Nhlawutelo ya Yohani
17 Yin’we ya 7 wa tintsumi leti a ti khome 7 wa switijelani+ yi ni telile yi fika yi ku: “Tani ni ta ku komba leswi nghwavani yayikulu leyi nga tshama henhla ka mati ya manyingi+ yi nga ta yavanyisiwa xiswona, 2 leyi tihosi ta misava ti nga yendla wuntunga la swa masangu*+ na yona ni leyi nga dakwisa lava tshamaka misaveni hi vhinyu la wunghwavani* la yona.”+
3 Se ntsumi yi ni tlakula hi matimba ya moya wa ku kwetsima yi ni yisa mananga. Kutani ni vona wansati na a tshame henhla ka xiharhi xa ku chavisa hintamu* xa ku pshuka lexi nga tala hi mavito ya nhlambha; xiharhi lexi a xi ni 7 wa tinhloko ni 10 wa timhondzo. 4 Wansati lweyi a a yambale mpahla ya ku durha ya ku pshuka+ naswona a a tisasekise hi woru, maribye ya ku durha ni maperola;+ a a khome kopo ya woru leyi a yi tale hi minchumu ya ku nyenyentsa ni ya ku kala yi nga basanga ya wunghwavani* la yena. 5 Ka ximombo xa yena a ku tsaliwe vito leli nga xihundla, leli nge: “Babilona Wamukulu, mamani wa tinghwavani+ ni wa minchumu ya ku nyenyentsa ya misava.”+ 6 Ni tlhele ni vona swaku wansati lweyi a dakwe hi ngati ya vakwetsimi ni ya timboni ta Yesu.+
Loko ni mu vona ni hlamale hintamu. 7 Se ntsumi yi ni vutisa yi ku: “U hlamala yini? Ni ta ku byela xihundla xa wansati+ lweyi ni xa xiharhi xa ku chavisa hintamu lexi nga ni 7 wa tinhloko ni 10 wa timhondzo+ lexi wansati lweyi a nga tshama henhla ka xona: 8 Xiharhi xa ku chavisa hintamu lexi u nga xi vona, a xi li kona, kambe xi gama xi nyamalala naswona ku yo sala katsongo swaku xi ta huma hi ka xikhele xa ku yenta+ xi gama xi helisiwa. Kutani lava tshamaka misaveni (lava mavito ya vona ma kalaka ma nga tsaliwanga ka buku la wutomi+ ku sukela misava yi va kona) va ta hlamalisiwa hi leswaku xiharhi lexi xa ku chavisa hintamu xi ve kona, xi gama xi nyamalala kambe xi ta tlhela xi humelela.
9 “Mhaka leyi yi lava wutivi ni wutlharhi: A 7 wa tinhloko+ ti fanekisela 7 wa tintshava leti wansati a nga tshama henhla ka tona. 10 Ku ni 7 wa tihosi: 5 wa tona ti wile, yin’wani yi kona, leyin’wani a yi se fika, kambe loko yi fika yi ta fuma swa nkamanyana. 11 Kutani xiharhi xa ku chavisa hintamu lexi a xi li kona kambe xi nga gama xi nyamalala,+ na xona i hosi ya wu 8, kambe xi huma hi ka leta 7 naswona xi ya ku helisiweni.
12 “A 10 wa timhondzo leti u nga ti vona ti fanekisela 10 wa tihosi leti kalaka ti nga se sungula ku fuma, kambe ti nga ta fuma swa nkamanyana* ni xiharhi xa ku chavisa hintamu. 13 Tihosi leti ti ni mimpimiso ya ku fana, se ti ta nyika xiharhi xa ku chavisa hintamu matimba ya ku fuma. 14 Tihosi leti ti ta lwa ni Xinyempfani,+ kambe leswi xi nga Hosi ya tihosi ni Mufumi wa vafumi,+ Xinyempfani xi ta ti hlula.+ Naswona lava nyimaka ni Xinyempfani, lava nga vitaniwa, lava nga langiwa naswona va nga tshembeka, na vona va ta ti hlula tihosi leti.”+
15 Se ntsumi yi ku: “Mati lawa u nga ma vona, lawa nghwavani yi nga tshama henhla ka wona, ma fanekisela vanhu ni xitshungu ni matiko ni tirimi.+ 16 A 10 wa timhondzo+ leti u nga ti vona ni xiharhi xa ku chavisa hintamu,+ swi ta nyenya nghwavani leyi,+ kutani swi ta yi tekela minchumu ya yona hinkwayu, yi sala na yi nga yambalanga nchumu naswona swi ta dla nyama ya yona swi tlhela swi yi hisa hi ndzilu yi hela.+ 17 Hikusa Xikwembu xi ta swi veka ka mimpimiso ya tona*+ swaku ti yendla ku rhandza ka xona, ku nga ku va ti twanana ku teka mfumu wa tona ti wu nyika xiharhi xa ku chavisa hintamu+ anze ku hetiseka leswi Xikwembu xi nga swi vula. 18 Wansati+ lweyi u nga mu vona a fanekisela doropa lalikulu leli mfumu wa lona wu fumaka tihosi ta misava.”