Vakorinto Va Wumbirhi

7 Se varhandziwa, leswi hi nga nyikiwa switshembiso leswi,+ a hi tibasiseni ka swilo hinkwaswu leswi chakisaka muzimbha ni mbilu,*+ hi kwetsima hi ku helela hileswi hi chavaka Xikwembu.

2 Hi pfuleleni timbilu ta n’wina.+ A hi djohelanga munhu, a hi vavisanga munhu, naswona a hi xololanga munhu.+ 3 A ni vuli leswo hi ku lava ku mi nyika nandzu. Hikusa se ni mi byelile swaku mi le timbilwini ta hina hambiloko hi hanya kumbe hi fa. 4 Ni vulavula na n’wina na ni chunsekile. Ni tibuma ngopfu hi n’wina. Ni tiyisiwile swinene, ni tlhela ni tsaka hintamu ka mahlomulu ya hina hinkwawu.+

5 Phela a hi humulanga nkama hi nga fika Makedoniya,+ kambe hi tame hi hlupheka hi tindlela ta ku hambanahambana. Vanhu a va lwa na hina naswona a hi vilela hi mhaka ya mabandla. 6 Kambe Xikwembu lexi tiyisaka lava nga tshoveka timbilu+ xi hi tiyisile hi ku ta ka Tito; 7 ku nga li hi ku ta ka yena ntsena kambe ni hi mhaka ya leswi mi nga mu tiyisisa xiswona. A hi byele swaku mi ni xuva swinene ni leswaku ma karhateka hintamu hi mina naswona mi ni twela wusiwana; leswo swi ni tsakise ngopfu.

8 Hikusa hambiloko ni mi kwatisile hi karta la mina,+ a ni tilayi hi swona. Hambiloko ni tilayile ku sunguleni, (hi ku vona swaku karta leliyani li mi kwatisile kambe swi ve swa nkamanyana), 9 swoswi na tsaka, ku nga li hileswi mi nga vaviseka kambe hileswi ku vaviseka ka n’wina ku nga mi yendla mi tilaya. Hikusa a mi vavisekile hi ndlela leyi tsakisaka Xikwembu, kutani a mi luzekeliwanga hi nchumu hi mhaka ya hina. 10 Hikusa ku vaviseka hi ndlela leyi tsakisaka Xikwembu swi yendla swaku munhu a tilaya,+ se ku tilaya koloko ku yisa ku ponisiweni naswona leswo a nge tisoli hi swona; kasi ku vaviseka ka misava ku yisa ku feni. 11 Vonani mihandzu leyi nga kona hileswi mi nga vaviseka hi ndlela ya ku tsakisa Xikwembu: Mi tibasisile, mi vaviseka hi swilo swa ku biha leswi mi nga swi yendla, mi hlonipha hintamu Xikwembu, mi navela swaswinene, mi tirhela Xikwembu hi mbilu hinkwayu mi tlhela mi lulamisa swihoxo!+ Mi swi kombisile hi tindlela hinkwatu swaku mi tengile* ka mhaka leyi. 12 Hambileswi ni nga mi tsalela karta, a ni nga mi tsaleli hi mhaka ya lweyi a nga yendla xidjoho+ kumbe lweyi a nga djoheliwa, kambe ni mi tsalele swaku mi swi kombisa phambheni ka Xikwembu swaku ma hi yingisa. 13 Leswo hi swona swi nga hi tiyisa.

Kambe a hi yo tiyisiwa ntsena, hi tsake hintamu hi mhaka ya leswi Tito a a tsakile hileswi hinkwenu mi nga mu tiyisa. 14 A swi ni danisanga loko ni tibuma phambheni ka yena hi mhaka ya n’wina. Phela hinkwaswu leswi hi nga mi byela swona i ntiyiso, ni leswi hi nga tibuma hi swona phambheni ka Tito i ntiyiso. 15 Naswona loko a khumbuka ku yingisa ka n’wina hinkwenu+ ni ndlela leyi mi nga mu yamukela hi yona hi ku chava ni ku rhurhumela, swi yendla swaku a mi rhandza hintamu. 16 Na tsaka leswi ni mi tshembaka* ka swilo hinkwaswu.