Vakorinto Va Ku Sungula
16 Loko ku li muhlengo lowu humeseliwaka vakwetsimi,+ swi yendliseni leswi ni nga ma byelisa swona mabandla ya Galatiya. 2 Hi siku la ku sungula* la vhiki, mun’wani ni mun’wani wa n’wina a a veki xanchumu hi ku ya hi leswi a nga na swona swaku a nkama ni nga ta fika ku nga humesiwi mihlengo. 3 Kambe loko ni fika seno, ni ta rhuma vavanuna lava mi nga tsala swaku va tshembeka ka makarta ya n’wina+ swaku va heleketa minyikelo leyi mi nga yi humesa hi ku swi rhandza aYerusalema. 4 Kambe loko swi fanela swaku na mina ni ya kona, ni ta famba na vona.
5 Kambe ni ta ta ka n’wina loko se ni hundze hi Makedoniya hikusa ni lava ku ya kona;+ 6 swi nga ha yendleka ni tshama nkamanyana na n’wina anze ku hela wuxika swaku mi ta ni heleketanyana lomu ni yaka kona. 7 A ni lavi ku mi vona ingaku no hundza hi ndlela hikusa na tshemba swaku ni ta tshama na n’wina nkamanyana+ loko Yehovha* a swi lava. 8 Kambe na ha ta tshama lani Efeza+ anze ku fika Fexta la Pentekoxta, 9 hikusa Xikwembu xi ni pfulele xipfalu xaxikulu swaku ni yendla ntirho wa Hosi,+ kambe ku ni valala va vanyingi.
10 Loko Timotiya+ a fika, tirhisanani kahle na yena swaku a chunseka loko a li na n’wina, hikusa a yendla ntirho wa Yehovha*+ ku fana na mina. 11 Se mi nga mu voneleni hansi. Mu heleketeni hi ku rhula swaku a ta halenu hikusa mina ni vamakwerhu hi mu nyimelile.
12 Ni kombele makwerhu Apolosi+ swaku a ta ka n’wina ni vamakwerhu. A nga ta swi kota ku ta swoswi, kambe a ta ta loko a kuma nkama.
13 Khindlimukani,+ mi tiya a ku pfumeleni ka n’wina,+ tamani mi tiya nhlana,*+ mi va ni ntamu.+ 14 Yendlani hinkwaswu hi lirhandzu.+
15 Ma swi tiva swaku vandjangu wa ka Stefanasi hi vona va ku rhanga ku va vadjondzisiwa aAkaya ni swaku va tinyiketele ku tirhela vakwetsimi. Se vamakwerhu na mi kombela: 16 Tivekeni hansi ka vanhu va ku tshamisa xileswo ni ka hinkwavu lava tirhisanaka na n’wina va tlhela va tirha hi matimba.+ 17 Kambe na tsaka hi leswi Stefanasi+ na Fortunatu na Akayiku va nga na mina lani, hikusa va yendle leswi a mi ta swi yendla loko a mi li lani. 18 Hikusa va rhulise mbilu ya mina ni ya n’wina. Se va hlonipheni vanhu va ku tshamisa xileswo.
19 Mabandla ya le Aziya ma mi rungula. Akila na Prisila ni bandla leli hlengemelaka kaya ka vona+ va mi rungula swinene aHosini. 20 Vamakwerhu hinkwavu va mi rungula. Xowetanani hi lirhandzu.*
21 Mina Pawulo ni mi tsalela marungula lawa hi voko la mina.
22 A a yavanyisiwe munhu lweyi a kalaka a nga yi rhandzi Hosi. Tani, Hosi ya hina! 23 Timpsalu tatikulu ta Hosi Yesu a ti ve na n’wina. 24 Lirhandzu la mina a li ve na n’wina hinkwenu lava nga vadjondzisiwa va Kreste Yesu.