Tinhlayo

15 Yehovha a tama a vulavula na Moxe a ku: 2 “Byela Vayisrayele u ku: ‘Nkama mi nga ta fika ka tiko leli ni mi nyikaka lona swaku mi tshama ka lona,+ 3 kutani mi yendlela Yehovha gandzelo la ndzilu hi homu kumbe hi nyempfu, hambi hi gandzelo la ku hisiwa+ kumbe i gandzelo la xitshembiso xa ku hlawuleka kumbe i gandzelo la ku tirhandzela+ kumbe i gandzelo leli mi li yendlaka hi minkama ya mafexta ya n’wina+ swaku li nun’hwela kahle ka Yehovha,+ 4 lweyi a nyikelaka gandzelo la yena a fanele a tlhela a nyika Yehovha gandzelo la swakudla la mpupu wa ku siliwa kahle,+ lowu ringanaka kolomuyani ka kilu lin’we* lowu nga patsiwa ni litru lin’we* la mafurha. 5 U fanele u nyikela hi litru lin’we la vhinyu swaku li va gandzelo la vhinyu, ku patsa ni gandzelo la ku hisiwa+ kumbe xinyempfani xin’wani ni xin’wani xa xinuna. 6 Ka xinyempfani xa xinuna u fanele u yendla gandzelo la swakudla hi mpupu wa ku siliwa kahle lowu ringanaka kolomuyani ka makilu mambirhi* na wu patsiwe ni mafurha lama hundzakanyana litru lin’we. 7 U fanele u tlhela u nyikela hi vhinyu leli hundzakanyana litru lin’we swaku li va gandzelo la vhinyu, swaku li nun’hwela kahle ka Yehovha.

8 “‘Kambe loko wo nyikela hi homu ya xinuna swaku yi va gandzelo la ku hisiwa+ kumbe gandzelo la xitshembiso xa ku hlawuleka+ kumbe gandzelo la ku kombela ku rhula ka Yehovha,+ 9 u fanele u tlhela u nyikela homu ya xinuna ni gandzelo la swakudla+ la mpupu wa ku siliwa kahle lowu ringanaka kolomuyani ka makilu manharhu ni hafu* na wu patsiwe ni mafurha lama ringanaka kolomuyani ka malitru mambirhi.* 10 U fanele u tlhela u nyikela kolomuyani ka malitru mambirhi* ya vhinyu swaku li va gandzelo la vhinyu,+ gandzelo leli nga yendliwa hi ndzilu, swaku li nun’hwela kahle ka Yehovha. 11 Leswi, hi leswi mi faneleke mi swi yendla ka homu yin’wani ni yin’wani ya xinuna kumbe nyempfu yin’wani ni yin’wani ya xinuna kumbe swinyempfani swa xinuna kumbe timbuti. 12 Mi fanele mi yendla leswo hi ku ya hi numeru ya leswi mi swi nyikelaka. 13 Muyisrayele mun’wani ni mun’wani a fanele a yendla leswo loko a yendla gandzelo hi ndzilu, swaku li nun’hwela kahle ka Yehovha.

14 “‘Loko ku li ni munhu wa tiko lin’wani lweyi a tshamaka na n’wina kumbe lweyi i nga khale na a tshama na n’wina, kutani a yendla gandzelo hi ndzilu, swaku li nun’hwela kahle ka Yehovha, a fanele a li yendlisa leswi mi li yendlisaka swona.+ 15 Ku ta tirha nawu wun’we ka n’wina hinkwenu ni le ka vanhu va tiko lin’wani lava tshamaka na n’wina. Nawu lowu, wu ta tirha ni ka vatukulu va n’wina hi masiku ni masiku. N’wina ni vanhu va tiko lin’wani lava tshamaka na n’wina ma fana ka Yehovha.+ 16 Ku ta tirha nawu wun’we ni xiboho xin’we xa ku yavanyisa, ka n’wina ni ka vanhu va tiko lin’wani lava tshamaka na n’wina.’”

17 Yehovha a tlhela a byela Moxe a ku: 18 “Byela Vayisrayele u ku: ‘Loko mi fika ka tiko leli ni mi yisaka ka lona, 19 se mi dla swakudla* swa tiko lolelo,+ mi fanele mi humesa minyikelo ka Yehovha. 20 Mi fanele mi nyikela hi mpupu wa leswi nga rhanga swi tshoveliwa,+ mi hamba ni mapawu ya redondu. Mi fanele mi swi nyikela ku fana ni minyikelo leyi taka hi le xihulelweni.* 21 N’wina ni vatukulu va n’wina mi fanele mi nyikela ka Yehovha hi mpupu wa swin’wani swa leswi nga rhanga swi tshoveliwa, mi fanele mi yendla leswo hi masiku ni masiku.

22 “‘Loko mo tshuka mi yendla xihoxo, mi tsandzeka ku landza minawu leyi hinkwayu, leyi Yehovha a nga yi byela Moxe, 23 ku nga hinkwaswu leswi Yehovha a nga mi rhuma swona hi ku tirhisa Moxe ku sukela siku leli Yehovha a nga mi byela hi lona anze ka vatukulu va n’wina, 24 loko mi yendle xihoxo hi ku phazama kambe vanhu va nga swi tivi, vanhu hinkwavu va fanele va nyikela xihon’wani xin’we xa xinuna swaku xi va gandzelo la ku hisiwa, leswaku xi nun’hwela kahle ka Yehovha ni gandzelo la xona la swakudla ni gandzelo la xona la vhinyu, hi ku ya hi mayendlelo ya kona+ ni ximbutani xin’we swaku xi va gandzelo la xidjoho.+ 25 Muprista a ta kombela swaku Vayisrayele hinkwavu va rivaleliwa, kutani va ta rivaleliwa,+ hikusa va yo phazama naswona va yendlele Yehovha gandzelo hi ndzilu va tlhela va tisa gandzelo la xidjoho phambheni ka Yehovha hi mhaka ya xihoxo xa vona. 26 Vayisrayele hinkwavu ni vanhu va tiko lin’wani lava tshamaka na vona va ta rivaleliwa hikusa a ku li xihoxo xa vanhu hinkwavu.

27 “‘Loko munhu o tshuka a djoha hi ku phazama, a fanele a nyikela mbuti ya xisati leyi nga ni lembe lin’we swaku yi va gandzelo la xidjoho.+ 28 Muprista a ta kombelela munhu lweyi a nga djoha hi ku phazama swaku a rivaleliwa hi Yehovha, kutani a ta rivaleliwa.+ 29 Ku fanele ku tirha nawu wun’we ka Vayisrayele ni ka vanhu va tiko lin’wani lava tshamaka na n’wina, loko munhu a nga djohanga hi maxivomu.+

30 “‘Kambe munhu lweyi a djohaka hi maxivomu,+ kumbe i Muyisrayele kumbe i munhu wa tiko lin’wani lweyi a tshamaka na n’wina, o rhuka Yehovha, a fanele a dlayiwa. 31 A fanele a dlayiwa hi mhaka ya leswi a nga delela Yehovha a tlhela a nga landzi nawu wa Yena.+ A ta fela xidjoho xa yena.’”+

32 Na va ha li mananga, Vayisrayele va kume munhu na a rholela tihunyi hi siku la Savata.+ 33 Lava nga mu kuma na a rholela tihunyi va mu yise ka Moxe na Aroni ni ka vanhu hinkwavu. 34 Se va mu pfalela+ hikusa a va nga se swi tiva swaku va ta yendla yini hi yena.

35 Kutani Yehovha a byela Moxe a ku: “Munhu yelweyo a fanele a dlayiwa,+ vanhu hinkwavu va fanele va mu ba hi maribye ahandle ka matende.”+ 36 Se vanhu hinkwavu va mu humesa handle ka matende, va mu ba hi maribye a za a fa, hi ku landza leswi Yehovha a nga byela Moxe.

37 Yehovha a tlhela a byela Moxe a ku: 38 “Byela Vayisrayele swaku vona ni vatukulu va vona va fanele va tiyendlela mafundzu* amagamu ka mpahla ya vona naswona va fanele va rhunga ngoti ya azuli ahenhlanyana ka mafundzu.+ 39 ‘Mi fanele mi yendla mafundzu amagamu ka mpahla ya n’wina swaku loko mi ma vona mi ta khumbuka minawu hinkwayu ya Yehovha kutani mi yi yingisa.+ A mi fanelanga mi landzela timbilu ta n’wina ni matihlo ya n’wina, hikusa leswo swi ta yendla swaku mi gandzela swikwembu swin’wani.*+ 40 Leswo swi ta mi pfuna ku khumbuka ni ku yingisa minawu ya mina hinkwayu naswona mi ta kwetsima phambheni ka Xikwembu xa n’wina.+ 41 Hi mina Yehovha Xikwembu xa n’wina lweyi a nga mi humesa ka tiko la Gibita swaku mi ta swi tiva swaku ni Xikwembu xa n’wina.+ Hi mina Yehovha Xikwembu xa n’wina.’”+