Mahungu Ya Ku Tsakisa Ya Ku Tsaliwa Hi Yohani

7 Loko se ku yendleke leswo, Yesu a tame a chumayela* Galileya; a a nga swi lavi ku chumayela Yudiya hikusa Vayuda a va lava ku mu dlaya.+ 2 Kambe Fexta la Vayuda la Matabernakela*+ a li li kusuhi. 3 Se vamakwavu va yena+ va ku: “Suka lani u ya Yudiya, leswaku vadjondzisiwa va wena lavan’wani va ta vona masingita lawa u ma yendlaka. 4 Hikusa loko munhu a lava ku tiviwa, a nge yendli nchumu na a li xihundleni. Leswi u swi yendlaka, swi yendli phambheni ka vanhu hinkwavu.” 5 Phela vamakwavu va yena a va nga kholwi ka yena.+ 6 Se Yesu a ku: “Nkama wa mina a wu se fika,+ kambe n’wina mi nga famba hi nkama lowu mi wu lavaka. 7 Misava a yi na xivangelo xa ku mi nyenya, kambe mina ya ni nyenya hi mhaka ya leswi ni fakazaka swaku mintirho ya yona yi bihile.+ 8 Fambani fexteni; mina a ni nga ta ya hikusa nkama wa mina a wu se fika.”+ 9 Nkama a nga gama ku va byela timhaka leti, a tisalele Galileya.

10 Kambe nkama vamakwavu va yena va nga famba, na yena a famba, kambe a a nga lavi ku voniwa hi vanhu. 11 Se Vayuda va sungula ku mu lavetela fexteni va ku: “Kasi a kwini munhu wa kona?” 12 Vanhu a va ngurangura swinene hi mhaka ya yena. Van’wani a va ku: “I munhu wamunene.” Van’wanyani a va ku: “A hi munhu wamunene. A kanganyisa xitshungu.”+ 13 Vanhu a va chava ku khuluma hi yena hi mhaka ya leswi a va chava Vayuda.+

14 Nkama fexta a li li xikarhi, Yesu a ye ka tempele a sungula ku djondzisa. 15 Se Vayuda va sungula ku hlamala va ku: “Munhu lweyi a ma tivela kwini Matsalwa+ kuve a nga djondzanga?”*+ 16 Yesu a va hlamula a ku: “Leswi ni swi djondzisaka a hi swa mina kambe i swa lweyi a nga ni rhuma.+ 17 Loko munhu a lava ku yendla ku rhandza ka Xikwembu a ta swi tiva swaku leswi ni swi djondzisaka i swa Xikwembu+ kumbe no tisungulela. 18 Lweyi a vulavulaka swa nhloko ya yena a lava ku dzunisiwa; kambe lweyi a lavaka ku dzunisa lweyi a nga mu rhuma,+ a vulavula ntiyiso naswona a ku na wubihi ka yena. 19 Moxe a mi nyike Nawu.+ Kambe a nga kona ni mun’we ka n’wina lweyi a wu yingisaka. Se hi mhaka muni mi lava ku ni dlaya?”+ 20 Xitshungu xi hlamula xi ku: “Wena u ni dimoni. Kasi u lava ku dlayiwa hi mani ke?” 21 Yesu a ku: “Ni yendle singita lin’we naswona hinkwenu mi hlamalile. 22 Moxe a mi nyike nawu wa leswaku mi tsema nsuvu;*+ nawu lowu a wu nga ti hi ka yena, kambe a wu ta hi ka vavhovho+ naswona n’wina mi tsema munhu nsuvu hi savata. 23 Loko munhu a tsema nsuvu hi savata swaku ku nga tluliwi Nawu wa Moxe, hi mhaka muni mi ni kwatela hintamu hileswi ni nga hanyisa munhu hi savata?+ 24 Mi nga yavanyisi munhu hi ku txuvuka nghohe,* kambe yavanyisani hi ku lulama.”+

25 Se vanhu van’wani lava tshamaka Yerusalema va ku: “Indjhe a hi yena munhu lweyi va lavaka ku mu dlaya?+ 26 Phela a khuluma phambheni ka vanhu, kambe a va vuli nchumu. Swi li ni varhangeli va hina se va kholwa swaku hi yena Kreste? 27 Hina ha ku tiva lomu munhu lweyi a taka hi kona;+ kambe nkama Kreste a nga ta ta, a nga kona lweyi a nga ta tiva lomu a taka hi kona.” 28 Na Yesu a li ku djondziseni atempeleni a huwelele a ku: “Ma ni tiva mi tlhela mi tiva lomu ni taka hi kona. Ni yo rhumiwa+ naswona Lweyi a nga ni rhuma wa hanya, kambe n’wina a mi mu tivi.+ 29 Mina na mu tiva+ hikusa ni ta hi ka yena funtshi hi Yena a nga ni rhuma.” 30 Kutani va zama ku mu khoma,+ kambe a va swi kotanga hikusa nkama wa yena a wu nge se fika.+ 31 Kambe vanhu va ku tala va ve ni lipfumelo ka yena,+ se va ku: “Indjhe nkama Kreste a nga ta fika a ta yendla masingita ya ku tala ku tlula lawa ma nga yendliwa hi munhu lweyi?”

32 Vafarisi va twe vanhu na va hlevetela timhaka leti hi yena, se vaprista vavakulu ni Vafarisi va rhuma vagwardu swaku va ya mu khoma. 33 Kutani Yesu a ku: “Ni ta va na n’wina nkamanyana na ni nge se tlhelela ka Lweyi a nga ni rhuma.+ 34 Mi ta ni lavetela kambe a mi nga ta ni kuma naswona lomu ni nga ta va kona a mi nge swi koti ku ya kona.”+ 35 Kutani Vayuda va khuluma hi xivona va ku: “Se munhu lweyi a lava ku ya kwini, ka ku a hi nge mu kumi? Ku nga va swaku a lava ku ya ka Vayuda lava nga hangalaka xikarhi ka Vagriki swaku a djondzisa Vagriki ke? 36 A lava ku vula yini loko a ku: ‘Mi ta ni lavetela, kambe a mi nga ta ni kuma naswona lomu ni nga ta va kona a mi nge swi koti ku ya kona’?”

37 Hi siku la wugamu, ku nga siku lalikulu la fexta,+ Yesu a suka a nyima a ku: “Loko ku ni lweyi a nga ni torha, a a ti ka mina a ta nwa mati.+ 38 Lweyi a pfumelaka ka mina, hi ku landza leswi matsalwa ma nga swi hlaya loko ma ku: ‘Mati ya ku tala lama nyikaka wutomi ma ta humetela hi ka yena.’”+ 39 Kambe nkama a nga vula leswo, a a vulavula hi moya wa ku kwetsima lowu a wu ta kumiwa hi lava nga pfumela ka yena; a va nge se wu kuma+ hikusa Yesu a a nge se tlakusiwa.+ 40 Van’wani lava nga twa marito lawa va ku: “Impela lweyi i Muprofeta.”+ 41 Van’wani a va ku: “Lweyi i Kreste.”+ Kasi van’wani a va ku: “Indjhe Kreste a nga ta hi Galileya ke?+ 42 Matsalwa a ma vuli swaku Kreste a ta huma ka vana* va Davhida+ aBetlehema,+ ku nga xidoropani lexi Davhida a a tshama ka xona ke?”+ 43 Se vanhu va sungula ku phikizana hi mhaka ya yena. 44 Van’wani a va lava ku mu khoma, kambe va tsandzekile.

45 Se vagwardu va tlhela ka vaprista vavakulu ni Vafarisi, kutani Vafarisi va ku: “Se hi mhaka muni mi nga mu tisanga?” 46 Vagwardu va ku: “A ku na munhu lweyi a nga tshama a vulavulisa leswi.”+ 47 Kutani Vafarisi va ku: “Indjhe na n’wina se a mi yo hembeliwa ke? 48 Ku ni murhangeli ka hina kumbe Mufarisi lweyi a nga pfumela ka yena?+ 49 Kambe xitshungu lexi, xa ku kala xi nga wu tivi Nawu, i vanhu lava nga rhukiwa.” 50 Se Nikodema, lweyi a a li mun’wani wa vona, lweyi a nga tshama a ya ka Yesu, a ku: 51 “Ku nga va swaku Nawu wa hina wa hi pfumelela ku yavanyisa munhu na hi nge se mu yingisela ni ku tiva leswi a nga swi yendla ke?”+ 52 Se va mu hlamula va ku: “Swi li na wena se u ta hi Galileya? Kambisisa Matsalwa, u ta swi vona swaku a ku na muprofeta lweyi a nga ta ta hi Galileya.”*