Tipisalema
Ka mayextru; hi mayimbelelelo ya lisimu leli nge: “Makhon’wa.”* Maxkili* ya vana va Kora.+ Lisimu la lirhandzu.
45 Mbilu ya mina yi tale hi minchumu yayinene.
Ni li: “Lisimu la mina li vulavula hi hosi.”+
Ni navela swaku lirimi la mina li fana ni xa ku tsala hi xona+ xa mutsali wa kahle.+
2 U sasekile hintamu ku tlula vavanuna hinkwavu.
Ka nomo wa wena ku huma marito ya ku tsakisa.+
Hi leswo swi nga yendla swaku Xikwembu xi ku katekisa hi masiku ni masiku.+
3 Tlhoma xipada xa wena,+ wena lweyi a nga ni matimba,+
Hi ku hlonipheka ka wena ni ku dzuneka ka wena.+
4 Famba u ya hlula hi ku tlakuka ka wena;+
Famba hi kavhalu la wena u ya lwela ntiyiso ni lava tivekaka hansi ni ku lulama,+
Naswona voko la wena la xinene li ta yendla* minchumu ya ku hlamalisa.
5 Mimpaxwa* ya wena yi lotekile kahle, yi wisetela vanhu phambheni ka wena;+
Yi tlhava timbilu ta valala va hosi.+
6 Xikwembu i xitshamu xa wena xa wuhosi hi masiku ni masiku;+
Nhonga ya wuhosi ya mfumu wa wena i nhonga ya wuhosi ya wululami.+
7 U rhandze ku lulama+ naswona u nyenye swa ku biha.+
Hi leswo swi nga yendla swaku Xikwembu, Xikwembu xa wena xi ku tota+ hi mafurha xi tlhela xi ku yendla u tsaka hintamu+ ku tlula tihosi tin’wani.
8 Mpahla ya wena hinkwayu yi nun’hwela mira, mhangani ni kasiya;*
U tsakisiwa hi switende* loko u li ka yindlo ya wuhosi leyi nga sasekisiwa hi matinyu ya tindlopfu.
9 Ka vavasati lava hloniphiwaka hintamu ku ni vana va tintombhi va tihosi.
Nsati wa hosi a nyime ka voko la wena la xinene, a tisasekisele hi woru la le Ofiri.+
10 Yingisa, wena ntombhi, yingisela kahle;
Khohlwa vanhu va tiko la wena ni ndjangu wa papayi wa wena.
11 Kutani hosi yi ta navela ku saseka ka wena,
Hikusa i hosi ya wena,
Se khizama phambheni ka yona.
12 Ntombhi ya le Tiru yi ta ta ni nyiko;
Vavanuna va ku ganya hintamu va ta lava swaku u va komba timpsalu.
13 Ndzeni ka yindlo ya hosi ku ni ntombhi ya ku saseka hintamu;
Mpahla ya yona yi sasekiseliwe hi woru.
14 Yi ta yisiwa ka hosi na yi yambale mpahla ya ku durha ya ku lukiwa.
Vanghanu va yona va tintombhi lava yi landzelaka, va ta tisiwa ka wena.
15 Va ta tlhangavetiwa hi minkulungwani ni ku tsaka;
Va ta nghena ka yindlo ya hosi.
16 Vana va wena va ta teka switshamu swa vavhovho va wena.
U ta va yendla varhangeli amisaveni hinkwayu.+
17 Ni ta yendla swaku vanhu lava nga ta psaliwa ka nkama lowu taka va tiva vito la wena hi masiku ni masiku.+
Hi leswo swi nga ta yendla swaku vanhu va ku dzunisa hi masiku ni masiku.