu+ hi yena lweyi a nga ta ponisiwa.+

14 “Kambe nkama mi nga ta vona nchumu xa ku nyenyentsa lexi wonhetelaka+ na xi nyime xi ku dzii lomu xi kalaka xi nga fanelanga xi nyima kona (mulerhi a a twisisi), lava nga Yudiya a va baleke va ya ka tintshava.+ 15 Lweyi a nga henhla ka yindlo* a nga xiki, hambi ku nghena ndlwini a humesa xanchumu; 16 naswona lweyi a nga masin’wini a nga tshuki a tlhela kaya a ya teka mpahla ya yena. 17 Phela swi ta va karhatela ndjhani vavasati lava nga ni tinyimba ni lava yan’wisaka vana ka masiku wolawo!+ 18 Tamani mi khongelela swaku leswo swi nga kotlani ni wuxika, 19 hikusa masiku wolawo ma ta va masiku ya nhlomulu+ lowu ku nge se tshamaka ku humelela wa ku fana na wona ku sukela nkama Xikwembu xi nga tumbuluxa swilo hinkwaswu ku ta fikela hi nkama wolowo, naswona a wu nga ha ta tlhela wu va kona.+ 20 Phela loko Yehovha* a a nga ma pumbanga masiku wolawo, a ku na munhu lweyi a a ta pona. Kambe masiku wolawo a ma pumbile hi mhaka ya vanhu lava a nga va langa.+

21 “Hi nkama wolowo, loko munhu a mi byela a ku: ‘Vonani! Hi lweyi Kreste!’ kumbe: ‘Vonani! Hi lwiya!’ mi nga swi kholweni.+ 22 Hikusa ku ta va ni lava nga ta hemba va tivula Kreste ku tlhela ku va ni vaprofeta va mavunhwa+ naswona va ta yendla masingita ni swilo swa ku hlamalisa leswaku va kanganyisa lava va nga langiwa loko swi koteka. 23 Se n’wina tivoneleni!+ Ni mi byele swilo leswi hinkwaswu na swi nge se yendleka.

24 “Kambe ka masiku wolawo, loko nhlomulu wolowo wu hela, dlambu li ta txintxa li va la ntima, n’weti a wu nge he voningi,+ 25 tinyeleti ti ta wa hi le tilweni ni matimba lama nga matilweni ma ta tsekatsekisiwa. 26 Va ta gama va vona N’wana wa munhu+ a ta na a li ka marhefu hi matimba yamakulu ni ku phatima.+ 27 Kutani a ta rhuma tintsumi naswona ti ta hlengeleta lava va nga langiwa hi yena na va ta hi ka matlhelo hinkwawu ya misava,* ku suka magamu ka misava ku ya fika magamu ka matilo.+

28 “Djondzani ka xifaniso xa nsinya wa nkuwa: Loko swigadjani swa wona swi sungula ku hluka, ma swi tiva swaku malanga* ma le kusuhi.+ 29 Hi ku fana, na n’wina loko mi vona swilo leswi swi yendleka, swi tiveni swaku N’wana wa munhu a le kusuhi, ka swipfalu.+ 30 Ni mi byela ntiyiso: Vanhu va nkama lowu* a va nge fi va hela na swilo leswi hinkwaswu swi nge se yendleka.+ 31 Tilo ni misava swi ta hundza,+ kambe marito ya mina ma ta tshama hi masiku ni masiku.+

32 “A siku la kona kumbe nkama wa kona, a swi tiviwi hi munhu, hambi ku li tintsumi le tilweni kumbe N’wana a va swi tivi, kambe swi tiviwa hi Papayi.+ 33 Tshamani na mi rindzile, tshamani mi pfule matihlo,+ hikusa a mi wu tivi nkama wa kona.+ 34 Swi fana ni munhu lweyi a yendzelaka tiko la le kule, a siya munti wa yena ni vatirhi va yena+ a va yavela mintirho leyi va faneleke va sala va yi yendla, a tlhela a byela murindzi swaku a tshama na a rindzile.+ 35 Hi mhaka leyo, tshamani na mi pfulile matihlo, hikusa a mi swi tivi swaku n’winyi wa munti a ta fika siku muni,+ swi nga yendleka a fika loko li ya ku peleni kumbe xikarhi ka wusiku kumbe nimpundzu* kumbe nimixo,+ 36 leswaku loko a fika kola na kola, a nga mi kumi na mi yetlelile.+ 37 Kambe leswi ni mi byelaka swona, ni swi byela hinkwavu: Tshamani na mi rindzile.”+